Read kumam Juan 21 Bible Online

Juan 21 - kumam bible

Juan 21

¹Tb'ajlenxitzun jlu, kub' tyek'un tib' Jesús juntl maj kywitz qe t-xnaq'tzb'en ttzi laguna Tiberias tb'i; ex kub' tyek'un tib' kyja':

²Attoq Simón Pedro, tuk'ix Tomás aju yo'ẍ tb'i kyu'n xjal, tuk'ix Natanael aju aj Caná te Galilea, kyuk'ix qe tky'ajal Zebedeo, ex kyuk'ix kab'etl t-xnaq'tzb'en.

³Xitzun tma'n Simón Pedro kye tuk'il: —Ma chinx weye tzyul kyiẍ. Atzun kye tuk'il xi kyma'n te: —Ax ikx qeye ma qo'xe tuk'ila. E je'xtzun ex e okx tuj jun barc; ex aq'b'il kyu'n ex minti' jun kyiẍ tzyet kyu'n.

⁴Tejtzun ch'ixtoq tja'wil q'ij, lu Jesús wa'ltoq ttzi laguna; atzun kye t-xnaq'tzb'en minti' el kynik' ti'j qa ate Jesús.

⁵Xitzun tma'n Jesús kye: —¿Atpe kyiẍ ma tzyet kyu'ne, aqeye wuk'ile? —Minti', che chi.

⁶Xitzun tma'n Jesús kye: —Kyq'onku'xe xyub' tuj a' ttxlaj barc tuj b'anq'ab'aj, kneteltzun kyiẍ kyu'ne, chi kye. Ku'xtzun kyq'o'n ju xyub', ex ya minti' b'ant tu'n tjatz kyu'n tu'nju nim kyiẍ otoq tzyet kyu'n.

⁷Atzunte ju xnaq'tzb'en k'ujla'nxix tu'n Jesús xi tma'n te Pedro: —Ate Qajaw jlu. Tejtzun tb'inte Simón Pedro qa ate Qajaw, ok tq'o'n t-xb'alun (tu'nju otoq tz'el ti'n), ex ku'x tuj a'.

⁸Atzun qe txqantl xnaq'tzb'en e tzaj tuj barc, jawo'n xyub' kyu'n jatum kyku'x kyiẍ, porke mya najchaq ta' ttzi tx'otx', b'alo kyaje ech.

⁹Tej kyul kanun ttzi tx'otx' o kyil otoq kub' peq'chaj q'aq', ex tokx jun kyiẍ twitz q'aq', ex tuk'ix wab'j attoq.

¹⁰Xi tma'n Jesús kye: —Kyi'ntze kab' ox kyiẍ aju ma xtzyet kyu'ne ja'lo, chi Jesús.

¹¹Okxtzun Simón Pedro tuj barc, ex ik'tz ti'n xyub' ttzi tx'otx', nojni tu'n 153 kyiẍ matij; maske nim kyiẍ tuj xyub', ex minti' kub' tzaqj.

¹²Xitzun tma'n Jesús kye: —Kytzaje, che wa'ne. Ex mi jun xnaq'tzb'en ok tnimarin tib' tu'n t-xi tqanin: ¿Alkyeya? chiwt, porke b'a'n kyu'n qa ate Qajaw.

¹³Atzunte Jesús tzaj laq'e', ex tzaj ti'n wab'j, xi tq'o'n kye, ax ikx tzaj ti'n kyiẍ ex xi tq'o'n kye.

¹⁴Atzun toxinmaji'n jlu kub' tyek'un tib' Jesús kywitz qe t-xnaq'tzb'en tjatzlenxi anq'in kyxol kyimni.

¹⁵Tejtzun kyb'aj wa'n, xi tqanin Jesús te Simón Pedro: —Aya Simón tky'ajal Jonás, ¿maspe k'ujla'n qine tu'na ik tza'n kye jlu? Chi Jesús. —K'ujla'na wu'ne, Tat; b'a'n tu'na qa k'ujla'na wu'ne, chi Pedro. Xitzun tma'n Jesús te: —Che tkwentin oka qe tal nẍne'le.

¹⁶Xitzun tma'n Jesús te tkab'maji'n: —Aya Simón tky'ajal Jonás, ¿k'ujla'npe qine tu'na? —K'ujla'na wu'ne, Tat; b'a'n tu'na qa k'ujla'na wu'ne, chi Pedro. Xitzun tma'n Jesús te: —Che tkwentin oka qe nẍne'le.

¹⁷Xitzun tma'n te toxinmaji'n: —Aya Simón tky'ajal Jonás, ¿k'ujla'npe qine tu'na? Tzajtzun tb'is Pedro tu'nju tzaj q'ma'n te toxinmaji'n: ¿K'ujla'npe qine tu'na? Xitzun ttzaq'we'n: —Tat, tkyaqil b'a'n tu'na; b'a'n tu'na qa k'ujla'na wu'ne. Xitzun tma'n Jesús te: —Che tkwentin oka qe nẍne'le.

¹⁸Ax tok kxel nma'ne teya, tej matoq ku'xuna, ok tk'alo'n tk'u'ja, ex xi'ya noq jatum tajb'ila; oktzun ttijina, kjawil ti'n tq'ab'a, ex k'okel k'alo'n tk'u'ja tu'n juntl, ex kxel q'i'na jatum mya tajb'ila tu'n t-xi'ya.

¹⁹Tma Jesús jlu tu'n ttzaj tchik'b'a'n tza'n tten tu'n tkyim Pedro tu'ntzun tjaw nimsa'n tb'i Dios. Tej tmante jlu ax ikx xi tma'n: —Lpe'ka wi'je.

²⁰Ajtz tke'yin Pedro ex o til lepcho'k kyi'j aju xnaq'tzb'en k'ujla'nxix tu'n Jesús, axju xnaq'tzb'en aju xi txale' twi' ttzi t-xu'k Jesús tej kywa'n ti'j mes ex xi tma'n te: Tat, ¿alkyetzun kxel q'onte teya tuj kyq'ab' xjal?

²¹Tej tlonte Pedro xnaq'tzb'en lu, xi tma'n te Jesús: —Tat, ¿yajtzun te jlu ti kb'ajel ti'j?

²²Xitzun tma'n Jesús te Pedro: —Qa wajb'ile tu'n tkyaj ten atx okxi wule, ¿ti' taja ti'j? Lpe'k teya wi'je.

²³Aju yol lu el laq'e' tqanil kyxol erman qa minti' tu'n tkyim ju xnaq'tzb'en lu. Ex minti' xi tma'n Jesús te tu'n mi'n tkyim, noq o'kx tma: Qa wajb'ile tu'n tkyaj ten atx okxi wule, ¿ti' taja ti'j?

²⁴Atzunju xnaq'tzb'en lu in tchik'b'a'n axix tok ti'j tkyaqil jlu, ex ma kyaj ttz'ib'an tkyaqil jlu. Ex b'a'n qu'n aju yol tzaj tchik'b'a'n axix tok.

²⁵Ex at nimku mastl o tb'incha Jesús, noqwit ma che kub' tz'ib'et teyle junjun, tuj nnab'le mlay b'ant kyten qe libro twitz tx'otx' noqwit ẍe tz'ib'anjtz. Ikxwitju.