Read kumam Juan 10 Bible Online

Juan 10 - kumam bible

Juan 10

¹Tmatzun Jesús: —Ax tok kxel nma'ne kyeye, alkye minti' nno'kx ttzi kype'n ẍne'l, noq o'kx nno'kx tuj juntl plaj, atzunte eleq'ju minti' t-xob'il.

²Atzun teju nno'kx ttzi pe'n, atzunte pastorju kye ẍne'l.

³Ex in jaqet ttzi pe'n tu'n xq'uqil pe'n tu'n tokx pastor, ex qe ẍne'l in kyb'i'n tq'ajq'ajel twi'; ex in che tzaj ttxko'n t-ẍne'l teyle junjun alkye kyb'i, ex in che etz ti'n.

⁴Ex oktzun kyetz ti'n kykyaqil qeju tekuxix, in kub' nej kywitz; ex in che ok lpe' ẍne'l ti'j, porke ojtzqi'n tq'ajq'ajel twi' kyu'n.

⁵Atzun ti'j junxitl xjal mlay che ok lpe' ti'j; noq o'kx che elel oq ti'j, tu'nju minti' ojtzqi'n tq'ajq'ajel twi' junxitl xjal kyu'n, chi Jesús kye.

⁶Xi tma'n Jesús aju techal lu kye; ex minti' el kynik' ti'j ti t-xilen aju o tma.

⁷Xitzun tma'n Jesús juntl maj kye: —Ax tok kxel nma'ne kyeye: Aqine ttzi pe'n kye ẍne'l.

⁸Kykyaqil qeju e ul nej nwitze eleq' qe, ex minti' kyxob'il; ex minti' xi kyb'i'n qe ẍne'l kyyol.

⁹Aqine ttzi pe'n kye ẍne'l; alkye ma tz'oktz ttzi pe'n lu kkletel; ok k'oketz ex k'elex, ex knetel twab'l.

¹⁰Ate eleq' noq elq'al nnu'l ex b'yol kye ẍne'l ex in che naj tu'n; atzun weye ma chin ule tu'n tten kychwinqlal ex nimxix kychwinqlal tu'n tten.

¹¹Aqine b'a'n pastor; ate b'a'n pastor in xi tq'on tib' tu'n tkyim tu'n kyklet qe ẍne'l.

¹²Atzunju xjal majen, ex mya axixte pastor, ex mya te qe ẍne'l, ok tlonte ok ttzaj xo'j, in che kyaj tkolin qe ẍne'l ex nne'l oq; atzun kye ẍne'l in che tzyet naj tu'n xo'j ex in che el sputj tu'n.

¹³Nne'l oq xjal porke majen ex minti' taj kyi'j ẍne'l.

¹⁴Aqine b'a'n pastor, ex ojtzqi'n qe nẍne'le wu'ne, ex qe nẍne'le ojtzqi'n qine kyu'n,

¹⁵ik tza'n te Nmane ojtzqi'n qine tu'n, ex ojtzqi'n Nmane wu'ne; ex in xi nq'on wib'e tu'n nkyime tu'n kyklet qe ẍne'l.

¹⁶Ax ikx ate' txqantl nẍne'le mya a ate' tuj pe'n lu; ax ikx il ti'j tu'n kytzaj wi'ne, ex ok kyb'i' tq'ajq'ajel nwi'ye; ex jun pe'nx ẍne'l ktel ex junx pastor.

¹⁷Tu'ntzunju in chin k'ujlanjtze tu'n Nmane, porke in xi nq'on wib'e tu'n nkyime ex chin jawil anq'ine juntl maj.

¹⁸Mi jun k'elel q'inte nchwinqlale, wu'nx wib'e kxel nq'on wib'e tu'n nkyime. At woklene tu'n t-xi nq'on wib'e tu'n nkyime, ex at woklene tu'n njaw anq'ine. Atzun mandamyent jlu ma nk'ame te Nmane, chi Jesús kye.

¹⁹Tzaj juntl maj kyyol xjal judiy kyxolx tu'n tlaj ju yol lu.

²⁰Ex nimku kye in kyma'ntoq: —At ju'ẍ tuj tanmi, ex ma tz'el tzpet tnab'l; ¿tiqu'n in xi kyb'i'ne tyol? Che chi.

²¹Atzun juntl k'loj in kyma'ntoq: —Aju yol lu mya tyol jun xjal at ju'ẍ tuj tanmi. ¿Baqa jaku b'ant tu'n ju'ẍ tu'n tjaqet kywitz qe moẍ? Che chi.

