Read kumam Juan 8 Bible Online

Juan 8 - kumam bible

Juan 8

²Te prim te juntl q'ij tej ttzaj t-xe kya'j, pon juntl maj Jesús tuj tja Dios, ex kykyaqil xjal e pon tuk'il; kub'tzun qe', ex xi tq'o'n xnaq'tzb'il kye.

³Atzun kye xnaq'tzal ti'j ley kyuk'ix qe fariseo ul kyi'n jun xu'j otoq tzyet kyu'n tu'n tlaj in tb'incha'n aj pajil; matoq in tb'incha'n aj pajil tej ttzyet kyu'n. Kub'tzun kyq'o'n kyxol xjal.

⁴Xitzun kyma'n te Jesús: —Xnaq'tzal, aju xu'j lu tej xtzyet qu'ne in tb'incha'n aj pajil.

⁵Kyaj tma'n Moisés qe tuj ley, qa at xu'j in kyb'incha'n aj pajil, il ti'j tu'n kyok xo't tu'n ab'j. ¿Yajtzun teya, chi tok tu'na? Che chi.

⁶O kyma jlu tu'n tok Jesús tuj joyb'il ti'j, tu'ntzun tkub' tz'aq tuj jun til kyu'n. Ex kub' mok'e' Jesús twitz tx'otx', kub' ttz'ib'an twitz tx'otx' tu'n tal tq'ab'.

⁷Ex tu'nju kukx in che qanin ti'j, jaw we' Jesús, ex xi tma'n kye: —Qa at jun kyxole minti' til, atzunju e tok xo'nte tnejel ab'j ti'j xu'j.

⁸Ex kub' mok'e' Jesús juntl maj, ok tentl tz'ib'al twitz tx'otx'.

⁹Atzun kye tej kyb'inte jlu, o kyna' qa mya b'a'n qe, e je'tztzun junjun tetz. Nej e je'tz qe tij xjal, ex e je'tz b'aj kykyaqil. O'kxte Jesús kyaj ten tuk'ix ju xu'j wa'ltoq twitz.

¹⁰Jawtzun we' Jesús ex o til minti'tl xjal at, o'kx te xu'j at, xitzun tma'n te xu'j: —Aya xu'j, ¿jatum ate' qe tx'olb'al tila? ¿Minti'pe jun ma tma tu'n tkub' t-sentensa? Chi Jesús.

¹¹Atzun te xu'j tma: —Minti', Tat. Xitzun tma'n Jesús te: —Ax ikx weye mlay kub' t-sentensa wu'ne; txi'ya, ex mi'n b'inchantla il.

¹²O yolin juntl maj Jesús kye xjal ex tma: —Aqine spik'un kye xjal; alkye ma tz'ok lpe' wi'je, mlay b'et tuj qlolj, noq o'kx ktel tuj spik'un tu'n tten tchwinqlal.

¹³Xitzun kyma'n qe fariseo te Jesús: —Ax teya nno'k tq'on tib'a te testiw ti'jxa; kyja'tzun mlay txi qb'i'ne tyola in tzaj tma'na porke mya ax tok, che chi.

¹⁴Xi ttzaq'we'n Jesús: —Maske ax qine ma tz'ok nq'on wib'e testiw wi'jxi, pero ax tok nyole in xi nma'ne. Porke b'a'n wu'ne jatum ẍin tzaje ex jatum chin xe'le; atzun kyeye minti' b'a'n kyu'ne jatum ẍin tzaje ex minti' b'a'n kyu'ne jatum chin xe'le.

¹⁵Kyeye in che ok xjal tuj xjel kyu'ne tu'nxju kyximb'etze ik tza'n in kyb'incha'n txqantl xjal; atzun weye minti' jun xjal nno'k tuj xjel wu'ne.

¹⁶Ex maske ma che ok xjal tuj xjel wu'ne, pero aju sentens kb'el nq'o'ne tuj tumelxix; porke mya njunalxwe in chin kub' q'onte sentens, tuk'ix te Nmane at wuk'ile, aju tzaj samante weye.

¹⁷Ex at jun yol tz'ib'an tuj kyleye in tma'n, qa at kab'e xjal testiw junx ta' kyyol in tzaj kyma'n, axtzun tok kyyol.

¹⁸Aqine testiw wi'jxi, ax ikx te Nmane testiw wi'je, aju tzaj samante weye, chi Jesús.

¹⁹Xitzun kyma'n te: —¿Jatumtzun ta' Tmana? Xi ttzaq'we'n Jesús: —Minti' ma tz'el kynik'e wi'je ax ikx ti'j Nmane; noqwit ma tz'el kynik'e wi'je, ax ikx mawtlo tz'el kynik'e ti'j Nmane.

