Read kumam Deuteronomio 4 Bible Online

Deuteronomio 4 - kumam bible

Deuteronomio 4

¹Atzun ja'lo aqeye aj Israel, kyb'intze qe ley ex qe mandamyent, aqeju in che'x nxnaq'tza'ne kyeye, ex che japunxwit kyu'ne, tu'ntzun kyanq'ine ex tu'n kyoke tajwil tx'otx' ktzajel tq'o'n Qman kyeye, aju Kydios qxe'chel.

²Mi'n tz'ok kyq'o'ne txqantl yol ti'j yol in xi nma'ne kyeye, ex mi'n tz'el kyi'ne jun yol ti'j; o'kx tu'n t-xi kynimane qe tmandamyent Qman Dios, aqeju in che'x nma'ne kyeye.

³Ax qeye e ke'yinte aju tb'incha Qman tuj Baal-peor, ex o kyile tej kykyim qe xjal tu'n, aqeju e k'ulun twitz tilb'ilal kydios xjal Baal-peor tb'i, kyxolxe e kyim qe xjal lu;

⁴atzun kyeye, aqeye kukx e ok lpe'ye ti'j Qman Dios, itz'x qeye ja'lo.

⁵O che'x nxnaq'tza'ne qe ley ex qe mandamyent kyeye, ik tza'n tzaj tma'n Qman Dios weye, tu'ntzun tjapun kyu'ne ok kynajane tuj tx'otx' jatum che pole tu'n kyoke tajwil.

⁶Kukx kyna'ntze ex japunx kyu'ne. Qa ma b'ant kyu'ne ikju, atzun k'elel kynik' txqantl nasyon kyi'je qa at kynab'le ex kyojtzqib'le. Oktzun kyb'inte txqantl nasyon aju kyleye, ok kyma' kyja': Qe xjal ate' tuj nintz nasyon lu, ax tok at nim kynab'l ex kyojtzqib'l, che chilo.

⁷¿Atpe juntl nintz nasyon niqayin ate' qe tdios ti'j ik tza'n qe, niqayin ta' Qman Dios qi'j ok txi qqanin jun ti'xti te?

⁸¿Atpe juntl nintz nasyon at qe ley ex qe mandamyent tz'aqlxix tuk'il, ik tza'n tkyaqilju in xi nma'ne kyeye ja'lo?

⁹Tu'ntzun jlu, kyq'onke kwent ti'j ju o kyile, mi'n tzik' tna'l kyu'ne ex mi'n naj ti'j kyk'u'je tuj tkyaqil kyanq'ib'le; noq o'kx tu'n tkyaj kyma'ne kye kyk'wa'le ex kye tal kychmane.

¹⁰Aju q'ij tej kytene twitz Qman Dios t-xe witz Horeb, tzaj tma'n Qman weye kyja': Chmon b'aja qe xjal tu'ntzun kyb'inte nyole, ex tu'n tel kynik' ti'j tza'n tten tu'n tten nchiylale kye tuj tkyaqil q'ij ok kyten twitz tx'otx', ex tu'n t-xi kyxnaq'tza'n tkyaqil jlu kye kyk'wa'l.

¹¹Atzun kyeye e pon laq'e'ye niqayin t-xe witz. Aju witz in julin q'aq' ti'j ex najchaq in japun julin tqan twitz kya'j; aju t-sib'el ok ik tza'n muj q'eqxix ke'yin ex puro qlolj;

¹²atzunte Qman tzaj yolin kyuk'ile tuj tqan q'aq' ex o kyb'iye tq'ajq'ajel twi', ex mi jun o kyile; o'kx tq'ajq'ajel twi' o kyb'iye.

¹³Tzajtzun tma'n Qman aju yol tu'n tb'ant ti'j kyuk'ile, ex atzun jlu qe laj mandamyent e kub' ttz'ib'an kywitz kab'e tz'lom ab'j, ex tzaj tma'n kyeye tu'n tjapun kyu'ne.

¹⁴Ax ikx tzaj tma'n Qman weye tu'n t-xi nq'o'ne xnaq'tzb'il kyeye kyi'j qe ley ex qe mandamyent il ti'j tu'n kyjapun kyu'ne ok kynajane tuj tx'otx' k'okel te kyetzb'ile.

¹⁵Tuj q'ij tej tyolin Qman kyuk'ile tuj tqan q'aq' twi witz Horeb, mi jun o kyile. Kyja'tzun ten kykwente kyi'je

¹⁶tu'n mi'n kykub' tz'aqe tuj il, ex mi'n kub' kyb'incha'ne jun tilb'ilal xinaq, mi tilb'ilal xu'j,

¹⁷mi kyilb'ilal qe txkup ate' twitz tx'otx', mi kyilb'ilal qe chyu'j in che lipan twitz kya'j,

¹⁸mi kyilb'ilal qe txkup in xi kyjaqu'n kyk'u'j twitz tx'otx', ex mi kyilb'ilal qe kyiẍ ate' tuj a'.

