Read kumam Juan 11 Bible Online

Juan 11 - kumam bible

Juan 11

¹At jun xjal Lázaro tb'i yab'toq, aj Betania xjal lu, aju ttanmi Mariy tuk'ix Marta aju terman.

²Yab'toq Lázaro aju t-xib'an Mariy; ate Mariy jlu aju ok su'nte perjum ti'j tqan Qajaw ex el t-su'n ti'j tqan tu'n ttzmal twi'.

³Xitzun kysama'n qe tanb' Lázaro jun sanjel q'malte te Jesús kyja': —Tat, aju k'ujla'n tu'na, ma yab't, chi sanjel.

⁴Tej tb'inte Jesús tma: —Aju yab'il lu mya tu'n tkyim Lázaro tu'n, noq o'kx ma tzaj yab'il lu tu'n tjaw nimsa'n tb'i Dios ex tu'n tjaw nimsa'n nb'iye, aqine Tk'wa'l Dios.

⁵Ex k'ujla'nxix Marta tu'n Jesús, tuk'ix titz'in tuk'ix Lázaro.

⁶Tejtzun tb'inte Jesús qa yab'toq Lázaro ax kyaj ten kab' q'ijtl.

⁷Tb'ajlenxitzun kab' q'ij, xi tma'n kye t-xnaq'tzb'en: —Qo'qe juntl maj tuj Judea.

⁸Xitzun kyma'n qe t-xnaq'tzb'en Jesús te: —Xnaq'tzal, k'itzqe o kyajb'e xjal judiy tu'n tok xo'na tu'n ab'j kyu'n. ¿Maj ma txi'ya juntl maj tuj Judea?

⁹Xi ttzaq'we'n Jesús: —¿Myapetzun kab'laj or tuj jun q'ij? Qa in b'et xjal q'ijl mlay jaw tolj, porke in tke'yin ju spik'un at twitz tx'otx';

¹⁰ex aju xjal in b'et qonik'an in jaw tolj, porke minti' spik'un tuk'il.

¹¹Tej tb'aj tma'n Jesús jlu xi tma'ntl kye: —Aju qamiw Lázaro in tan; ex ma chinxe k'asul te, chi Jesús.

¹²Xitzun kyma'n qe t-xnaq'tzb'en Jesús te: —Tat, qa in tan Lázaro, kb'anteltzun.

¹³Ex tma Jesús jlu ti'j Lázaro qa otoq kyim; atzun kye t-xnaq'tzb'en ela tuj kynab'l qa in yolin Jesús ti'j ojlab'l tu'n watl.

¹⁴Xitzun tma'n Jesús clarxix kye: —Ma kyim Lázaro.

¹⁵Ex in chin tzalaje tu'nju mya ax atine tej xkyim, ex mas b'a'n te kyeye tu'ntzun kyokslane wi'je; ex qo'tzun jatum ta'.

¹⁶Xitzun tma'n Tomás kye txqantl xnaq'tzb'en: —Ax ikx qe, qo'qe tu'n qkyim tuk'il, chi Tomás, aju yo'ẍ tb'i kyu'n xjal.

¹⁷Pontzun Jesús ex o tb'i otoq b'ant kyaje q'ij tku'xlen maqu'n Lázaro.

¹⁸Niqayin t-xol tnam Betania tuk'il Jerusalén, b'alo ox kilómetro kyxol.

¹⁹Ex nimku xjal judiy otoq che ul tuk'il Marta ex tuk'il Mariy, e ul q'uqb'alte kyk'u'j tu'n tlaj otoq kyim kyxib'an.

²⁰Tejtzun tb'inte Marta kyja' t-xi' Jesús, etz kanul ti'j; atzunte Mariy kyaj ten tuja.

²¹Xitzun tma'n Marta te Jesús: —Tat, noqwit ata tzalu, miwtlo o kyim nxib'ane.

²²Ex b'a'n wu'ne ja'lo, tkyaqilju kxel tqanina te Dios ktzajel tq'o'n Dios teya.

²³Xitzun tma'n Jesús te: —Kjawil anq'in t-xib'ana.

²⁴Xi tma'n Marta te: —B'a'n wu'ne kjawil anq'in ok kyjaw anq'in kyimni tuj mankb'il tq'ijlalil.

²⁵Xitzun tma'n Jesús te: —Aqine q'olte anq'ib'l ex aqine q'ol chwinqlal; alkye ma tz'okslan wi'je, maske qa ma kyim, ok k'anq'il.

²⁶Ex qe xjal itz'xqe, qa ma che okslan wi'je mlay che kyim te jumajx. ¿Mape tokslaya jlu? Chi Jesús.

²⁷Xi tma'n Marta te: —Ma txi woksla'ne, Tat; ma wokslaye aya ju Crist aju at toklen tu'n Dios, ex aya Tk'wa'l Dios ma tzula twitz tx'otx'.

²⁸Tej tb'aj tma'n Marta jlu, xi' txkolte Mariy aju titz'in, cheb'a xi tjask'u'n te: —Ma tzul Xnaq'tzal ex in txkonjtza tu'n, chi Marta.

²⁹Tej tb'inte Mariy jlu, jaw we' naj ex ul tuk'il Jesús.

³⁰Na'nxtoq tokx Jesús tuj tnam; ax ta'toq jatum ul Marta kanul ti'j.

³¹Atzun kye xjal judiy, aqeju otoq che pon tja Mariy q'uqb'alte tk'u'j, tej kylonte otoq jaw we' naj Mariy ex otoq tz'etz, e ok lpe' ti'j, ex kyma: Ma txi' oq'el ttzi pantyón, che chi.

