Read kumam Deuteronomio 5 Bible Online

Deuteronomio 5 - kumam bible

Deuteronomio 5

¹Oktzun tchmo'n Moisés kykyaqil aj Israel ex xi tma'n kye kyja': —Aqeye aj Israel, kyb'intze qe ley ex qe kawb'il aqeju che xe'l nma'ne kyeye ja'lo, kyajx tuj kynab'le ex che japunx kyu'ne.

²O kyaj b'ant ti'j jun yol tu'n Qman Dios quk'il max twi witz Horeb.

³Mya o'kx kyuk'il qe qxe'chel kyaj b'ant ti'j ju yol lu, ax ikx quk'il o b'ant, aqo' itz'x ja'lo tzalu.

⁴Twitzelku Qman tzaj yolin kyuk'ile tuj jun tqan q'aq' twi witz.

⁵Atzun weye in kub' tene kyxole tuk'il Qman, tu'ntzun ttzaj nchik'b'a'ne tyol Qman kyeye, ex tzaj t-xob'il tqan q'aq' kyi'je, ex minti' e jaxe twi witz. Tzajtzun tma'n Qman kyja':

⁶Aqine Kymane ex Kydiose aju etz q'inte kyeye tuj Egipto, jatum ate'toqe te majen.

⁷Mi'n che k'ulune kywitz junxitl dios, o'kx nwitze tu'n kyk'ulune.

⁸Mi'n kub' kyb'incha'ne jun tilb'ilal; mi jun tilb'ilal ti'j ju at tuj kya'j, mi jun tilb'ilal ti'j ju at twitz tx'otx', ex mi jun tilb'ilal ti'j ju at tuj mar.

⁹Mi'n che kub' ẍmeje'ye kywitz, ex mi'n che k'ulune kywitz, tu'nju aqine Kymane ex Kydiose minti' in kub' tuj nwitze tu'n kyk'ulune twitz juntl dios. Kpol kanun castiw wu'ne kyib'aj qe k'wa'lb'aj, qe tal chmamb'aj ex qe kytxk'a chmamb'aj, tu'n tlaj in chin el ik'une kyu'n kyman,

¹⁰ex kukx ktel tq'aq'b'il nk'u'je kyi'j nimku kyiyjil xjal, aqeju in che k'ujlan weye ex in che japun qe nmandamyente kyu'n.

¹¹Mi'n tzaj kyna'ne nb'iye noqx gan, aqine Kymane ex Kydiose, porke kb'el tcastiw xjal wu'ne aju in tzaj na'nte nb'iye noqx gan.

¹²Kyna'ntze aju q'ij te ojlab'l tu'n tajb'en o'kx weye, ik tza'nx o txi nma'ne kyeye, aqine Kymane ex Kydiose.

¹³Qaq q'ij che aq'nale tu'ntzun tb'ant tkyaqil kyaq'une,

¹⁴atzunju twuqin q'ij, q'ij te ojlab'l tu'n kyk'ulune weye, aqine Kymane ex Kydiose. Mi jun aq'untl kb'antel kyu'ne tuj q'ij lu, mi kyu'n kyky'ajale, mi kyu'n kyme'jele, mi kyu'n kymajene xinaq, mi kyu'n kymajene xu'j, mi kyu'n kywakẍe, mi kyu'n kyburre, mi kyu'n qe kyalune, ex mi kyu'n qe stranjer xjal ate' tuj kytanmiye, tu'ntzun kyojlan qe kymajene xinaq ex kymajene xu'j ik tza'nx kyeye in che ojlane.

¹⁵Kyna'ntze, ax ikx kyeye o che tene te majen tuj Egipto, ex etz wi'ne qeye ma chixin tuk'il nim wipumale. Tu'ntzun jlu in xi nma'ne kyeye tu'n kynimane aju q'ij te ojlab'l, aqine Kymane ex Kydiose.

¹⁶Kynimanxe kymane ex kytxu'ye ik tza'nx o txi nma'ne kyeye, tu'ntzun t-xi laq'e' tuj kyq'ije, ex tu'ntzun b'a'n kyel kyq'ije twitz tx'otx' aju kxel nq'o'ne kyeye, aqine Kymane ex Kydiose.