²⁰Atzun o tma Jesús ju yol lu tuj lugar te chemb'il pwaq, tej tq'on xnaq'tzb'il kye xjal tuj tja Dios. Ex mi a'l jun tzaj tzyunte, tu'nju na'nxtoq tjapun tq'ijlalil tu'n ttzyet kyu'n xjal.

²¹Xi tma'n juntl maj Jesús kye: —Chin xe'ltzune, ex che jyole wi'je, ex tujx kyile che kymele; ex jatum chin pole mlayx che pone, chi Jesús.

²²Kymatzun xjal judiy: —¿Tu'nxpelo kb'el tb'yon tib' tu'nju in tma'n: Jatum chin pole, mlayx che pone? Chitzun.

²³Xitzun tma'n Jesús kye: —Kyeye atzun ate'ye te kub'ni tzalu twitz tx'otx'; atzun weye te tuj kya'j qine; kyeye te twitz tx'otx' qeye, atzun weye mya te twitz tx'otx' qine.

²⁴Kyja'tzun ma txi nma'ne kyeye, che kymele tujxju kyile; qa minti' ma txi kyoksla'ne qa Aqine, che kymele tujx ju kyile, chi Jesús.

²⁵Xitzun kyma'n te: —¿Alkyetzuna? Xi tma'n Jesús kye: —Ax qine ik tza'n xi nma'ne kyeye nej.

²⁶Nimku tu'n nyoline kyi'je ex tu'n t-xi nma'ne kyb'inchb'ene mya b'a'n; ex aju tzaj samante weye, ax tok tyol, ex aju ma nb'iye te, atzunju in xi nma'ne kye xjal.

²⁷Ex minti' el kynik' ti'j qa ti'j Dios Mamb'aj in yolin Jesús.

²⁸Kyja'tzun xi tma'n Jesús kye: —Aqine sk'o'maj qine tu'n Dios tu'n ntene kyuk'il xjal; okxi njaw kyq'o'ne twitz crus, maxitzun k'elel kynik'e ti'j qa Aqine ex minti' jun ti'xti in b'ant wu'ne wu'nx wib'e, noq o'kx in chin yoline ik tza'n in tzaj xnaq'tza'ne tu'n Nmane.

²⁹Ex aju tzaj samante weye ax ta' wuk'ile; minti' ma chin kyaj koline tu'n Nmane, tu'nju kukx in nb'incha'ne aju b'a'n nne'la tuj twitz, chi Jesús.

³⁰Tej tmante Jesús tkyaqil jlu, nimku xjal e okslan ti'j.

³¹Xitzun tma'n Jesús kye xjal judiy aqeju otoq che okslan ti'j: —Qa kukx ma txi kyb'i'ne nyole, axix tok che okele te nxnaq'tzb'ene;

³²k'elel kynik'e ti'j ju yol axix tok, ex che tzoqpetele tu'nju yol axix tok.

³³Xitzun kytzaq'we'n: —Tiyjil Abraham qo'ye, ex b'ajx qo tene te tmajen jun xjal. ¿Tiqu'ntzun in tma'na tu'n qtzoqpete?

³⁴Xi ttzaq'we'n Jesús: —Ax tok kxel nma'ne kyeye, kykyaqil qeju in che b'inchan il, tmajen il qe.

³⁵Aju majen mya te jumajx tu'n tkyaj ten tuj tja tpatrón; atzunte k'wa'lb'aj ax in kyaj ten tuj tja tman te jumajx.

³⁶Kyja'tzun, qa ma che tzoqpete wu'ne aqine K'wa'lb'aj, axix tok che tzoqpetele.

³⁷B'a'n wu'ne tiyjil Abraham qeye; ex nno'k tilil kyu'ne tu'n nkub' kyb'yo'ne, porke minti' jatum tu'n tokx nyole tuj kyanmiye.

³⁸In chin yoline ti'j ju o wile tej atinxtoqe ttxlaj Nmane; atzun kyeye in kyb'incha'ne aju o kyb'iye te kymane, chi Jesús kye.

³⁹Xi kytzaq'we'n xjal judiy: —Ate Abraham qmane. Ex xi tma'n Jesús kye: —Noqwit ax tok tk'wa'l Abraham qeye, aju o tb'incha Abraham awtloju in kyb'incha'ne.

⁴⁰Ex ja'lo nno'k tilil kyu'ne tu'n nkub' kyb'yo'ne tu'nju ma txi nma'ne ju yol axix tok kyeye, aju o nb'iye te Dios; atzunte Abraham minti' o tb'incha ikju ik tza'n kyeye in kyb'incha'ne.