¹⁹Ok t-xi kyke'yine q'ij twitz kya'j, tuk'ix xjaw, kyuk'ix qe che'w ex qe txqantl at twitz kya'j, ten kykwente kyi'je tu'n mi'n tpon kyk'u'je ti'j tu'n kyk'ulune kywitz, ex kykyaqil qeju ate' twitz kya'j, tu'n Qman Dios e b'ant tu'n kyajb'en kye kykyaqil xjal ate' twitz tx'otx'.

²⁰Ex a Qman etz q'inte kyeye tuj tx'otx' Egipto, jatum e tene mer ik tza'n tuj jun jorni jatum nno'kx q'ot k'uxb'il tu'n tkub' ulj, tu'ntzun kyoke te jun tnam etzan tu'n, ik tza'n kytene ja'lo.

²¹Maske ikju ex o tzaj tq'oj Qman wi'je tu'n kyeye kylaj, ex o tma weye tu'n mi'n wik'xe tuj nima Jordán, ex tu'n mi'n wokxe tuj tb'anil tx'otx' ktzajel tq'o'n kyeye te kyetzb'ile.

²²Tu'ntzun jlu ax chin kymele tuj tx'otx' lu, ex mlay chin ik'xe tuj nima Jordán. Bay kyeye ok che ik'exe tuj, ex che okele tajwil tb'anil tx'otx'.

²³Ten kykwente kyi'je, mi'n tzik' tna'l kyu'ne aju yol kyaj b'ant ti'j tu'n Qman kyuk'ile, ex mi'n kub' kyb'incha'ne jun tilb'ilal aju tzaj q'ma'n kyeye tu'n Qman Dios tu'n mi'n tkub' kyb'incha'ne.

²⁴Porke tok tkwent Qman Dios kyi'je ex ik tten ik tza'n jun q'aq' in b'aj tz'e'y tkyaqil tu'n.

²⁵Ok kyul itz'j kyk'wa'le ex qe tal kychmane ok kytijine tuj tx'otx' jatum che pole, qa ma tz'el kypa'n kyib'e ti'j Dios, ex qa ma kub' kyb'incha'ne tilb'ilal jun ti'xti tu'n kyk'ulune twitz, ex qa ma kyb'inchaye mya b'a'n twitz Qman Dios tu'n ttzaj tq'oj,

²⁶jurattzun che najele tuj tx'otx' k'okel te kyetzb'ile jlajxi nima Jordán, mlay che anq'ine nim tyemp tuj tx'otx' lu, b'i'x che najele te jumajx; in che ok nq'o'ne kya'j tuk'ix tx'otx' te testiw ti'j jlu.

²⁷Che b'ajel sipane tu'n Qman kyxol txqantl nasyon, ex nik'xi kyb'aje ktel kyxol txqantl xjal jatum che pol q'i'ne tu'n.

²⁸Atzun che ajb'ele kye dios b'inchamaj kyu'n xjal, tze' kytx'otx'il ex ab'j kytx'otx'il, aqe jlu mib'an che ke'yin, mib'an che b'in, mib'an che wa'n ex minti' in kyna'n t-xewil jun ti'xti.

²⁹Ex kyponlenxiye ma chixin, qa ma che jyone ti'j Qman Dios tu'n tkyaqil kyanmiye ex tu'n tkyaqil kyk'u'je, kneteltzun kyu'ne.

³⁰Ok ttzaj tkyaqil k'ixk'oj ex yajb'il lu kyi'je, che ajetz meltz'aje tuk'il Qman Dios, ex kxel kynimane tyol,

³¹mlay che kyaj koline tu'n, mlay che naje tu'n, mlay tzik' tna'l tu'n aju yol kyaj b'ant ti'j tu'n kyuk'il qe qxe'chele, porke nim tq'aq'b'il tk'u'j Qman kyi'je.

³²Kyqaninxe ti o b'aj ojtxi tej na'nxtoq kyitz'je ex atxix tej tkub' tb'incha'n Dios aju nej xjal twitz tx'otx'; kyxi'ye tuj tkyaqil twitz tx'otx' ex kyqaninxe qa at jun ti'xti o b'aj ex o b'injtz ma'xix t-xilen ik tza'n jlu.

³³¿Atpe juntl k'loj xjal o kyb'i tq'ajq'ajel twi Dios tzaj yolin tuj tmij tqan q'aq', ex minti' o che naj ik tza'n kyeye o kyb'iye ex minti' e naje?

