Read kumam Juan 6 Bible Online

Juan 6 - kumam bible

Juan 6

¹Tb'ajlenxitzun jlu xi' Jesús jlajxi laguna te Galilea, aju Tiberias tb'i.

²Ex nim xjal e ok lpe' ti'j, porke o kyil in che b'ant qe señ tu'n, in che b'ant qe yab'.

³Jaxtzun Jesús twi' jun witz ex atzun kub' qe' kyuk'ix qe t-xnaq'tzb'en.

⁴Ex ch'ixtoq tul kanun ju ninq'ij kye xjal judiy, aju Xjan Q'ij tb'i.

⁵Tej t-xi tke'yin Jesús, o til nim xjal otoq che ul tuk'il, xitzun tma'n te Felipe: —¿Jatum ktzajel qlaq'o'n wab'j tu'n kywa'n qe xjal lu?

⁶Tma Jesús jlu noq tu'n tb'inte chi tok tu'n Felipe, porke b'a'n tu'n Jesús alkye tu'n tb'inchante.

⁷Xi ttzaq'we'n Felipe: —Qa ma laq'et kab' syent denari wab'j, mlaylo kanun tu'n tk'monte ch'inaq te junjun, chi Felipe.

⁸Xitzun tma'n jun t-xnaq'tzb'en, aju Andrés tb'i, titz'in Simón Pedro:

⁹—At jun tal q'a tzalu at jwe' wab'j sebad tuk'il tuk'ix kab'e tal kyiẍ, ex, ¿ti tten tu'n tkanun jlu kye nimku xjal? Chi Andrés.

¹⁰Xitzun tma'n Jesús: —Kymanxe kye xjal tu'n kykub' qe'. Ex puro ch'im tuj lugar. E kub'tzun qe' xjal, b'alo at jwe' mil kyajlal xinaq.

¹¹Tzajtzun ttzyu'n Jesús qe wab'j, xi tq'o'n chjonte te Dios, xi t-sipan kye t-xnaq'tzb'en, atzun kye t-xnaq'tzb'en xi kysipan kye xjal q'uql qe'toq. Ax ikx xi kysipan qe tal kyiẍ noq nik'pun tu'n tb'aj kyu'n.

¹²Tejtzun kyb'aj noj qe xjal, xi tma'n Jesús kye t-xnaq'tzb'en: —Kychmo'nktze qe ttx'aqan wab'j ma kyaj ten, tu'ntzun mi'n tnaj ch'in.

¹³Jawtzun kychmo'n qe t-xnaq'tzb'en, ex o noj kab'laj chi'l ttx'aqan wab'j kyaj ten kyi'j jwe' wab'j sebad tej kyb'aj wa'n qe xjal.

¹⁴Tejtzun kylonte qe xjal aju señ tb'incha Jesús, kyma: —Ax tok ate jlu t-sanjel Dios aju attoq tulel kyxol xjal.

¹⁵Tejtzun tel tnik' Jesús ti'j otoq kub' kyximan tu'n kytzaj q'ilte te tu'ntzun tok te kyrey, el tpa'n juntl maj tib' kyi'j xjal, xi' twi witz junx te.

¹⁶Tejtzun tok qax e ku'x qe t-xnaq'tzb'en Jesús ttzi laguna.

¹⁷E okxtzun tuj jun barc, kyja'toq kyik'x tib'aj laguna tu'n kypon tuj Capernaum. Otoq qok yupj, ex na'nxtoq tkanun Jesús kyuk'il.

¹⁸Tzajtzun jun kyq'iq' nimxix ex tu'n jlu jaw pulin laguna.

¹⁹B'alo otoq che ik'x jwe' kilómetro tib'aj laguna ex qa qaq, o kyil in b'ettoq Jesús tib'aj a' ex kyja'toq tpon laq'e' ttxlaj barc; tzajtzun kyxob'il.

²⁰Atzunte Jesús xi tma'n kye: —Aqine, mi'n che xob'e.

