Read kumam Deuteronomio 34 Bible Online

Deuteronomio 34 - kumam bible

Deuteronomio 34

¹Ik'tzun Moisés tuj chq'ajlaj Moab, ex jax twi witz Nebo aju ta' tuj tiwitz tx'otx' Pisga, aju tajtz jlajtzi twitz tnam Jericó. Atzun tzaj tyek'un Qman te tkyaqil tx'otx' Galaad ponin b'aj max ti'j ttx'otx' Dan,

²tuk'ix ttx'otx' Neftalí, ttx'otx' Efraín, ttx'otx' Manasés ex tkyaqil ttx'otx' Judá, ponin b'aj max ttzi Nintz Mar,

³tuk'ix tx'otx' Néguev, tx'otx' ttzi'yile nima Jordán ex tchq'ajlajil tnam Jericó aju tnam at nim tqan xa'j tuj, ponin b'aj max ti'j tnam Zoar.

⁴Tmatzun Qman te kyja': Atzun tx'otx' lu xi ntziyane te Abraham, te Isaac ex te Jacob tu'n t-xi nq'o'ne kye kyiyjil. Ma txi nq'o'ne amb'il teya tu'n t-xi tke'yina, ex mi'n pona tuj.

⁵Kyimtzun Moisés aju tmajen Dios tuj tx'otx' Moab, ik tza'nx otoq tma Qman,

⁶ku'x maqu'n tu'n Dios tuj chq'ajlaj tuj tx'otx' Moab tajtz jlajtzi Bet-peor, ex kukx ja'lo mi jun ojtzqilte jatum maqu'n.

⁷Otoq japun Moisés twi' 120 ab'q'i tej tkyim; b'a'nxtoq ate' qe tb'aq' twitz, ex atxtoq tipun t-ximlal.

⁸Atzun kye aj Israel o che oq'xix ti'j Moisés tuj 30 q'ij tuj tchq'ajlajil tx'otx' Moab. Kyja'tzun e japun b'aj kyu'n qe q'ij te oq'el ex te b'is ti'j tkyimlen.

⁹Atzunte Josué aju tky'ajal Nun otoq tz'ok nim tnab'l tu'nju otoq kub' tq'o'n tq'ab' Moisés tib'aj twi'; tu'ntzun jlu xi kyniman qe aj Israel, ex o kyb'incha ik tza'nx otoq tma Qman te Moisés.

¹⁰Mi a'l juntl t-sanjel Dios o ten kyxol aj Israel ik tza'n te Moisés, twitzelku Qman o yolin tuk'il;

¹¹mi a'l juntl o b'inchante qe techal ex qe b'inchb'en nim kyipumal ik tza'n qeju e tzaj tma'n Qman te tu'n tb'inchante tuj Egipto, ti'j Faraón, kyi'j qe aj sanjelal ate'toq ttxlaj ex ti'j tkyaqil tx'otx' Egipto,

¹²ex mi a'l juntl o pon tipumal ik tza'n te Moisés, tej kyb'ant qe b'inchb'en ma'xix ex xob'ajilxix tu'n kywitz kykyaqil aj Israel.