Read kumam Juan 14 Bible Online

Juan 14 - kumam bible

Juan 14

¹Mi'n b'aj kyk'u'je; qe'k kyk'u'je ti'j Dios, ax ikx qe'k kyk'u'je wi'je.

²Tuj tja Nmane at nimku najb'il; noqwit minti', mawtlo txi nma'ne kyeye; chin xe'ltzune tu'n tb'aj nb'incha'ne jun najb'il kyeye.

³Ok nxi'ye ex ok tb'aj nb'incha'ne jun kynajb'ile, chin ule juntl maj ex che xel wi'ne wuk'ile tu'ntzun kytene wuk'ile jatum chin tele.

⁴Ex b'a'n kyu'ne jatum chin xe'le, ex ojtzqi'n b'e kyu'ne, chi Jesús.

⁵Xitzun tma'n Tomás te: —Tat, minti' b'a'n qu'ne jatum kxe'la, ¿tza'ntzun tten tu'n tel qnik'e ti'j ju b'e?

⁶Xi ttzaq'we'n Jesús: —Aqine ju b'e, aqine ju yol axix tok, ex aqine q'ol chwinqlal; mi a'l jun xjal jaku pon tuk'il Dios Mamb'aj, qa mya wu'ne.

⁷Noqwit ma tz'el kynik'e wi'je, mawtlo tz'el kynik'e ti'j Nmane; atzun ja'lo ma tz'el kynik'e ti'j ex ma kyile.

⁸Xitzun tma'n Felipe te Jesús: —Tat, yek'untza Dios Mamb'aj qeye, ex akuxtzunju.

⁹Xi ttzaq'we'n Jesús: —¿Maj na'nx tel tnik'a wi'je, Felipe? Ex ma chin tene nim q'ij kyuk'ile. Alkye ma chin ilwaje tu'n, ma ilwaj Dios Mamb'aj tu'n. ¿Tza'ntzun tten in tzaj tma'na tu'n t-xi nyek'une Dios Mamb'aj kyeye?

¹⁰¿Maj minti' in xi toksla'na qa aqine tuk'il Nmane ex a Nmane wuk'ile? Aju yol in xi nma'ne kyeye, mya wexwe nyol, noq o'kx ate Nmane najl wuk'ile, axtzunju in b'inchante taq'un.

¹¹Kyokslame nyole, aqine tuk'il Nmane ex at Nmane wuk'ile; qatzun mi'n kyaje tu'n t-xi kyoksla'ne nyole, ex kuchiwt tu'n t-xi kyoksla'ne tu'nju nno'k kyke'yine nb'inchb'ene.

¹²Ax tok kxel nma'ne kyeye, alkye ma tz'okslan wi'je, ax aq'untl ok tb'incha' ik tza'n in nb'incha'ne; ex mas nim aq'untl ok tb'incha' kywitz qe jlu, porke aqine ma chinxe tuk'il Nmane.

¹³Ex tkyaqilju kxel kyqanine te Nmane tu'nju okslal qeye wi'je, ok nb'incha'ye kyeye tu'ntzun tjaw nimsa'n tb'i Nmane ti'j ju ok nb'incha'ye kyeye, aqine Tk'wa'l.

¹⁴Qa at jun ti'xti ma txi kyqanine tu'nju okslal qeye wi'je, ok nb'incha'ye kyeye.

¹⁵Qa in chin kyk'ujla'ne, che japunx qe nmandamyente kyu'ne.

¹⁶Ex aqine chin kub'sal twitz Nmane, ktzajeltzun tq'o'n Nmane juntl onil kyeye ex q'uqb'alte kyk'u'je tu'n tten kyuk'ile te jumajx.

¹⁷Aju onil kyeye ex q'uqb'alte kyk'u'je, atzunju Xewb'aj Xjan, aju chik'b'alte ju axix tok. Mlay b'ant tu'n tk'monjtz kyu'n xjal, porke minti' nno'k kyke'yin, ex minti' ojtzqi'n kyu'n; atzun kyeye ojtzqi'n kyu'ne, ex ax najl kyuk'ile ex ax ktel tuj kyanmiye.

¹⁸Mlay che kyaj nq'o'ne meb'a; chin ultle kyuk'ile.

¹⁹Noq ch'intl chin tele ja'lo, ex mlay chin ok ke'yintle kyu'n xjal; atzun kyeye chin okel kyke'yine; ex tu'nju kukx chin anq'ile, ax ikx kyeye che anq'ile.

²⁰Tuj tq'ijlalil tzul k'elel kynik'e ti'j qa atine tuk'il Nmane, ex ate'ye wuk'ile, ex atine kyuk'ile.

²¹Aju xjal at qe nmandamyente tuk'il ex in che japun tu'n, atzunju in chin k'ujlanjtze tu'n; ex aju xjal in chin k'ujlanjtze tu'n, ok kk'ujlanjtzel tu'n Nmane, ax ikx weye ok nk'ujla'ye, ex kxel nyek'un wib'e te, chi Jesús xi tma'n kye.

²²Xitzun tma'n Judas te (mya aju Iscariote): —Tat, ¿tza'ntzun tten noq o'kx qeye ktzajel tyek'un tib'a, ex mya kye kykyaqil xjal?

²³Xi ttzaq'we'n Jesús: —Aju xjal in k'ujlante weye, kxel tniman nyole; ex ok kk'ujlanjtzel tu'n Nmane, qo ule tuk'il, ex qo najale tuk'il.

²⁴Ex alkye jun xjal minti' in chin k'ujlanjtze tu'n, minti' in xi tniman nyole; ex aju yol ma kyb'iye, mya weye; tete Nmane aju tzaj samante weye.

²⁵A jlu ma txi nma'ne kyeye atinxe kyuk'ile.

²⁶Atzunju onil kyeye ex q'uqb'al kyk'u'je, aju Xewb'aj Xjan, aju ktzajel t-sama'n Nmane te nxele, atzunju kq'olte xnaq'tzb'il kyeye ti'j tkyaqil, ex ok tma' tu'n ttzaj kyna'ne tkyaqilju ma txi nma'ne kyeye.

²⁷Che kyjel nkawine tuj cheb'a tu'n tqe' kyk'u'je; kyjel nq'uqb'a'ne kyk'u'je, ex mya ik tten q'uqb'ab'l kyk'u'je kxel nq'o'ne ik tza'n kye xjal in kyq'o'n. Kyja'tzun mi'n b'aj kyk'u'je ex mi'n che xob'e.

²⁸Ma kyb'iye aju ma txi nma'ne kyeye: Chin xe'le ex chin ule juntl maj kyuk'ile. Noqwit k'ujla'n qine kyu'ne, mawtlo che tzalaje tu'nju ma txi nma'ne ma chinxe tuk'il Nmane; porke ate Nmane mas at toklen nwitze.

²⁹Ma txi nma'ne kyeye ja'lo na'nxtoq tjapun, tu'ntzun t-xi kyoksla'ne ok tjapun.

³⁰Mya nimtl yol tu'n t-xi nma'ne kyeye porke tzul ju nejenel, aju in kawin kyib'aj kykyaqil xjal twitz tx'otx'. Minti' toklen wi'je,

³¹ex il ti'j tu'n tel kynik' kykyaqil xjal ti'j qa k'ujla'n Nmane wu'ne, ex in nb'incha'ne ik tza'nx tzaj tma'n Nmane weye. Che we'ktze, qo ik' tzalu.