Read kumam Deuteronomio 8 Bible Online

Deuteronomio 8 - kumam bible

Deuteronomio 8

¹Kykyaqil qe mandamyent ma che'x nma'ne kyeye ja'lo, tz'ok tililx kyu'ne tu'n kyjapun kyu'ne, tu'ntzun kyanq'ine, ex tu'n tchmet nim kyb'aje, ex tu'n kyoke tajwil tx'otx' aju tzaj ttziyan Qman kye kyxe'chele.

²Kyna'ntze tkyaqilju b'aj tej kyb'ete 40 ab'q'i tuj tzqij tx'otx' ẍaqlu'n qeye tu'n Qman Dios, tu'ntzun kymansixe ex tu'n tel nik'b'aj kyi'je, tu'ntzun tojtzqinte alkye kyximb'etze tuj kyanmiye, qa tu'n kyjapun qe tmandamyent kyu'ne ex qa mi'n.

³Maske o che yajlanjtze tu'n ex o tzaj we'yaj kyi'je, ex te tib'ajxi o tzaj tq'o'n kywaye maná. Aju wab'j lu minti' ojtzqi'ntoq kyu'ne ex mi kyu'n qe kyxe'chele. O tb'incha Dios tkyaqil jlu tu'ntzun tel kynik'e ti'j, qa mya o'kx tu'n wab'j jaku tz'anq'in xjal, ax ikx jaku tz'anq'in tu'n tkyaqil yol in tma'n Qman.

⁴Tuj 40 ab'q'i lu minti' b'aj kyxb'alune ex minti' eje'x mal kyqane tu'n b'etin.

⁵Tz'elx kynik'e ti'j jlu, e kub' kawine tu'n Qman Dios ik tza'n jun mamb'aj in kawin kyi'j tk'wa'l.

⁶Che japunx qe tmandamyent Qman Dios kyu'ne, che lpe'ke kyi'j qe t-xnaq'tzb'il ex tenx kychiylal tuj kywitze.

⁷Ok che okex q'i'ne tu'n Qman tuj jun tx'otx' tb'anilxix, jatum at nim a' in b'et kyuj qe tqan xaq, at a' in jatz jlet tuj tx'otx', ex in jatz pulwin kyuj chq'ajlaj ex kywi' qe witz.

⁸Tuj tx'otx' lu in tzaj triw ex sebad, at tqan uva, tqan higo, tqan karnad ẍoq', tqan olivo, ex at kychi'ye aseyt ex kylo'ye ta'l kab' tuj k'ul.

⁹Mlay che apane we'yaj tuj tx'otx' lu, ex minti' jun ti'xti mi'nwt kanun kyeye; atzun ate' qe ab'j at tb'anil k'uxb'il kyuj, ex jaku tz'etz k'uxb'il cobre kyu'ne kyuj qe witz.

¹⁰Ok kyb'aj wa'ne ex ok tnoj kyk'u'je wen, kxel kyq'o'ne chjonte te Qman Dios tu'nju tb'anil tx'otx' otoq tzaj tq'o'n kyeye.

¹¹Kyq'o'nke kwent kyi'je tu'n mi'n tik' tna'l Qman Dios kyu'ne. Che japunx qe tmandamyent kyu'ne, qe tley ex qe tkawb'il, aqeju ma che'x nma'ne kyeye ja'lo;

¹²ex ok kyb'aj wa'ne ex ok kynoje wen, ex ok tjaw kyb'incha'ne kyjaye tb'anilxix ex ok kynajane kyuj,

¹³ok kychmet kywakẍe ex kyẍne'le, ok tchmet q'an pwaq ex saq pwaq kyuk'ile, ex ok tchmet kyq'inumab'le,

¹⁴mya yaj jaw kyniman kyib'e tuj kyanmiye tu'n tkyaqil jlu, ex jaku tzik' tna'l Qman Dios kyu'ne, aju etz q'inte kyeye tuj Egipto jatum ate'toqe te majen.

¹⁵A ẍaqlunte kyeye tuj jun nintz tzqij tx'otx' ex xob'ajilxix, jatum ate'toq nim lob'aj in che kyim xjal kyu'n, jatum ate' nim si'nin, ex jatum tzaj nim txqetle'n kyi'je ex misikyer a' at; ex etz ti'n Qman a' tuj jun pik kyuwxix ex tzaj tq'o'n te kyk'a'ye.

¹⁶Tej kytene tuj lugar lu, tzaj tq'o'n Qman kywaye maná, aju minti' ojtzqi'n kyu'n qe kyxe'chele. O tb'incha Dios tkyaqil jlu tu'ntzun kyoke mans, tu'n tik' twitz kyi'je, ex tu'n tel b'a'n te kyeye te tib'ajxi.

¹⁷Mi'nwt kymaye tuj kyanmiye kyja': Tkyaqil q'inumab'l lu ma knet tu'n qexe qipumal,

¹⁸noq o'kx tzulx ti'j kyk'u'je, ate Dios in tzaj q'onte kyipumale tu'n tknet kyq'inumab'le, tu'ntzun tjapun aju yol o kyaj b'ant ti'j tu'n kyuk'il qe kyxe'chele.

¹⁹Qatzun ma tzik' tna'l Qman Dios kyu'ne, qa ma che ok lpe'ye kyi'j junxitl dios ex qa ma che kub' ẍmeje'ye tu'n kyk'ulune kywitz, b'i'x ja'lo in xi nma'ne kyeye, jumajx che najele,

²⁰ik tza'n qe nasyon che najel tu'n Qman, aqeju che okel kyk'ulb'a'ne tuj kyb'eye. Ax ikxtzun kyeye che najele qa mi'n ma txi kynimane tyol Qman Dios.