⁴¹Aqeye in kyb'incha'ne axju in tb'incha'n kymane, chi Jesús. Xitzun kyma'n te: —Mya sik'aj k'wa'l qo'ye; junx qe qman at, ate Dios.

⁴²Xitzun tma'n Jesús kye: —Noqwit ax tok a Dios kymane, mawtlo chin kyk'ujlaye, porke tuk'il Dios ẍin tzaje, ex ma chin ule tzalu. Minti' ma chin tzaje wu'nx wib'e, ate Dios tzaj samante weye.

⁴³¿Tiqu'n minti' nne'l kynik'e ti'j nyole? Tu'nju minti' in kub' kyb'i'ne nyole.

⁴⁴Aqeye, atzun kymane tajaw il, ex aju tajb'il kymane kyajb'ile tu'n kyb'inchanteye. Ate tajaw il b'yol xjal te ttzajlenx atxix t-xe tnejel, ex el tpa'n tib' ti'j ju yol axix tok porke minti' jun tyol axix tok. Ok in nik'an yol, texte tyol in tma'n; porke nik'al yolte ex atzun in tzaj nik'aj yol tuk'il.

⁴⁵Atzun weye minti' in che okslane wi'je porke in xi nma'ne ju yol axix tok.

⁴⁶¿Atpe jun kyeye jaku q'mante qa at wile? Qatzun in xi nma'ne ju yol axix tok, ¿tiqu'ntzun minti' in xi kyoksla'ne nyole?

⁴⁷Qa te Dios jun xjal, in xi tb'i'n tyol Dios; atzun kyeye minti' in xi kyb'i'ne porke mya te Dios qeye, chi Jesús xi tma'n kye.

⁴⁸Xitzun kyma'n xjal judiy te: —¿Myapetzun tuj tumel in qma'ne aya aj Samaria ex at ju'ẍ tuj tanmiya?

⁴⁹Xi ttzaq'we'n Jesús: —Minti' ju'ẍ tuj wanmiye, noq o'kx in xi nnimane Nmane ex at tchiylal tuj nwitze, atzun kyeye minti' nchiylale tuj kywitze.

⁵⁰Ex minti' nno'k tilil wu'ne tu'n njaw nimsa'ne; at juntl nno'k tilil tu'n tu'n njaw nimsa'ne, ex tuj tkwent ta' tu'n njaw nimsa'ne.

⁵¹Ax tok kxel nma'ne kyeye, alkye ma japun nyole tu'n, mlayx kyim, chi Jesús.

⁵²Xitzun kyma'n xjal judiy te: —Matzun tz'el qnik'e ti'j ja'lo at ju'ẍ tuj tanmiya. Ate Abraham o kyim, ax ikx qe t-sanjel Dios o che kyim; atzun teya in tma'na: Alkye ma japun nyole tu'n, mlayx kyim, chitzuna.

⁵³¿Maspetzun ma' t-xilena twitz qxe'chel Abraham aju o kyim? Ax ikx qe t-sanjel Dios e kyim. ¿Alkyetzuna tuj tnab'la? Che chi.

⁵⁴Xi ttzaq'we'n Jesús: —Qa ma jaw nnimsan wib'e wu'nx wib'e, noqxlo gan in jaw nnimsan wib'e; pero aju Nmane, atzunju in jaw nimsante weye, aju in kyma'ne qa atzun Kydiose.

⁵⁵Ex minti' ojtzqi'n twitz kyu'ne; atzun weye ojtzqi'n twitz wu'ne. Qatzun ma txi nma'ne minti' ojtzqi'n wu'ne, tu'n jlu nik'al yol qine ik tza'n kyeye; ex ax tok ojtzqi'n wu'ne, ex in japun tyol wu'ne.

⁵⁶O tzalaj kyxe'chele Abraham tu'nju attoq tu'n tlonte tq'ijlalil tu'n wule; ex o til ex o tzalajxix ti'j, chi Jesús kye.

⁵⁷Xitzun kyma'n xjal judiy te Jesús: —Na'nx tjapun 50 ab'q'i tu'na, ¿ex opetzun tila Abraham? Che chi.

⁵⁸Xitzun tma'n Jesús kye: —Ax tok kxel nma'ne kyeye, na'nxtoq tul itz'j Abraham atintoqwe.

⁵⁹Jawtzun kytzyu'n xjal judiy ab'j tu'n tok kyxo'n ti'j Jesús; ex xi tewan tib' Jesús ex etz tuj tja Dios; etztzun kyxol, ex ik'tzun.