Read kumam Juan 12 Bible Online

Juan 12 - kumam bible

Juan 12

¹Atxtoq qaq q'ij taj tu'n tul kanun Xjan Q'ij, ultzun Jesús tuj tnam Betania jatum ta' Lázaro, aju otoq kyim ex o jatz anq'in kyxol kyimni tu'n Jesús.

²B'ajtzun kyb'incha'n jun nintz wa'n te Jesús; ate Marta ok ten sipal wab'j; atzunte Lázaro ajun kyxol qeju q'uql qe'toq ti'j mes tuk'il Jesús.

³Atzunte Mariy tzaj ti'n mij botey perjum nardo tb'i mya smo'n twitz, wi'yilxix, ok tqo'n ti'j tqan Jesús, ex b'aj t-su'n tu'n ttzmal twi'; ex o noj tuja tu'n tk'ok'jal perjum.

⁴Ex at jun t-xnaq'tzb'en Jesús Judas Iscariote tb'i, [tk'wa'l Simón] aju at tu'n t-xi q'onte Jesús tuj kyq'ab' xjal. Tmatzun Judas:

⁵¿Tiqu'n minti' xi k'ayit ju perjum lu tu'n ox syent denari pwaq ex aju pwaq lu tu'n t-xi q'ot kye meb'a?

⁶Ex tma jlu mya tu'nju atwit tk'u'j kyi'j meb'a, noq o'kx tu'nju eleq'toq ex atzun q'ilte tkub'il pwaq, ex in jatz telq'a'n pwaq tuj ch'u'ẍ.

⁷Tzajtzun tma'n Jesús: —Mi'n lab'ta ti'j; porke k'u'ntoq perjum lu tu'n, tu'n tajb'en tuj tq'ijlalil ok nku'x maqu'ne.

⁸Porke qe meb'a kukx che tel kyuk'ile, atzun weye mya kukx chin tele kyuk'ile, chi Jesús te.

⁹Nimku xjal judiy o kyb'i qa atzun ta'toq Jesús tuj Betania, e tzajtzun mya noq o'kx tu'n tlaj Jesús, ax ikx tu'n kyke'yinte Lázaro, aju otoq jatz anq'in kyxol kyimni tu'n Jesús.

¹⁰Atzun kye nejenel kye pal b'ant ti'j kyu'n, tu'n tuk'ix te Lázaro tu'n tkub' b'yet,

¹¹porke tu'n tlaj Lázaro nimku xjal judiy nib'antoq tel kypa'n kyib' kyi'j nejenel kye pal ex e okslan ti'j Jesús.

¹²Nimku xjal otoq che ul tuj ninq'ij te Xjan Q'ij. Texi juntl q'ij o kyb'i qa kyja' ttzaj Jesús tu'n tul tuj Jerusalén.

¹³Tzajtzun kyi'n tq'ab' xa'j, e je'x kanul ti'j Jesús, jaw tq'ajq'ajel kywi' ex kyma: —Nimanxwit tb'i Dios. Ky'iwla'n teju tzul, aju Rey kye aj Israel, tu'n Qman ma tzaj sama'n, che chi.

¹⁴Knettzun jun tal bur tu'n Jesús ex jax tib'aj, ik tza'n in tma'n tuj Tu'jil:

¹⁵Mi'n che xob'e, aqeye ate'ye tuj tnam Sión; lu tzul Kyreye, tjax tib'aj jun tal bur, chi tuj Tu'jil.

¹⁶Nej minti' el kynik' t-xnaq'tzb'en ti'j jlu; ex tej taj q'i'n Jesús tuj kya'j, tzajtzun kyna'n qa tz'ib'amaj tkyaqil jlu ti'j ex ti'j ju otoq b'inchanjtz ti'j kyu'n xjal.

¹⁷Atzun qe xjal, aqeju e ten tuk'il Jesús tej tetz txko'n Lázaro tu'n tuj jul ex jaw anq'in kyxol kyimni, xi kytx'olb'a'n kye txqantl aju otoq tb'incha Jesús.