²¹E jawtzun tzalaj tej tokx Jesús kyuk'il tuj barc, ex jurattzun pon naj barc ttzi tx'otx' jatum tu'n kypon.

²²Tuj juntl q'ij axtoq ate' xjal jlajtzi laguna ex otoq kyil noq junx barc attoq jatum otoq che okx t-xnaq'tzb'en Jesús ex minti' okx Jesús tuj barc kyuk'il qe t-xnaq'tzb'en, kyjunalx qe t-xnaq'tzb'en otoq che'x tuj barc.

²³Ex at junjuntl barc e tzaj tuj tnam Tiberias, e ul ttzi tx'otx' niqayin jatum otoq che wa'n qe xjal tej t-xi tq'o'n Qajaw chjonte te Dios.

²⁴Tejtzun kylonte qe xjal mi a'l Jesús kyuk'ix qe t-xnaq'tzb'en, e okxtzun xjal kyuj barc tu'n kypon tuj Capernaum, in che jyon ti'j Jesús.

²⁵Tejtzun tknet Jesús kyu'n xjal jlajxi laguna, xi kyma'n te: —Xnaq'tzal, ¿jtoje tzula tzalu?

²⁶Xi ttzaq'we'n Jesús: —Ax tok kxel nma'ne kyeye, in che jyone wi'je noq tu'nju pan xi kywa'ne ex e noje, mya tu'nju señ o kyile.

²⁷Mi'n che aq'nane ti'j ju wab'j in b'aj, o'kx che aq'nane ti'j ju wab'j mlay b'aj ex in tq'o'n kychwinqlale te jumajx. Atzunju wab'j lu kxel nq'o'ne kyeye, aqine sk'o'maj qine tu'n Dios tu'n ntene kyuk'il xjal, porke ma tzaj q'o'n woklene tu'n Dios aju Nmane, chi Jesús.

²⁸Xitzun kyma'n xjal te: —¿Titzun ok qb'incha'ye tu'n qb'inchanteye aju aq'untl in tma'n Dios?

²⁹Xitzun ttzaq'we'n Jesús: —Atzun aq'untl jlu in tma'n Dios tu'n kyb'inchanteye: Che okslane wi'je, aqine ma chin tzaj sama'ne tu'n Dios.

³⁰Xitzun kyma'n te: —¿Alkyetzun señ in tb'incha'na tu'n qlonteye ex tu'n qokslane ti'ja? ¿Alkye jun tb'inchb'ena nim tipumal in b'ant?

³¹Qe qxe'chel xi kywa'n maná tuj lugar minti' kynajb'il xjal tuj, ik tza'n in tma'n tuj Tu'jil: Aju wab'j ku'tz tuj kya'j xi tq'o'n Dios te kywa, chi tuj Tu'jil.

³²Xitzun tma'n Jesús kye: —Ax tok kxel nma'ne kyeye: Aju wab'j ku'tz tuj kya'j, mya ate Moisés tzaj q'onte kyeye, aju Nmane atzun in tzaj q'onte kyeye aju wab'j axix tok tzajni tuj kya'j.

³³Porke aju wab'j in tzaj tq'o'n Dios, atzunju ma ku'tz tuj kya'j ex in tq'o'n kychwinqlal xjal, chi Jesús.

³⁴Xitzun kyma'n te Jesús: —Tat, kukx q'ontza ju wab'j lu qeye.

³⁵Xitzun tma'n Jesús kye: —Aqine wab'j tu'n tten kychwinqlale; aju ma tzul wuk'ile mlay tzaj we'yaj ti'j; ex aju ma tz'okslan wi'je, mlay tzaj txqetle'n ti'j.

³⁶Ex ma txi nma'ne kyeye, maske ma chin kyile, pero minti' in che okslane wi'je.

³⁷Kykyaqil qeju in che tzaj tq'o'n Nmane weye in che ul wuk'ile; ex alkye qeju ma che ul wuk'ile mlay che ex nlajo'ne.