²²In che ik'santoq xjal ninq'ij tuj Jerusalén tu'n ttzaj kyna'n tej tb'aj saqset tja Dios tu'n tok juntl maj k'ulb'il tuj. Tuj jb'aliltoq jlu.

²³Atzunte Jesús in b'ettoq twitz tja Dios, aju twitz ja tok tb'i te Salomón.

²⁴E oktzun txole' xjal judiy ti'jele Jesús ex xi kyma'n te: —¿Jte' q'ij tu'n qtene noq in jawje' qk'u'je tu'na? Qa aya ju Crist aju at toklen tu'n Dios, q'mantza clarxix qeye.

²⁵Xi ttzaq'we'n Jesús: —Ma txi nma'ne kyeye, pero minti' ma txi kyoksla'ne nyole. Aju aq'untl in tma'n Nmane tu'n nb'inchanteye, atzun qe testiw wi'je;

²⁶pero minti' in xi kyoksla'ne porke myatzun ate'ye kyxol qe nẍne'le, [ik tza'n ma txi nma'ne kyeye.]

²⁷Qe nẍne'le in kyb'i'n tq'ajq'ajel nwi'ye, ex ojtzqi'n qe wu'ne, ex in che ok lpe' wi'je.

²⁸In xi nq'o'ne kychwinqlal te jumajx, ex mlayx che naj, ex mi jun k'elel q'inte kye tuj nq'ab'e.

²⁹A Nmane tzaj q'onte kye weye, ex mas nim toklen Nmane kywitz kykyaqil, ex mi jun jaku tz'el q'inte kye tuj tq'ab' Nmane.

³⁰Aqine tuk'ix Nmane junx qo'ye, chi Jesús xi tma'n kye.

³¹Jawtzun kytzyu'n juntl maj xjal judiy ab'j tu'n tok kyxo'n ti'j.

³²Xitzun tma'n Jesús kye: —Nimku nb'inchb'ene b'a'n ma nb'inchaye kywitze tu'n tipumal Nmane; ¿alkyetzun jun nb'inchb'ene mya b'a'n kyxol jlu tu'n wok kyxo'ne tu'n ab'j?

³³Xitzun kytzaq'we'n xjal judiy: —Mlay tz'ok qxo'ne tu'n ab'j tu'n tlaj jun tb'inchb'ena b'a'n, noq o'kx tu'nju in yolina mya b'a'n ti'j Dios. Porke xjal teya ex nno'k tq'on tib'a te Dios, che chi.

³⁴Xi ttzaq'we'n Jesús: —¿Myapetzun tz'ib'an tuj kyleye, o nmaye qa dios qeye? Chi Dios.

³⁵B'a'n qu'n aju tz'ib'an tuj ley mlay ch'expet, porke in tma'n qa dios qeju e k'monte tyol Dios.

³⁶Aqine sk'o'maj qine tu'n Nmane ex ma chin tzaj t-sama'n kyxol xjal. ¿Tiqu'ntzun in kyma'ne weye: In yolina mya b'a'n ti'j Dios, che chiye, noq tu'nju ma txi nma'ne: Tk'wa'l Dios qine?

³⁷Qa mya ax aq'untl in b'ant wu'ne ik tza'n in tb'incha'n Nmane, mi'n txi kyoksla'ne nyole.

³⁸Qatzun ax aq'untl in b'ant wu'ne ik tza'n in b'ant tu'n Nmane, maske minti' in xi kyoksla'ne nyole, pero kyokslame aju nb'inchb'ene, tu'ntzun tel kynik'e ti'j ex tu'n t-xi kyoksla'ne qa ate Nmane at wuk'ile ex atine tuk'il Nmane, chi Jesús kye.

³⁹Oktzun tilil juntl maj kyu'n tu'n ttzyet Jesús, ex etz tzoqpaj tuj kyq'ab'.

⁴⁰Ex xi' juntl maj jlajxi nima jordán tuj lugar jatum e b'yan xjal tu'n Juan nej; ex axtzun kyaj ten.

⁴¹Ex nimku xjal e pon tuk'il, in kyma'n: —Ax tok ate Juan mi jun señ b'ant tu'n; ex tkyaqilju o tma Juan ti'j ju xjal lu, ax tok, che chi.

⁴²Ex nimku xjal e okslan ti'j Jesús tuj lugar lu.