¹⁸Kyja'tzun tten otoq che ex xjal kanul ti'j Jesús, tu'nju otoq kyb'i ti'j ju señ otoq tb'incha Jesús.

¹⁹Atzun kye fariseo kyma kyxolx: —Matzun kyile minti' ch'in ma qkamb'a'. Kyke'yinxe, kykyaqil xjal ma che'x lpe' ti'j.

²⁰At junjun xjal griego otoq che ja'wil kyuk'il txqantl xjal k'ulul tuj ninq'ij.

²¹E pon laq'e' qe jlu ttxlaj Felipe ex e kub'san twitz: —Tat, qajb'ile tu'n tqile Jesús, che chi. Ate Felipe aj Betsaida aju tnam ta' tuj tx'otx' Galilea.

²²Xi'tzun Felipe ex xi tma'n te Andrés; atzunte Andrés tuk'ix Felipe xi kyma'n te Jesús.

²³Xitzun ttzaq'we'n Jesús: —Ma pon tq'ijlalil tu'n njaw nimsa'ne, aqine sk'o'maj qine tu'n Dios tu'n ntene kyuk'il xjal.

²⁴Ax tok kxel nma'ne kyeye, aju twitz triw qa minti' ma ku'x maqu'n tuj tx'otx', junxte kyjel ten, mlay poq'l; qatzun ma ku'x maqu'n, nim twitz k'okel.

²⁵Alkye jun xjal o'kx tok tk'u'j ti'j tchwinqlal twitz tx'otx', mlay tkamb'a aju chwinqlal in tzaj tq'o'n Dios; ex alkye jun xjal nne'l tik'un tchwinqlal tzalu twitz tx'otx', ok tkamb'a' aju chwinqlal in tzaj tq'o'n Dios tu'n tten tchwinqlal te jumajx.

²⁶Qa at jun xjal taj tu'n tajb'en weye, lpe'k wi'je; jatum chin tele axtzun ktel aju in ajb'en weye. Qa at jun ma tz'ajb'en weye, ok kjawil nimsa'n tu'n Nmane.

²⁷Ma naj nnab'le ja'lo; ¿ex alkye kxel nma'ne? ¿Okpe kxel nma'ne kyja': Tat, chin tkloma tu'n mi'n tik'x wu'ne? Mi'n, porke ma chin ule tu'n tik'x wu'ne.

²⁸Tat, nimsa'nktz tb'iya. Tzajtzun jun tq'ajq'ajel tuj kya'j, ex tma: —Ma jaw nnimsa'ne, ex kjawil nnimsa'ntle juntl maj.

²⁹Atzun qe xjal ax ate'toq, tej kyb'inte tq'ajq'ajel, kyma qa jun q'ankyoq o q'ajt. Ex at junjuntl kyma: —Jun anjel ma yolin tuk'il, che chi.

³⁰Xi ttzaq'we'n Jesús: —Mya tu'n nlaje ma tzaj tq'ajq'ajel lu, noq o'kx tu'n kylaje.

³¹Ja'lo tq'ijlalil tu'n tkub' kysentens xjal twitz tx'otx'; ex aju nejenel at twitz tx'otx' k'elex lajo'n ja'lo.

³²Qa ma chin jaw q'i'ne twitz tx'otx', che tzajel wi'ne kykyaqil xjal tu'n kyten wuk'ile.

³³Tma Jesús jlu tu'n tel kynik' xjal ti'j tza'n tten tu'n tkyim.

³⁴Xitzun kyma'n xjal te: —B'a'n qu'ne aju in tma'n tuj Tu'jil ley, ate Crist aju at toklen tu'n Dios, kukx ktel te jumajx. ¿Tza'ntzun tten in tma'na qa il ti'j tu'n tjaw q'i'n twitz tx'otx' aju xjal sk'o'maj tu'n Dios tu'n tten kyuk'il xjal? ¿Alkyetzun ju xjal sk'o'maj tu'n Dios?