³²Tejtzun tkanun Mariy jatum ta'toq Jesús ex tej tke'yinte, kub' ẍmeje' t-xe tqan Jesús ex tma: —Tat, noqwit ax ta'ya tzalu miwtlo o kyim nxib'ane.

³³Tej tke'yinte Jesús in oq' Mariy ex kyuk'ix qe xjal judiy in che oq', aqeju e tzaj tuk'il, tzaj ta'w tuj tanmi tu'n tb'is,

³⁴ex xi tqanin kye: —¿Jatum okx kyq'o'ne? Xitzun kyma'n te Jesús: —Tat, qo' ke'yilte.

³⁵Jawtzun oq' Jesús.

³⁶Kymatzun qe xjal judiy: —Nimxix tk'ujlalil Jesús ti'j.

³⁷Ex at junjun kyxol kyma: —Ate xjal lu jaqonte twitz moẍ, ¿tiqu'ntzun minti' xb'ant tu'n tu'n mi'n tkyim Lázaro?

³⁸Tzajxix tb'is Jesús juntl maj, ex pon jatum tokx kyimni. Tokx tuj jun jul tok jun ab'j ttzi'.

³⁹Xitzun tma'n Jesús kye: —Kyi'mele aju ab'j. Atzunte Marta, aju tanb' qtzan Lázaro, xi tma'n te Jesús: —Tat, ma tzuwix, porke ma b'ant-xi kyaje q'ij tku'xlen maqut.

⁴⁰Ex xi tma'n Jesús te: —¿Myapetzun ma txi nma'ne teya, qa ma tokslaya ok tila'ya tipumal Dios? Chi Jesús te.

⁴¹Eltzun kyi'n aju ab'j [jatum otoq tz'okx q'o'n kyimni.] Ex jaw tke'yin Jesús twitz kya'j, ex tma: —Tat, kxel nq'o'ne chjonte teya porke ma chin tzaj tb'i'na.

⁴²B'a'n wu'ne kukx in chin tzaj tb'i'na, ex ma txi nma'ne jlu tu'n kylaj nimku xjal ate' ntxlaje, tu'ntzun t-xi kyoksla'n qa aya ma tzaj samante weye.

⁴³Tejtzun tb'aj tma'n Jesús jlu, jaw tq'ajq'ajel twi' kyuwxix, tma: —Tetza, Lázaro.

⁴⁴Etztzun aju otoq kyim, b'alq'i'ntoq tq'ab' tu'n xb'alun tuk'ix tqan, ex potzin twitz tu'n jun k'alb'il. Xitzun tma'n Jesús kye xjal: —Kypaju'mele ex kytzoqpinxe.

⁴⁵Nimku xjal judiy otoq che ul tuk'il Mariy. Tej kylonte aju tb'incha Jesús, nim e okslan ti'j.

⁴⁶Ex at junjun kyxol e je'x kyuk'il fariseo ex xi kyma'n aju otoq tb'incha Jesús.

⁴⁷Atzun kye nejenel kye pal ex qe fariseo ok kychmo'n qe Aj Sanjelal kye xjal judiy ex kyma: —¿Alkye kb'antel qu'n? Porke ate xjal lu nimku señ in b'ant tu'n.

⁴⁸Qa kukx ma kyaj qq'o'n ikju, kykyaqil xjal che okslal ti'j; che ultzun qe aj sanjelal aj Roma, ex kb'ajel kyxitun tja Dios tuk'ix qtanmi, che chi.

⁴⁹Ex at jun xjal kyxol, Caipás tb'i, toktoq nejenel kye pal tuj ab'q'i tej tkub' b'yo'n Jesús, xi tma'n kye: —Kyeye minti' kynab'le;

⁵⁰ex minti' nne'l kynik'e ti'j; mas b'a'n tu'n tkyim jun xjal te kyxel kykyaqil xjal ex mya tu'n kynaj kykyaqil xjal tuj nasyon lu, chi Caipás.

⁵¹Mya noq tu'nx Caipás o tma jlu; ate Dios o q'mante tuj tnab'l tu'nju toktoq te nejenel kye pal tuj ab'q'i lu, kyja'tzun tzaj tma'n naj qa ate Jesús tu'n tkyim te t-xel enter jun tnam xjal, aqeju xjal judiy;

⁵²ex mya noq o'kx tu'n tkyim te t-xel enter tnam, ax ikx tu'n kytzaj chmo'n qe Tk'wa'l Dios tu'n kyten junx, aqeju otoq che el sputj.

⁵³Kyja'tzun, atxixtzun tuj q'ij lu b'ant ti'j kyu'n aj sanjelal kye xjal judiy tu'n tkub' kyb'yo'n.

⁵⁴Kyja'tzun minti'tl o ten Jesús kyxol xjal judiy, ik' laq'e', pon tuj jun tnam Efraín tb'i, niqayin ttxlaj lugar minti' kynajb'il xjal tuj; ex axtzun o ten kyuk'ix qe t-xnaq'tzb'en.

⁵⁵Ch'ixtoq tul kanun ninq'ij kye xjal judiy, aju Xjan Q'ij tb'i; ex nimku xjal e tzaj tuj kojb'il e ja'wil tuj Jerusalén tu'n kytx'jonte kyib' ik tza'nx in tma'n kyley, akux na'nxtoq tul kanun Xjan Q'ij.

⁵⁶Ex in che jyon ti'j Jesús, ex in che qanin ti'j kyxolx tuj tja Dios, in kyma'n: —¿Chi tok kyu'ne? ¿Mi'npelo tzul tuj ninq'ij? Che chi.

⁵⁷Qe nejenel kye pal ex qe fariseo otoq tz'etz jun orden kyu'n, qa at jun xjal ma tb'i jatum ta' Jesús, b'a'n tu'n tpon naj tqanil tu'n, tu'ntzun ttzyet Jesús kyu'n.