Read kumam Juan 4 Bible Online

Juan 4 - kumam bible

Juan 4

¹Pon tqanil kyuk'il fariseo qa mas in che chmet t-xnaq'tzb'en Jesús twitz te Juan ex mas nim xjal in che b'yan tu'n tuj a';

²maske mya tu'n Jesús o che b'yan xjal; kyu'n t-xnaq'tzb'en in che b'yan xjal.

³Tejtzun tb'inte Jesús jlu, etz tuj tx'otx' Judea, xi' juntl maj tuj Galilea.

⁴Aju b'e jatum xi' Jesús, atzun nnik' tuj tx'otx' Samaria.

⁵Pontzun Jesús tuj jun tnam Sicar tb'i, at tuj tx'otx' Samaria, niqayin ttxlaj tetzb'il Jacob, aju xi tq'o'n te José aju tky'ajal.

⁶Ex attoq jun xoch kyaj tb'incha'n Jacob; ex tu'nju otoq sikt Jesús tu'n b'etin, kub' qe' ttzi xoch; b'alo te chilkuq'ij.

⁷Ultzun jun xu'j aj Samaria q'il a', ex xi tma'n Jesús te: —Q'ontza ch'in nk'a'ye a'.

⁸Atzun qe t-xnaq'tzb'en otoq che'x laq'ol wab'j tuj tnam.

⁹Tzajtzun tma'n ju xu'j aj Samaria te Jesús: —¿Tiqu'n in tzaj tqanina tk'a'ya a' weye, aya xjal judiy, atzun weye aj Samaria qine? Chi xu'j. (Porke qe xjal judiy mya b'a'n kyten kyuk'il aj Samaria.)

¹⁰Xi ttzaq'we'n Jesús: —Noqwit ma tz'el tnik'a ti'j ju toyaj Dios ex noqwit ma tz'el tnik'a wi'je tej xi nqanine nk'a'ye a' teya, mawtlo tzaj tqanina tk'a'ya weye ex mawtlo txi nq'o'ne jun a' itz' teya.

¹¹Atzunte xu'j tma: —Tat, minti' pulb'il te q'i'n tu'na tu'n tjatz ti'na a', ex ma' te jul t-xe'. ¿Jatumtzun ta' ju a' itz' tu'na?

¹²¿Maspetzun ma' toklena twitz qxe'chel Jacob, aju kyaj q'onte ju xoch lu qe, jatum o k'an te, ex qe tk'wa'l ex qe talun? Chi xu'j.

¹³Xi ttzaq'we'n Jesús: —Kykyaqil qeju in che k'an ti'j a' lu, ktzajel juntl maj txqetle'n kyi'j;

¹⁴ex alkyeju ma txi k'ante ju a' kxel nq'o'ne te, mlay tzaj juntl maj txqetle'n ti'j. Porke aju a' kxel nq'o'ne te, kpulwil tuj tanmi ik tza'n jun twi' a' tu'n tten tchwinqlal te jumajx, chi Jesús.

¹⁵Tzajtzun tma'n ju xu'j te Jesús: —Tat, q'ontza ju a' lu weye, tu'ntzun mi'n ttzaj txqetle'n wi'je, ex tu'n mi'n ntzaje q'ilte a' max tzalu.

¹⁶Xi tma'n Jesús te: —Txi'ya, ex txkontza tchmila, ex tzaja tzalu.

¹⁷Tzaj ttzaq'we'n ju xu'j: —Minti'we nchmil. Xitzun tma'n Jesús te: —B'a'n ma tmaya: Minti'we nchmil, chitzuna.

¹⁸Ex jwe'xi tchmila ten, ex aju at tuk'ila ja'lo mya tchmila. Ax tok aju ma tmaya.

¹⁹Tmatzun ju xu'j te: —Tat, tuj nnab'le aya t-sanjel Dios.

²⁰Qeye qxe'chel e k'ulun te Dios twi' witz lu; atzun kyeye xjal judiy, in kyma'ne qa tuj Jerusalén ta' ju lugar jatum tu'n qk'ulun twitz Dios.

²¹Xitzun tma'n Jesús te: —Okslama nyole, nan, tzul tq'ijlalil tu'n kyk'ulune twitz Dios Mamb'aj, mya twi' ju witz lu tu'n kyk'ulune, ex mya tuj Jerusalén.

²²Aqeye aj Samaria in che k'ulune twitz ju minti' ojtzqi'n kyu'ne; atzun qeye in qo k'ulune twitz ju ojtzqi'n qu'ne; porke aju kolb'il atzun in tzaj kyxol xjal judiy.

²³Tzul tq'ijlalil, ex lu ma tzul ja'lo, qeju in che k'ulun axix tok, ok che k'ulul twitz Dios Mamb'aj tuj kyanmi ex axix tok kyu'n; porke ate Dios Mamb'aj taj tu'n kyk'ulun xjal twitz ex axix tok kyu'n.

²⁴Ate Dios Xewb'aj; ex qeju in che k'ulun twitz, ilxix ti'j tu'n tk'ulunjtz kyu'n tuj kyanmi ex axix tok kyu'n, chi Jesús xi tma'n te xu'j.

²⁵Xitzun tma'n ju xu'j te Jesús: —B'i'nwe wu'n, tzul ju Mesías, aju Crist tb'i, aju at toklen tu'n Dios; oktzun tul ktzajel tchik'b'a'n tkyaqil qe.

²⁶Xi tma'n Jesús te: —Aqine ju Crist in chin yolin tuk'ila.

²⁷E ultzun qe t-xnaq'tzb'en, e lab'in ti'j tu'nju in yolintoq Jesús tuk'il jun xu'j; ex mi jun xi qaninte te: ¿Ti in xi tqanina? ex qa ¿alkye yol in yolina ti'j tuk'il ju xu'j? Chiwt.

