Read kumam Juan 9 Bible Online

Juan 9 - kumam bible

Juan 9

¹Kyja'toq t-xi' Jesús tuj b'e, o til jun xjal moẍ titz'jlenx.

²Xitzun kyqanin t-xnaq'tzb'en te: —Xnaq'tzal, ¿alkye o b'inchan il tu'nju itz'j xjal lu moẍ? ¿Axpelo o b'inchan il, ex qa aqe tman? Che chi.

³Xi ttzaq'we'n Jesús: —Aju xjal lu moẍ tej titz'j ex mya tu'nju o b'inchan il ex mya tu'nju aqe tman e b'inchan il; noq o'kx tu'n tyek'unjtz tipumal Dios ti'j.

⁴Il ti'j tu'n nb'inchanteye taq'un ju tzaj samante weye akux atx q'ij; tzul qonik'an mi jun xjal jaku b'ant tu'n taq'nantl.

⁵Akux atine twitz tx'otx', spik'un qine kye xjal.

⁶Tej tmante Jesús jlu, kub' ttzub'an twitz tx'otx' ex b'aj tb'incha'n ch'in xoq'l tu'n ta'l ttzi', ex ok t-su'n ju xoq'l ti'j twitz moẍ,

⁷ex xi tma'n te: —Txi'ya tx'jol twitza tuj matij pil Siloé tb'i, chi Jesús, (atzun in tma'n yol lu, Sama'n). Xi'tzun ju xjal ex el ttx'jo'n twitz, ex ajtz meltz'aj otoq b'ant tke'yin.

⁸Atzun kye vesin ex qeju otoq kyil nej qa moẍtoq, kyma: —¿Myapelo a xjal lu aju in kub' qe' mo'l?

⁹Kymatzun junjun: —Atzun. Ex kyma junjuntl: —Mer ik tza'n ate, pero mya'. Atzunte xjal tma: —Aqine.

¹⁰Xitzun kyqanin te: —¿Tza'ntzun tten ma jaqet twitza?

¹¹Xi ttzaq'we'n ju xjal: —Aju xjal Jesús tb'i xb'aj tb'incha'n ch'in xoq'l ex sok t-su'n ti'j nwitze ex saj tma'n weye: Txi'ya, ex tx'jo'mel twitza tuj pil Siloé. Ẍinxtzune ex sel ntx'jo'ne nwitze, ex ma jaqet nwitze.

¹²Xitzun kyma'n xjal te: —¿Jatum ta' ju xjal lu? Atzunte xjal tma: —Minti' b'a'n wu'ne.

¹³Aju xjal moẍtoq nej, xi q'i'n kyu'n xjal kywitz fariseo.

¹⁴Tuj q'ij te ojlab'ltoq tej tb'aj tb'incha'n Jesús ju xoq'l ex jaqet twitz ju xjal tu'n.

¹⁵Kyja'tzun ax ikx qe fariseo xi kyqanin te tza'n tten otoq jaqet twitz. Xitzun tma'n xjal kye: —Sok tq'o'n Jesús ch'in xoq'l ti'j nwitze, ex ma tz'el ntx'jo'ne ex in ke'yin nwitze ja'lo.

¹⁶Kymatzun junjun fariseo: —Aju xjal xb'inchante jlu myatzun tzajni tuk'il Dios porke mya niman tu'n aju q'ij te ojlab'l. Atzun junjuntl kyma: —¿Tza'n tten tu'n kyb'ant qe señ lu tu'n xjal qa aj il? Che chi. Kyja'tzun tzaj jun yol kyxolx.

¹⁷Xitzun kyma'n juntl maj teju xjal moẍtoq nej: —¿Chi toktzun tu'na ti'j ju xjal ma jaqet twitza tu'n? Atzunte tma: —T-sanjel Dios te xjal lu.

¹⁸Ex minti' xi kyoksla'n xjal judiy qa moẍtoq nej ex otoq jaqet twitz. Maxitzun xi kyoksla'n tej kytxket qe tman ju xjal otoq jaqet twitz.

¹⁹Xitzun kyqanin kye tman: —¿Apetzun kyk'wa'le jlu aju in kyma'ne qa moẍtoq titz'jlenx? ¿Tza'ntzun tten ma b'ant tke'yin ja'lo? Che chi.

