Read kumam Juan 20 Bible Online

Juan 20 - kumam bible

Juan 20

¹Tuj tnejel q'ij te seman xi' Mariy aj Magdala ttzi pantyón primxix wen atxtoq qwitz; ex o til otoq tz'el q'i'n ab'j ttzi pantyón.

²Ajtztzun qelan ex ul tuk'il Simón Pedro ex tuk'il juntl xnaq'tzb'en aju k'ujla'nxix tu'n Jesús, ex xi tma'n kye: —Ma tz'etz q'i'n t-ximlal Qajaw tuj pantyón, ex minti' b'a'n qu'ne jatum ma pon q'o'n, chi Mariy.

³Extzun Pedro tuk'ix juntl xnaq'tzb'en, e je'x ttzi pantyón.

⁴E je'x qelan junx kykab'il; atzun juntl xnaq'tzb'en mas kyuw ojqelan twitz Pedro, ex nej o kanun ttzi pantyón.

⁵Kub' mok'e' tu'n tokx tke'yin, ex o til qe xb'alun ax kykub'sa'n, ex minti' okx tuj pantyón.

⁶Ex lepchix t-xi' Simón Pedro ti'j, ex okx tuj pantyón, ex o til qe xb'alun ax kykub'sa'n,

⁷tuk'ix ju k'alb'il aju ajb'en k'alb'il twi' Jesús, mya junx tkub' kyuk'il qe xb'alun, b'alq'i'ntoq tten ex part tkub'.

⁸Ax ikx okx juntl xnaq'tzb'en aju pon nej ttzi pantyón; o til ex xi toksla'n.

⁹Tu'nju na'nxtoq tel kynik' ti'j ju tz'ib'amaj tuj Tu'jil qa ilxix ti'j tu'n tjatz anq'in Jesús kyxol kyimni.

¹⁰E ajtztzun meltz'aj qe xnaq'tzb'en ex e ul tuj kyja.

¹¹Atzunte Mariy wa'ltoq twitz pantyón in oq'; ex kukxtoq toq' kub' mok'e' tu'n tokx tke'yin tuj pantyón.

¹²Ex o til kab' anjel tok kyxb'alun saq, q'uql qe jatum kub' ten t-ximlal Jesús, q'uqltoq jun jatum kub' ten twi' Jesús, ex juntl jatum kub' ten tqan.

¹³Xitzun kyma'n anjel te Mariy: —¿Tiqu'n in oq'a, nan? Xi tma'n Mariy kye: —In chin oq'e porke ma tzik' q'i'n t-ximlal Wajawe, ex minti' b'a'n wu'ne jatum ma pon q'o'n.

¹⁴Tej t-xi tma'n Mariy jlu, ajtz meltz'aj twitz, ex o til wa'ltoq Jesús, ex minti' el tnik' ti'j qa ate Jesús.

¹⁵Xitzun tma'n Jesús te: —¿Tiqu'n in oq'a, nan? ¿Alkye in jyona ti'j? Atzunte Mariy, tuj tnab'l qa ateju kwentil awal, xitzun tma'n te: —Tat, qa aya ma txi q'inte t-ximlal Jesús, q'mantza jatum ma pon tq'o'na tu'ntzun t-xi wi'ne.

¹⁶Xitzun tma'n Jesús te: —Mariy. Ajtztzun meltz'aj twitz Mariy, ex xi tma'n te tuj yol hebreo: Raboni. (Atzun in tma'n ju yol lu: Xnaq'tzal).

¹⁷Xi tma'n Jesús te: —Mi'n chin kub' ttzyu'na porke na'nx waje tuk'il Nmane; txi'ya kyuk'il wermaniye, ex q'manxa kye, chin jawixe tuk'il Nmane ex Kymane, tuk'il Ndiose ex Kydiose, chi Jesús te.

¹⁸Xi'tzun Mariy aj Magdala q'malte tqanil kye xnaq'tzb'en, qa otoq ilwaj Qajaw tu'n ex qa ax Qajaw tzaj q'mante ju yol lu.

¹⁹Ax q'ij otoq tz'ok qax, aju tnejel q'ij te seman, ok kyb'uyin kyib' qe xnaq'tzb'en, ex etz kylamo'n qe tlamel ja jatum ate'toq tu'n tlaj in che xob'toq kywitz xjal judiy; ul Jesús kyuk'il, kub' we' kyxol, ex xi tma'n kye: —Qe' kyk'u'je.

²⁰Tejtzun t-xi tma'n jlu kye, xi tyek'un qe tq'ab' kye ex ju ttxlaj t-xu'k. Atzun qe xnaq'tzb'en e tzalaj tej kylonte Qajaw.

²¹Xitzun tma'n Jesús kye juntl maj: —Qe' kyk'u'je. Ik tza'n ma chin tzaj sama'ne tu'n Nmane, ax ikxtzun kyeye che xe'l nsama'ne.

²²Tejtzun tb'aj tma'n jlu, xi t-xupin kyi'j, ex xi tma'n kye: —Kyk'monxe aju Xewb'aj Xjan.

²³Alkye jun xjal ma kub' kynajsa'ne til, knajsetel til; ex alkye jun xjal minti' ma kub' kynajsa'ne til, atx til.

²⁴Atzunte Tomás, aju yo'ẍ tb'i kyu'n xjal, jun kyxol qeju kab'laj t-xnaq'tzb'en Jesús, mi a'ltoq kyuk'il txqantl xnaq'tzb'en tej tul Jesús.

²⁵Xitzun kyma'n qe txqantl xnaq'tzb'en te Tomás: —Ma qile Qajaw. Xitzun tma'n Tomás kye: —Qa minti' ma wile tokxlen klaws tuj tq'ab', ex qa minti' ma tz'okx nq'o'ne tal nq'ab'e tuj tokxlen klaws, ex qa minti' ma tz'ok nmako'ne tokxlen lans ttxlaj t-xu'k, mlay txi woksla'ne, chi Tomás.

²⁶Tb'ajlenxitzun wajxaq q'ij, ate'toq juntl maj qe t-xnaq'tzb'en Jesús tuja, ex tuk'ix Tomás attoq kyuk'il. Maske lamo'n qe tlamel ja, ex pon Jesús kyuk'il, kub' we' kyxol, ex xi tma'n kye: —Qe' kyk'u'je.

²⁷Ex xi tma'n Jesús te Tomás: —Q'o'nktz tal tq'ab'a tzalu, ex ke'yin oka qe nq'ab'e; ex q'ontz tq'ab'a, mako'nka jatum tokxlen lans ttxlaj nxu'ke. Mi'n tz'oka mya okslal, noq o'kx tu'n toka okslal, chi Jesús.

²⁸Xitzun ttzaq'we'n Tomás: —Aya Wajawe ex aya Ndiose.

²⁹Xitzun tma'n Jesús te: —Noq tu'nju ma chin tila, Tomás, ma txi toksla'na; at tzalajb'il kye qeju ma kyoksla maske minti' ma kyil, chi Jesús.

³⁰Ax ikx o tb'incha Jesús nimku txqantl señ kywitz qe t-xnaq'tzb'en, mya tz'ib'an qe tuj ju libro lu.

³¹Ex aqeju señ lu ma che tz'ib'anjtz tu'ntzun t-xi kyoksla'ne qa ate Jesús ju Crist aju at toklen tu'n Dios, ex ax Tk'wa'l Dioste, ex tu'n tten kychwinqlale tu'n ok t-xi kyoksla'ne.