³⁴¿Atpe juntl dios o tz'etz q'inte jun nasyon tjaq' tkawb'il juntl nasyon tu'n tel tetzan, ik tza'n o tb'incha Qman Dios qi'j tej qetz tuj tx'otx' Egipto? Tzaj nim joyb'il kyi'j aj Egipto, tb'incha Dios qe señ kyuk'ix qe b'inchb'en nim kyipumal, o q'ojin kyi'j aj Egipto, tzaj tyek'un nim tipumal, xob'ajilxix qeju o tb'incha; tkyaqil jlu kywitze o b'ant.

³⁵Atzun jlu o tzaj yek'un kyeye, tu'ntzun tel kynik'e ti'j qa ate Qman axix tok Dioste, ex minti' juntl, noq o'kx te.

³⁶Max tuj kya'j tzaj yolin Qman kyuk'ile tu'n kykawinjtze tu'n, tzaj tyek'un jun nintz q'aq' kyeye twitz tx'otx', ex o kyb'iye tq'ajq'ajel twi' tuj tmij tqan q'aq'.

³⁷Noq tu'nju o tk'ujla Dios qe qxe'chel, jaw t-sk'o'n qe kyiyjil, aqeju e ul itz'j te tib'ajxi, ex tu'n nim tipumal e jetz tkolpi'n tuj tx'otx' Egipto.

³⁸Kywitzxe o che ex lajo'n qe nasyon mas nim kyajlal ik tza'n kyeye ex mas nim kyipun ik tza'n kyeye, tu'ntzun kyoke te tajwil kytx'otx' ex tu'n kynajane tuj, ik tza'n in b'aj ja'lo.

³⁹Kyja'tzun tz'elx kynik'e ti'j ex kyk'u'nxe tuj kyanmiye qa ate Qman, atzun Diosju aju at tuj kya'j ex twitz tx'otx'; minti' juntl, noq o'kx te.

⁴⁰Che japunx qe tley ex qe tmandamyent kyu'ne, aqeju ma che'x nma'ne kyeye ja'lo, tu'ntzun tel b'a'n te kyeye ex kye kyk'wa'le che ul itz'j te tib'ajxi, ex tu'n kytene nim ab'q'i tuj tx'otx' ktzajel tq'o'n Qman Dios kyeye te jumajx.

⁴¹Jawtzun t-sk'o'n Moisés ox tnam tuj tumlal tjawitz q'ij te nima Jordán,

⁴²tu'ntzun t-xi oq b'yol xjal tuj, aju otoq kub' b'yonte jun tuk'il qa mya ximamaj tu'n, ex qa b'ajx che jaw q'ojl jun maj, tu'ntzun tpon tklon tib' tuj jun kye tnam lu, tu'ntzun tklet.

⁴³Atzun qe tnam lu: Aju tnam Beser, aju tkub'sa'n tuj chq'ajlaj te tzqij tx'otx', tu'n tajb'en kye tiyjil Rubén; aju tnam Ramot, aju tkub'sa'n tuj Galaad, tu'n tajb'en kye tiyjil Gad, ex aju tnam Golán, aju tkub'sa'n tuj Basán, tu'n tajb'en kye mij tiyjil Manasés.

⁴⁴Atzun qe ley lu xi tq'o'n Moisés kye aj Israel,

⁴⁵kyuk'ix qe mandamyent, qe xnaq'tzb'il ex qe kawb'il, aqeju xi tma'n Moisés kye aj Israel tej kyetz tuj Egipto,

⁴⁶tej ate'toq tuj tjawitz q'ij te nima Jordán, tuj chq'ajlaj tkub'sa'n twitz Bet-peor tuj ttx'otx' Sehón aju rey kye aj Amorreo. Atzun najltoq Sehón tuj tnam Hesbón, ex kub' ti'j tu'n Moisés ex kyu'n aj Israel tej kyetz tuj Egipto.

⁴⁷Atzun kye aj Israel e jo'k te tajwil ttx'otx', tuk'ix ttx'otx' Og aju rey te Basán. Qe kab'e rey lu kyrey qe aj Amorreo qe, ex atzun najltoq qe tuj tumlal tjawitz q'ij te nima Jordán.

⁴⁸Xi'ynix kytx'otx' tuj Aroer ttzi tq'ab' xaq Arnón, ex ponin b'aj max twi witz Sirión aju ax juntl tb'i Hermón,

⁴⁹ex tuj tkyaqil tx'otx' Arabá tuj tumlal tjawitz q'ij te nima Jordán, ex ponin b'aj max ttzi mar at tuj chq'ajlaj Arabá t-xe witz Pisga.