²⁰Xitzun kytzaq'we'n qe tman: —B'a'n qu'ne atzun qk'wa'le jlu, ex b'a'n qu'ne moẍ titz'jlenx;

²¹pero minti' b'a'n qu'ne tza'n tten ma b'ant tke'yin ja'lo; ex minti' b'a'n qu'ne alkye ma jaqonte twitz. Kyqaninxe te porke ma pon tab'q'iyil; axte kq'malte, che chi.

²²Atzun jlu xi kyma'n tman tu'nju in che xob'toq kywitz xjal judiy; tu'nju otoq b'ant ti'j kyu'n judiy qa at jun xjal ma yolin qa ate Jesús ju Crist aju at toklen tu'n Dios, b'i'x tu'n tetz lajet tuj ja te k'ulb'il.

²³Tu'ntzunju kyma qe tman: Kyqaninxe te porke ma pon tab'q'iyil, che chi.

²⁴Txkettzun juntl maj kyu'n fariseo aju xjal moẍtoq nej, ex xi kyma'n te: —Twitz Dios q'mantza jun yol axix tok; b'a'n qe qu'n ate xjal lu aj il.

²⁵Xitzun ttzaq'we'n ju xjal: —Minti' b'a'n wu'ne qa aj il ex qa mi'n; pero at jun b'a'n wu'ne, moẍtoq qine nej, atzun ja'lo ma b'ant nke'yine.

²⁶Xi kyqanin juntl maj te: —¿Ti xtb'incha ti'ja? ¿Tza'n tten xjaqet twitza tu'n?

²⁷Xitzun ttzaq'we'n xjal: —Ma txi nma'ne kyeye ex minti' in xi kyb'i'ne; ¿tiqu'n kyajb'ile tu'n kyb'inteye juntl maj? ¿Kyajpeye tu'n kyoke te t-xnaq'tzb'en? Chi xjal.

²⁸E oktzun ten yasul ti'j: —Aya t-xnaq'tzb'en xjal lu, atzun qeye t-xnaq'tzb'en Moisés qo'ye.

²⁹B'a'n qe qu'n, ate Dios o yolin tuk'il Moisés; atzunte xjal lu, minti' b'a'n qu'ne jatum tzajni, che chi.

³⁰Xitzun ttzaq'we'n ju xjal. —Ma'xix t-xilen jlu. Minti' b'a'n kyu'ne jatum tzajni, atzun weye ma jaqet nwitze tu'n.

³¹B'a'n qu'n minti' in che tzaj tb'i'n Dios qe xjal aj il; ex qa at jun xjal at tchi Dios tuj twitz ex in tb'incha'n aju tajb'il, atzunju in tzaj tb'i'n Dios.

³²Atxix t-xe tnejel ojtxi b'ajx qb'i qa at jun xjal moẍ titz'jlenx in jaqet twitz tu'n juntl xjal.

³³Noqwit mya tuk'il Dios tzajni xjal lu, miwtlo jun jaku b'ant tu'n, chi xjal.

³⁴Xitzun kytzaq'we'n qe fariseo: —Aj ilxixa atxix tej titz'ja, ¿apetzuna kxnaq'tzal qeye? Che chi. Ex b'i'x ex kylajo'n.

³⁵Tb'itzun Jesús qa otoq tz'ex lajo'n xjal kyu'n, ex tej tknet xjal tu'n, xi tma'n te: —¿Oksla'npe tu'na aju xjal ma tzaj sama'n tu'n Dios tu'n tten kyuk'il xjal?

³⁶Xi ttzaq'we'n ju xjal: —Tat, q'mantza weye alkye, tu'ntzun wokslane ti'j.

³⁷Xitzun tma'n Jesús te: —Matzun tila xjal lu; aqine in chin yoline tuk'ila.

³⁸Xitzun tma'n ju xjal: —Chin okslale, Tat. Ex kub'tzun ẍmeje' ok ten k'ulul twitz Jesús.

³⁹Tmatzun Jesús: —Aqine ma chin ule twitz tx'otx' tu'n tel kyil xjal tuj q'ancha'l, tu'ntzun tb'ant kyke'yin qeju mib'an che ke'yin, ex tu'n tmoẍix kywitz qeju in che ke'yin.

⁴⁰Tejtzun kyb'inte junjun fariseo ate'toq tuk'il, xi kyma'n te: —¿Maj ikx qeye moẍ qo'ye?

⁴¹Xi ttzaq'we'n Jesús: —Noqwit moẍ qeye, minti'wtlo kyile; ex ja'lo kukx atx kyile, porke in kyma'ne: In qo ke'yine.