²⁸Atzunte xu'j kyaj tq'o'n t-ẍoq', xi' tuj tnam, ex xi tma'n kye xjal:

²⁹Qo'qe wuk'ile ke'yilte jun xjal ma tzaj tma'n weye tkyaqilju o nb'inchaye. ¿Myapelo a Crist jlu aju at toklen tu'n Dios? Chi xu'j.

³⁰Tu'n jlu e je'tz qe xjal tuj tnam e ul tuk'il Jesús.

³¹Atzun kye t-xnaq'tzb'en Jesús in che kub'san twitz: —Xnaq'tzal, chux wa'na, che chi.

³²Atzunte Jesús xi tma'n kye: —At junwe nwa tu'n nwa'ne ti'j, aju minti' b'a'n kyu'ne.

³³Kymatzun qe t-xnaq'tzb'en kyxolx: —¿Atpelo jun xjal ma tzul q'inte twa?

³⁴Ex xi tma'n Jesús kye: —We nwa, atzunju tu'n nb'inchanteye aju tajb'il ju tzaj samante weye, ex tu'n tb'aj b'ant taq'un wu'ne.

³⁵¿Myapetzun in kyma'ne qa atx kyaje xjaw taj tu'n tjaw awal? Ex kxel nma'ne kyeye: Kyke'yinxe awal ma tzqij tu'n tjaw.

³⁶Aju in jaw chmonte awal, in tk'mo'n twi tk'u'j, ex in jaw tchmo'n twitz awal tu'n tpon tuj chwinqlal te jumajx, tu'ntzun kytzalaj junx aju chmol twitz awal tuk'il ju awalte.

³⁷Porke ti'j jlu in q'manjtz ju tal twitz yol axix tok lu: Jun in ku'x awante, ex juntl in jaw chmonte, chi tal twitz yol.

³⁸Aqine ẍinx samante kyeye tu'n tjaw kychmo'ne twitz awal, aju minti' e aq'nane ti'j; junxitl e aq'nan ti'j, ex atzun kyeye ma jaw kychmo'ne twitz kyawal, chi Jesús kye.

³⁹Ex nimku aj Samaria te tnam Sicar e okslan ti'j Jesús tu'n tyol ju xu'j xi ttx'olb'a'n kye: Ma tma weye tkyaqilju o nb'inchaye, chi xu'j.

⁴⁰Kyja'tzun tej kyul aj Samaria tuk'il Jesús, e kub'san twitz tu'n tkyaj ten kyuk'il. Ex axtzun kyaj ten Jesús kab' q'ij.

⁴¹Ex nimkutl xjal e okslan tu'nx tyol Jesús.

⁴²Xitzun kyma'n teju xu'j: —Mya noq o'kx tu'n tyola ma qokslaye, ex ax qeqo' ma qo b'inte tyol Jesús, ex b'a'n qe qu'n axix tok ate jlu Klol kye xjal, aju Crist aju at toklen tu'n Dios.

⁴³Tb'ajlenxitzun kab' q'ij, etztzun Jesús tuj Samaria ex xi' tuj Galilea.

⁴⁴Tu'nju axte Jesús o q'mante ju yol lu: Jun t-sanjel Dios minti' in nimanjtz tujx ttanmi.

⁴⁵Tejtzun tpon Jesús tuj Galilea, b'a'n o k'monjtz kyu'n aj Galilea, tu'nju otoq kyil tkyaqilju otoq tb'incha Jesús tuj Jerusalén tuj ninq'ij, tu'nju ikx kye otoq che'x aj tuj ninq'ij.

⁴⁶Xi'tzun juntl maj Jesús tuj tnam Caná tuj tx'otx' Galilea, jatum otoq tz'ok ju a' te vin tu'n. Ex attoq jun xjal at toklen ttxlaj rey, yab'toq tk'wa'l tuj tnam Capernaum.

⁴⁷Tej tb'inte xjal lu qa otoq tzaj Jesús tuj Judea ex otoq tzul tuj Galilea, tzaj kanul ti'j ex o kub'san twitz tu'n t-xi' Jesús tuj Capernaum ex tu'n tb'anix ju tk'wa'l tu'n, porke ch'ixtoq tkyim k'wa'l.

⁴⁸Xitzun tma'n Jesús te: —Qa minti' ma kyile qe señ ex qe b'inchb'en nim kyipumal in che b'ant wu'ne mlay che okslane.

⁴⁹Tzaj ttzaq'we'n ju xjal at toklen ttxlaj rey: —Tat, txi' naja na'nxtoq tkyim nk'wa'le.

⁵⁰Xitzun tma'n Jesús te: —B'a'n taja tjaya, kb'antel tk'wa'la, chi Jesús. Xi toksla'n xjal aju yol tzaj q'ma'n te tu'n Jesús, ex aj meltz'aj.

⁵¹Ch'ixtoq tpon xjal tuj Capernaum, e etz qe tmajen kanul ti'j, ex xi kyma'n te qa otoq b'anix ju tk'wa'l.

⁵²Xitzun tqanin kye alkye or tej tb'anix k'wa'l. Atzun kye tzaj kytzaq'we'n: —Txale' q'ij ew ik' kyaq ti'j, che chi.

⁵³Ultzun tuj tnab'l mamb'aj qa atzun orju tej tmante Jesús te: Kb'antel tk'wa'la; okslantzun ju xjal ti'j Jesús kyuk'ix qeju ate' tuj tja.

⁵⁴Atzun tkab'in señ jlu b'ant tu'n Jesús tej tul juntl maj tuj Galilea tej tetz tuj Judea.