Read kumam Juan 15 Bible Online

Juan 15 - kumam bible

Juan 15

¹Aqine tqan uva axix tok, atzun Nmane atzun aq'nal ti'j.

²Tkyaqil tq'ab' uva tok wi'je qa minti' twitz, k'elel ttx'emin; ex tkyaqilju tq'ab' uva at twitz, k'elel ti'n ttzqijil ti'j tu'ntzun tok txqantl twitz.

³Atzun kyeye ma tz'el b'aj ttzqijil kyi'je tu'nju yol ma txi nma'ne kyeye.

⁴Che tenkje wuk'ile ex aqine kyuk'ile. Ik tza'n jun tq'ab' uva mlay tz'ok twitz tu'nx tib' qa mya tok ti'j tqan uva; ikxtzun kyeye mlay tz'ok kywitze qa minti' ẍe kyaj tene wuk'ile.

⁵Aqine tqan uva, atzun kyeye tq'ab' uva qeye; alkye ax tok wi'je ex tok qine ti'j, atzunju nim twitz k'okel. Qatzun kypa'n kyib'e wi'je, minti' kb'antel kyu'ne.

⁶Alkye minti' ma kyaj ten wuk'ile, k'elex xo'n ex ktzqijel ik tza'n qe tq'ab' uva in tzaj kyi'n xjal ex nno'kx kyq'o'n tuj q'aq' tu'n kyb'aj tz'e'y.

⁷Qa ma che kyaj tene wuk'ile, ex qa ma kyaj ten nyole tuj kyanmiye, kyqaninxe tkyaqil alkye kyajb'ile, ex ktzajel q'o'n kyeye.

⁸Tu'ntzun jlu kjawil nimsa'n Nmane qa ma tz'ok nim kywitze, ex kyja'tzun tten tu'n kyoke te nxnaq'tzb'ene.

⁹Ik tza'n te Nmane ma chin k'ujlanjtze tu'n, ikxtzun kyeye ma che nk'ujlaye. Ax che tenkje tuj nk'ujlalile.

¹⁰Qa ma che japun qe nmandamyente kyu'ne, kukx ktel nk'ujlalile kyi'je; ik tza'n weye ma che japun qe tmandamyent Nmane wu'ne ex kukx ma ten tk'ujlalil wi'je.

¹¹Tkyaqil jlu ma txi nma'ne kyeye tu'ntzun kytzalaje junx wuk'ile ex tu'n kytzalaje nimxix.

¹²Atzun nmandamyente jlu: Tu'n kyk'ujlante kyib'e kyxolxe, ik tza'n weye ma che nk'ujlaye.

¹³Qa at jun xjal ma txi tq'on tib' tu'n tkyim tu'n kyklet qe tamiw, mas ma' tk'ujlalil, mlay pon tk'ujlalil juntl ik tza'n jlu.

¹⁴Aqeye che okele te wamiwoye qa ma kyb'inchaye aju kxel nma'ne kyeye.

¹⁵Mlay tz'ok nq'o'ntle kyb'iye majen, porke aju majen minti' b'a'n tu'n aju in tb'incha'n tpatrón; atzun kyeye ma tz'ok nq'o'ne kyb'iye te wamiwoye, ex tkyaqilju o nb'iye te Nmane, o txi ntx'olb'a'ne kyeye.

¹⁶Mya aqeye e jaw sk'onte weye; noq o'kx aqine ẍin jaw sk'onte kyeye ex ma tz'ok nq'o'ne kyoklene tu'n kyxi'ye aq'nal, ex tu'n tok kywitze ex kukx tu'n tten kywitze ik tza'n jun wi' uva at nim twitz, tu'ntzun ttzaj tq'o'n Nmane kyeye tkyaqilju kxel kyqanine te, tu'nju okslal qeye wi'je.

¹⁷Atzun jlu kxel nma'ne kyeye: Tu'n kyk'ujlante kyib'e kyxolxe.

¹⁸Qa ma che el ik'une kyu'n xjal, tz'elx kynik'e ti'j, nej ma chin el ik'une kyu'n xjal kywitze.

¹⁹Noqwit te twitz tx'otx' qeye, mawtlo che k'ujlanjtze kyu'n xjal ik tza'n in che k'ujlanjtz qe kyuk'il kyu'n, ex ja'lo ma che jaw nsk'o'ne kyxol xjal, tu'ntzunju ma che el ik'une kyu'n, porke mya te twitz tx'otx' qeye.

²⁰Kyna'ntze aju yol xi nma'ne kyeye: Aju majen mya mas nim toklen twitz tpatrón nchitzune. Qa ma chin yajlanjtze kyu'n xjal, ax ikx kyeye che yajlanjtzele kyu'n; ex qa ma txi kyniman xjal nyole, ax ikx kyeye kxel niman kyyole kyu'n.

²¹Tkyaqil jlu ok kyb'incha' xjal kyi'je tu'n tlaj okslal qeye wi'je, porke minti' ojtzqi'n kyu'n aju tzaj samante weye.

²²Noqwit minti' ma chin ule ex noqwit minti' ma chin yoline kyuk'il, minti'wtlo kyil; atzun ja'lo minti' kykolb'il kyib' ti'j kyil.

²³Alkye ma tz'el ik'unte weye, ax ikx nne'l ik'un Nmane tu'n.

²⁴Noqwit minti' o nb'inchaye aq'untl kyxol, aju minti' o b'ant tu'n juntl xjal, minti'wtlo kyil; atzun ja'lo ma kyil waq'unb'ene ex ma chin el ik'une kyu'n, tuk'ix Nmane.

²⁵In kyb'incha'n jlu tu'ntzun tjapun aju yol tz'ib'amaj tuj kyley, chi in tma'n: Noqx gan ma chin el ik'une kyu'n, chi tuj Tu'jil.

²⁶Oktzun tul ju Onil kyeye ex Q'uqb'alte kyk'u'je, aju ktzajel nsama'ne, aju ktzajel tuk'il Nmane, ktzajel tma'n ju axix tok wi'je. Atzun jlu aju Xewb'aj Xjan, aju chik'b'alte ju axix tok, atzun in tzaj tuk'il Nmane.

²⁷Ax ikx kyeye kxel kychik'b'a'ne ax tok wi'je, porke ma che tene wuk'ile atxix t-xe tnejel.