³⁸Porke ma chin ku'tze tuj kya'j, mya tu'n nb'inchanteye aju wajb'ile, noq o'kx tu'n nb'inchanteye aju tajb'il ju tzaj samante weye.

³⁹Ex atzun tajb'il Nmane jlu, aju tzaj samante weye: Mi'n taj tu'n tnaj jun xjal wu'ne, aqeju ma che tzaj tq'o'n weye, noq o'kx taj tu'n kyjaw anq'in wu'ne tuj mankb'il tq'ijlalil.

⁴⁰Ex atzun jlu tajb'il ju tzaj samante weye, tu'n tten kychwinqlal te jumajx kykyaqil qeju in che ke'yin wi'je ex in che okslan wi'je, aqine K'wa'lb'aj; ex che jawil anq'in wu'ne tuj mankb'il tq'ijlalil, chi Jesús xi tma'n kye.

⁴¹Atzun kye xjal judiy tzaj jun kyyol kyxolx ti'j Jesús, porke o tma Jesús: Aqine wab'j ma chin ku'tze tuj kya'j.

⁴²Ex in kyma'ntoq kyxolx: —¿Myapetzun a Jesús jlu aju tk'wa'l José? Ojtzqi'n tman qu'n, tuk'ix ttxu'. ¿Tza'ntzun tten in tma'n jlu: Tuj kya'j ma chin ku'tze? Chitzun.

⁴³Xi ttzaq'we'n Jesús: —Mi'n che yoline mya b'a'n wi'je kyxolxe.

⁴⁴Mlay tzul jun xjal wuk'ile qa mya tu'n Nmane sul q'i'n, aju tzaj samante weye; ex kjawil anq'in wu'ne tuj mankb'il tq'ijlalil.

⁴⁵At jun yol in tma'n tuj kyu'jil t-sanjel Dios: Tu'n Dios che xnaq'tzetel kykyaqil, chi tuj Tu'jil. Kyja'tzun tten, kykyaqil qeju ma che b'inte tyol Nmane ex ma che xnaq'tzanjtz tu'n, che ul wuk'ile.

⁴⁶Mi jun xjal o til twitz Dios Mamb'aj, noq o'kx aju tzaj tuk'il Dios, atzunju ma til twitz Dios Mamb'aj.

⁴⁷Ax tok kxel nma'ne kyeye, alkye ma tz'okslan wi'je at tchwinqlal te jumajx.

⁴⁸Aqine wab'j tu'n tten kychwinqlale.

⁴⁹Qe kyxe'chele xi kywa'n maná tuj lugar minti' kynajb'il xjal tuj, ex e kyim.

⁵⁰Aju wab'j in xi nma'ne, atzunju in ku'tz tuj kya'j tu'ntzun mi'n tkyim aju in wa'n ti'j.

⁵¹Aqine wab'j q'ol chwinqlal ma chin ku'tze tuj kya'j; qa ma txi twa'n jun xjal wab'j lu, k'anq'il te jumajx; ex aju wab'j kxel nq'o'ne, atzunju nchib'jale kxel nq'o'ne tu'n tten kychwinqlal xjal.

⁵²Atzun kye xjal judiy jaw jun yol kyxol: —¿Tza'ntzun tten jlu tu'n ttzaj tq'o'n tchib'jal tu'n t-xi qwa'n? Che chi.

⁵³Xitzun tma'n Jesús kye: —Ax tok kxel nma'ne kyeye, qa minti' ma txi kywa'ne nchib'jale, ex qa minti' ma txi kyk'a'ne nchk'ele, mlayx ten kychwinqlale, porke aqine sk'o'maj qine tu'n Dios tu'n ntene kyuk'il xjal.

⁵⁴Alkye ma txi twa'n nchib'jale ex ma txi tk'a'n nchk'ele, at tchwinqlal te jumajx; ex kjawil anq'in wu'ne tuj mankb'il tq'ijlalil.