³⁵Xitzun tma'n Jesús kye: —Noq ch'intl ktel ju spik'un kyxole; che b'ete akux atx spik'un kyuk'ile, tu'ntzun mi'n tkanun naj qlolj kyi'je; porke aju xjal in b'et tuj qlolj, minti' b'a'n tu'n tza'n t-xi'.

³⁶Che okslantzune ti'j ju spik'un akux atx kyuk'ile, tu'ntzun kyoke jun xjal ik tza'n spik'un, chi Jesús. Atzun jlu tma Jesús ex ik'tzun, xi tewan tib' kywitz xjal.

³⁷Maske nim señ b'ant tu'n Jesús kywitz xjal, pero minti' e okslan ti'j.

³⁸Kyja'tzun japun tyol Isaías aju t-sanjel Dios. Chi Isaías: Tat, ¿mape txi kyoksla'n xjal qpakb'ab'le? Ex ¿mape pon kynab'l xjal ti'j tipumal Qman? Chi tuj Tu'jil.

³⁹Kyja'tzun minti' tumel tu'n t-xi kyoksla'n, tu'nju at juntl yol o tma Isaías, chi kyja':

⁴⁰Kub' moẍix kywitz tu'n Dios, ex kyuwix kyanmi tu'n, tu'ntzun mi'n tok kyke'yin tu'n kywitz, ex tu'n mi'n tel kynik' ti'j tuj kyanmi, ex tu'n mi'n kyajtz meltz'aj tu'n kyb'anix wu'ne, chi tuj Tu'jil.

⁴¹O tma Isaías jlu porke o til tajwalil Jesús, ex o yolin ti'j.

⁴²Maske ikju, pero nimku xjal judiy e okslan ti'j Jesús, ex kyuk'ix junjun nejenel kyxol e okslan; ex minti' xi kyma'n kye xjal tu'n tlaj in che xob' kywitz fariseo, tu'ntzun mi'n kyetz lajo'n tuj ja te k'ulb'il.

⁴³Ex mas o kyajb'e tu'n kyk'monte nimb'il kye kyu'n xjal, twitzju tu'n kyk'monte nimb'il kye tu'n Dios.

⁴⁴Jaw tq'ajq'ajel twi' Jesús ex tma: —Alkye ma tz'okslan wi'je, mya o'kx wi'je in okslan, ax ikx in okslan ti'j ju tzaj samante weye.

⁴⁵Ex alkye ma ke'yinte weye, ax ikx in tke'yin aju tzaj samante weye.

⁴⁶Aqine ma chin ule te spik'un kyxol xjal, tu'ntzun mi'n kyten tuj qlolj kykyaqil qeju ma che okslan wi'je.

⁴⁷Ex qa at jun xjal ma b'inte nyole ex qa minti' ma japun tu'n, mya wu'ne kb'el t-sentens; porke minti' ma chin ule tu'n tkub' kysentens xjal, noq o'kx tu'n kyklet xjal.

⁴⁸Alkye ma tz'el ik'unte weye ex minti' ma che'x tb'i'n qe nyole, at jun kb'el q'onte t-sentens; aju yol ma txi nma'ne, atzunju kb'el q'onte t-sentens xjal tuj mankb'il tq'ijlalil.

⁴⁹Porke mya wexwe nyol ma txi nma'ne; ate Nmane tzaj samante weye, ex ma tzaj tma'n weye alkye tu'n t-xi nma'ne ex tza'n tten tu'n nyoline.

⁵⁰Ex b'a'n wu'ne aju tmandamyent Nmane in tq'o'n chwinqlal te jumajx. Kyja'tzun, aju yol in xi nma'ne ikx tten ik tza'n tzaj q'ma'n weye tu'n Nmane, chi Jesús kye.