Read kumam Juan 2 Bible Online

Juan 2 - kumam bible

Juan 2

¹Tuj toxin q'ij b'ant jun mejeb'le'n tuj tnam Caná tuj tx'otx' Galilea; ex otoq pon ttxu' Jesús.

²Ax ikx te Jesús o txkonjtz tuj mejeb'le'n kyuk'ix qe t-xnaq'tzb'en.

³Ex tej tkub' b'aj kyk'a' xjal vin, xi tma'n ttxu' Jesús te: —Minti'tl kyvin xjal.

⁴Ex xi tma'n Jesús te: —¿Tiqu'n in tzaj tma'na jlu weye, nan? Na'nx tpon tq'ijlalil tu'n t-xi nyek'une kye xjal alkye qine.

⁵Ex xi tma'n ttxu' kye qeju in che sipan k'ab'j: —Kyb'inchame tkyaqilju ktzajel tma'n kyeye.

⁶Ex attoq qaq ab'j b'incha'maj ik tza'n ẍoq' tkub'il a' te tx'ajb'il kye xjal judiy ik tza'nx kyley; tuj junjun tkub'il a' in xi' jwe' ẍoq' a' tuj ex qa wuq.

⁷Ex xi tma'n Jesús kye qeju in che sipan k'ab'j: —Kynojsame qe ẍoq' lu tu'n a'. Ex e b'aj noj kyu'n.

⁸Ex xi tma'ntl kye: —Kyi'ntze ch'in ja'lo, ex kyi'nxe teju nejenel kye sipal k'ab'j. Xitzun kyi'n.

⁹Atzunte nejenel kye sipal k'ab'j xi tnik'b'e'n ju a' otoq tz'ok te vin, minti' b'a'n tu'n jatum otoq tzaj, atzun kye sipal k'ab'j b'a'n kyu'n jatum otoq jatz kyi'n ju a'. Tzajtzun ttxko'n nejenel ju chmilb'aj,

¹⁰ex xi tma'n te: —Kykyaqil xjal nej in tzaj kyq'o'n aju vin b'a'n; oktzun kyb'aj k'an qeju otoq che txkonjtz tuj mejeb'le'n, in tzajtzun kyq'o'n aju vin myaxix b'a'n; atzun teya ma txi tk'u'na aju vin b'a'n te ja'lo, chi nejenel.

¹¹Atzun tnejel señ jlu b'ant tu'n Jesús, o tb'incha tuj tnam Caná tuj tx'otx' Galilea, ex xi tyek'un Jesús tipumal; ex e okslan qe t-xnaq'tzb'en ti'j.

¹²Tb'ajlenxitzun jlu xi' Jesús tuj tnam Capernaum, tuk'ix ttxu', kyuk'ix qe terman ex qe t-xnaq'tzb'en; ex axtzun e ten mya nim q'ij.

¹³Chixtoq tul kanun aju ninq'ij kye xjal judiy, aju Xjan Q'ij tb'i; jaxtzun Jesús tuj Jerusalén,

¹⁴ex ok noj kyi'j xjal tuj ttxa'n tpe'n tja Dios, in che k'ayin boys, ex in che k'ayin ẍne'l tuk'ix paloma, ex kyuk'ix qe ch'expul twitz pwaq q'uql qe'toq.

¹⁵Tej tlonte Jesús jlu, b'aj tb'incha'n jun asyal ky'jaj, ex e je'tz tlajo'n kykyaqil tuj ttxa'n tpe'n tja Dios, kyuk'ix qe kyẍne'l ex qe kyboys; ex b'aj tchitun kypwaq qe ch'expul twitz pwaq, ex e jaw tpich'q'u'n qe kymes.

¹⁶Ex xi tma'n kye qeju in che k'ayin paloma: —Kyi'n exe jlu tzalu, ex mi'n tz'ok kyq'o'ne tja Nmane ja te k'ayb'il.

¹⁷Tzajtzun kyna'n qe t-xnaq'tzb'en aju yol in tma'n tuj Tu'jil kyja': Ma tzaj ta'w tuj wanmiye tu'n tlaj at nk'u'je ti'j tjaya, chi tuj Tu'jil.

¹⁸Xitzun kyma'n qe xjal judiy te Jesús: —¿Alkyetzun señ ktzajel tyek'una qeye tu'nju in tb'incha'na jlu? Che chi.

¹⁹Xi ttzaq'we'n Jesús: —Kyxitunkuye aju tja Dios lu, ex tuj ox q'ij kjawil nb'incha'ne juntl maj.

²⁰Xitzun kyma'n xjal judiy te: Tuj 46 ab'q'i o b'ant tja Dios lu, ¿atzun teya tuj ox q'ij tu'n tjaw tb'incha'na? Che chi te Jesús.

²¹Ex o yolin Jesús ti'j t-ximlalx, qa a t-ximlal tja Dios.

²²Kyja'tzun, tej tjatz anq'in Jesús kyxol kyimni, ul ti'j kyk'u'j qe t-xnaq'tzb'en qa otoq tma jlu; xi kyoksla'n aju in tma'n tuj Tu'jil ex aju yol otoq tma Jesús kye.

²³Attoq Jesús tuj Jerusalén tuj ju ninq'ij Xjan Q'ij tb'i, ex nimku xjal e okslan ti'j tej kylonte in che b'ant qe señ tu'n.

²⁴Ex minti' ok qe' tk'u'j Jesús kyi'j xjal, porke el tnik' kyi'j kykyaqil,

²⁵ex mya il ti'j tu'n ttzaj q'ma'n te tza'n kyten xjal, porke ojtzqi'n tu'n alkye kyximb'etz xjal tuj kyanmi.