⁵⁵Porke aju nchib'jale axix tok wab'jte, ex aju nchk'ele axix tok k'ab'jte.

⁵⁶Alkye ma txi wa'nte nchib'jale, ex ma txi k'ante nchk'ele, kukx ktel wuk'ile, ex aqine tuk'il.

⁵⁷Ik tza'n weye ma chin tzaj sama'ne tu'nju Dios itz' tu'nx tib', aju Nmane, ex itz' qine tu'n Nmane, ax ikxtzun te xjalju, qa ma txi twa'n nchib'jale ok k'anq'il wu'ne.

⁵⁸Atzun wab'j jlu ma ku'tz tuj kya'j; alkye ma txi wa'nte te ok k'anq'il te jumajx; aju wab'j lu mya ik tten ik tza'n ju maná xi kywa'n kyxe'chele, maske xi kywa'n pero e kyim, chi Jesús kye.

⁵⁹Atzun ju yol lu tma Jesús tuj ja te k'ulb'il tej t-xi tq'o'n xnaq'tzb'il tuj Capernaum.

⁶⁰Tej kyb'inte ju yol lu, nimku xjal aqeju otoq che ok te t-xnaq'tzb'en Jesús kyma: —Kyuwte ju yol lu; ¿alkye b'a'n txi b'inte?

⁶¹Eltzun tnik' Jesús ti'j qa ax qe t-xnaq'tzb'en tzaj jun kyyol kyxolx ti'j jlu, xitzun tma'n kye: —¿Maj mya b'a'n ma tz'ela nyole tuj kywitze?

⁶²Yajtzun noqwit xkyile kyja' njaxe tu'n npone jatum atine nej, aqine sk'o'maj qine tu'n Dios tu'n ntene kyuk'il xjal, ¿titzun jaku kymaye?

⁶³Ate T-xew Dios q'olte chwinqlal; atzunju qximlal minti' tajb'en. Aju yol ma txi nma'ne kyeye, in yolin ti'j T-xew Dios ex in tq'o'n chwinqlal.

⁶⁴Ex at junjun kyxole minti' in xi kyoksla'n, chi Jesús. Ex atxix t-xe tnejel ojtzqi'n tu'n Jesús alkye qeju minti' in xi kyoksla'n, ex ojtzqi'n tu'n alkye tu'n t-xi q'onte te tuj kyq'ab' xjal.

⁶⁵Ex tma: —Kyja'tzun ma txi nma'ne kyeye, mi a'l jun jaku tzul wuk'ile qa mya ate Nmane sul q'inte.

⁶⁶Ex tej tb'aj tma'n Jesús ju yol lu, nimku xjal aqeju otoq che ok te t-xnaq'tzb'en el kypa'n kyib' ti'j, ex minti'tl e b'et tuk'il.

⁶⁷Xitzun tma'n Jesús kye qe kab'laj t-xnaq'tzb'en: —¿Yajtzun kyeye, kyajpeye tu'n kyxi'ye?

⁶⁸Ex xi ttzaq'we'n Simón Pedro: —Tat, ¿al uk'il qo xe'le? O'kx aya at yol tuk'ila in tq'o'n chwinqlal te jumajx.

⁶⁹Qeye ma txi qoksla'ne ex ma tz'el qnik'e ti'ja, aya Xjan Tk'wa'l Dios.

⁷⁰Xitzun ttzaq'we'n Jesús: —¿Myapetzun kab'laj kyb'ete ma che jaw nsk'o'ne? Ex at jun kyeye ma txi tq'on tib' te tajaw il.

⁷¹Aju yol lu o tma Jesús ti'j Judas Iscariote, aju tky'ajal Simón, porke ate Judas tu'n t-xi q'onte Jesús tuj kyq'ab' xjal ax jun kyxol qeju kab'laj t-xnaq'tzb'en Jesús.