Read kumam Deuteronomio 6 Bible Online

Deuteronomio 6 - kumam bible

Deuteronomio 6

¹Atzun qe mandamyent lu, kyuk'ix qe ley ex qe kawb'il o che tzaj tma'n Qman Dios tu'n kyxi nxnaq'tza'ne kyeye, ex tu'n kyjapun kyu'ne ok kypone tuj tx'otx' k'okel te kyetzb'ile,

²tu'ntzun tten tchiylal Qman Dios tuj kywitze, ex tu'n kyjapun qe tley ex qe tmandamyent kyu'ne, aqeju ma che'x nma'ne kyeye, kyuk'ix qe kyk'wa'le ex qe tal kychmane tuj tkyaqil q'ij te kyanq'ib'le, tu'ntzun kytene nim q'ij twitz tx'otx'.

³Kyja'tzun aqeye aj Israel, kyb'inxe ex tz'ok tililx tu'n kyjapun qe jlu kyu'ne, tu'ntzun tel b'a'n kyeye tuj tkyaqil, ex tu'n kychmet-xixe tuj q'inun tx'otx' ex tb'anilxix, ik tza'nx tzaj ttziyan Qman aju Kydios kyxe'chele.

⁴Kyb'intze aqeye aj Israel: Ate Qman Dios o'kxku junx.

⁵Kyk'ujlame Qman Dios tu'n tkyaqil kyanmiye, tu'n tkyaqil kyk'u'je ex tu'n tkyaqil kyipune.

⁶Kyawankxe tuj kyanmiye kykyaqil qe yol ma che'x nma'ne kyeye ja'lo,

⁷kukx kymanxe kye kyk'wa'le, ex che yoline kyi'j tuj kyjaye ex tuj kyb'eye, ax ikx ok kyxi'ye tal ex ok kyjaw we'ye;

⁸kyk'alonke ti'j kyq'ab'e ex tib'aj kywitze te jun techal,

⁹ax ikx kytz'ib'ancuye kyi'j tlamel kyjaye ex kyi'j tmarkil.

¹⁰Ok kyokx q'o'ne tu'n Qman tuj tx'otx' tzaj ttziyan kye qxe'chel Abraham, Isaac ex Jacob, jatum ate' nintz tnam tb'anilxix mya kyu'ne jaw kyb'incha'ne;

¹¹ate' ja tuj, nojni kyuj kyu'n ti'xti tb'anilxix mya kyu'ne e noj; ate' xoch tuj, mya kyu'ne ku'x kylaku'ne; ex ate' tqan uva tuk'ix tqan olivo tuj, mya kyu'ne ku'x kyawa'ne; ex ok kywa'ne ti'j ex ok kynoje,

¹²ten kykwent kyi'je tu'n mi'n tik' tna'l Qman kyu'ne, aju etz q'inte kyeye tuj tx'otx' Egipto jatum ate'toqe te majen.

¹³Tenx tchiylal Qman Dios tuj kywitze, ex o'kx te che ajb'ene, ex o'kx tb'i ktzajel kyna'ne ti'j kyyole.

¹⁴Mi'n che k'ulune kywitz kydios txqantl tnam ate' niqayin kytxlaje,

¹⁵porke aju Qman Dios at qxol, minti' in kub' tuj twitz tu'n kyk'ulune twitz juntl dios; jaku tzaj tq'oj kyi'je, ex b'i'x che najele tu'n.

¹⁶Mi'n tz'ok kyq'o'ne Qman Dios tuj malb'il ik tza'n o kyb'inchaye tuj Masah.

¹⁷Tz'ok tililx kyu'ne tu'n kyjapun qe tmandamyent Qman Dios, kyuk'ix qe ley ex qe xnaq'tzb'il o che tzaj tq'o'n kyeye.

¹⁸Kyb'inchame aju tz'aqlxix ex aju b'a'n twitz Qman, tu'ntzun tel b'a'n kyeye tuj tkyaqil, tu'n kyoke tajwil tb'anil tx'otx' tzaj ttziyan Qman kye qxe'chel,

¹⁹ex tu'n kyex tlajo'n Qman qe aj q'oj kyi'je, ik tza'n o tzaj ttziyan.

²⁰Noq alkye jun q'ij qa ma tzaj kyqanin kyk'wa'le: ¿Ti kyxilen qe mandamyent, qe ley ex qe kawb'il e tzaj tma'n Qman Dios tu'n qb'inchante?, qa che chi,

²¹atzun kyeye kxel kytzaq'we'ne: Ojtxi, tmajentoq Faraón qo'ye tuj Egipto, ex o qo etz q'i'ne tu'n Qman tuk'il nimxix tipumal.

²²O qile qe señ ex qe b'inchb'en nim kyipumal ex xob'ajilxix o tb'incha Qman tuj Egipto, ti'j Faraón ex kyi'j kykyaqil qeju ate' tuj tja;

²³ex ate etz q'inte qeye tuj tx'otx' Egipto, ex o qo ul q'i'ne tu'n tuj tx'otx' lu, aju tzaj ttziyan kye qxe'chel ex tzaj tq'o'n qe.

²⁴O tzaj tma'n Qman tu'n kyjapun kykyaqil qe mandamyent lu qu'n ex tu'n tten tchiylal tuj qwitz, tu'ntzun tel b'a'n te qe kykyaqil q'ij ex tu'n kukx qanq'in, ik tza'n qten ja'lo.

²⁵Kyja'tzun qo tel tz'aqlxix twitz Qman Dios qa ma che japun kykyaqil qe tmandamyent qu'n, ik tza'nx o tzaj tma'n qe.