¹⁷Mi'n che b'iyune.

¹⁸Mi'n kyb'inchaye aj pajil.

¹⁹Mi'n che elq'ane.

²⁰Mi'n che nik'ane yol ti'j kyuk'ile.

²¹Mi'n pon kyk'u'je ti'j t-xu'jil kyuk'ile. Mi'n pon kyk'u'je ti'j tja kyuk'ile, mi ti'j ttx'otx', mi ti'j tmajen xinaq, mi ti'j tmajen xu'j, mi ti'j twakẍ, mi ti'j tbur, ex mi ti'j jun ti'xti at te.

²²Atzun qe yol lu e tzaj tma'n Qman tuk'il tq'ajq'ajel twi' kyuwxix wen, aju etz tuj tmij tqan q'aq' ex tuj muj qloljxix wen, tej kyb'uyintoq kyib'e kykyaqile t-xe witz, ex minti'tl tzaj tma'n txqantl yol. E kub'tzun ttz'ib'an qe yol lu kywitz kab'e tz'lom ab'j, ex e tzajtzun tq'o'n weye.

²³Atzun kyeye, tej kyb'inteye tq'ajq'ajel wib'aj aju etz tuj tmij qlolj, ex tej tkyile in jaw k'ant tqan q'aq' ti'j witz, kykyaqiltzun qe nejenel kye junjun k'loj kyiyjile kyuk'ix qe tij xjal kyxole e ul yolil wuk'ile,

²⁴ex tzaj kyma'ne weye kyja': Axix tok ma tzaj tyek'un Qman Dios tajwalil ex tipumal, ex ma qb'iye tq'ajq'ajel twi' nne'tz tuj tmij tqan q'aq'. Matzun tz'el qnik'e ti'j ja'lo, jaku yolin Qman kyuk'il xjal ex mlay che kyim.

²⁵Maske ikju ex o kymatle: ¿Tiqu'n qo kymele ex qo b'ajel tz'e'ye tu'n q'aq' lu xob'ajilxix? Qa ma qb'iye juntl maj tq'ajq'ajel twi Qman Dios, oklo qo kymele;

²⁶ex ¿alkye juntl xjal jaku kyaj anq'in ok tb'inte tq'ajq'ajel twi Dios itz' in yolin tuj tmij tqan q'aq', ik tza'n qeye ma qb'iye ex ma qo kyaj anq'ine?

²⁷Mas b'a'n txi laq'e' teya, b'intza tkyaqilju ktzajel q'ma'n teya tu'n Qman Dios, ex ktzajeltzun tma'na qeye aju otoq tzaj q'ma'n teya, atzun qeye jaku japun qu'ne aju ktzajel tma'na qeye, che chiye.

²⁸Tej kyyoline wuk'ile, in b'intoq Qman ti'j kyyole. Tmatzun Qman weye kyja': Ma nb'iye tkyaqil yol in kyma'n xjal lu, ex b'a'n ma tz'el tuj nwitze.

²⁹Noqwit ik kyximb'etz tkyaqil maj, ik tza'nx ma kyma tu'n kyxob' nwitze ex tu'n kyjapun qe nmandamyente kyu'n kykyaqil q'ij, tu'ntzun kyanq'in tuj tzalajb'il, tza'nx kye ax ikx kye kyk'wa'l.

³⁰Txi'ya ex q'manxa kye tu'n kyaj kyja;

³¹atzun teya, ax tenkja tzalu wuk'ile, ex kxel nma'ne teya kykyaqil qe mandamyent, qe ley ex qe kawb'il, aqeju che xe'l t-xnaq'tza'na kye, tu'ntzun kyjapun kyu'n ok kynajan tuj tx'otx' kxel nq'o'ne te kyetzb'il, chi Qman.

³²Kyja'tzun, japunx kyu'ne tkyaqilju o tzaj tma'n Qman Dios, ex mi'n tz'el kypa'n kyib'e ti'j.

³³Che b'ettzune tuj b'e o tzaj yek'un kyeye tu'n Qman Dios, tu'ntzun kyanq'ine ex tu'n tel b'a'n kyeye, ex tu'n kyanq'ine nim ab'q'i twitz tx'otx' aju ktzajel tq'o'n te kyetzb'ile.