Read kumam Hechos 1 Bible Online

Hechos 1 - kumam bible

Hechos 1

¹Aya Teófilo, tuj tnejel wu'je xi ntz'ib'ane ti'j tkyaqilju o tb'incha Jesús ex ti'j ju xnaq'tzb'il xi tq'o'n t-xe tnejel.

²O'kxtzun we' tu'n tq'onte xnaq'tzb'il tej taj q'i'n tuj kya'j. Ex na'nxtoq taj tuj kya'j e jaw t-sk'o'n qe apostol, ex tu'n Xewb'aj Xjan xi tma'n kye alkye tu'n kyb'inchante.

³Ex tkyimlenxi Jesús, kub' tyek'un tib' kywitz itz' te; ax tok jlu, porke o kyil apostol, nimku maj kub' tyek'un tib' Jesús kywitz tuj 40 q'ij, ex in yolintoq kyuk'il ti'j tkawb'il Dios.

⁴Atxtoq Jesús junx kyuk'il apostol xi tma'n kye tu'n mi'n kyex tuj Jerusalén. —Ax che ayone ti'j ju tziyimaj kyeye tu'n Nmane, aju ma kyb'iye weye.

⁵Porke ax tok ate Juan o che b'yan xjal tu'n tuj a'; atzun kyeye ch'ix tul kanun q'ij tu'n kyb'yane tu'n Xewb'aj Xjan, chi Jesús xi tma'n kye.

⁶Atzun kye apostol kyb'uyintoq kyib' tuk'il Jesús xi kyqanin te: —Tat, ¿apetzun tq'ijlalil ja'lo tu'n ttzaj tq'o'ntla kyoklen aj Israel tu'n kykawin juntl maj kyxolx? Che chi.

⁷Xi ttzaq'we'n Jesús: —Minti' kyoklene ti'j tu'n kyb'inteye jtoj tu'n tb'ant jlu ex alkye q'ij; ate Nmane tajaw ex ximamajtl tu'n alkye q'ij tu'n tb'inchante.

⁸Ex ok tul Xewb'aj Xjan kyuk'ile, ok kyk'ma'ye kyipumale, ex che okele testiw wi'je tuj tnam Jerusalén, tuj tkyaqil tx'otx' Judea, tuj tx'otx' Samaria, ex tuj tkyaqil twitz tx'otx', chi Jesús kye.

⁹Tej tb'aj tma'n Jesús jlu, matoq in che ke'yin apostol ti'j, jaw q'i'n Jesús kywitz, aj q'i'n tuj muj ex minti'tl o kyil.

¹⁰In che ke'yintoq twitz kya'j kyja'toq tjax laq'e' Jesús, o kyil kub' kyyek'un kyib' kab'e xinaq e kub' we' kytxlaj, tok kyxb'alun saq ke'yin.

¹¹Kymatzun qe xinaq kye: —Aqeye xinaq aj Galilea, ¿tiqu'n in xi kyke'yine twitz kya'j? Axte Jesús aju xjaw q'i'n kywitze tu'n t-xi' tuj kya'j, ikxtzun tzul ik tza'n xkyile xi' tuj kya'j.

¹²Atzun kye apostol e ajtz meltz'aj twi witz Olivos tb'i, e pon tuj Jerusalén, niqayin kyxol, b'alo jun kilómetro.

¹³Tejtzun kypon tuj tnam e jax tuj tkab' kolin ja, jatum in che posadiyintoq kykyaqil, Pedro tuk'ix Jacobo, tuk'ix Juan, tuk'ix Andrés, tuk'ix Felipe, tuk'ix Tomás, tuk'ix Bartolomé, tuk'ix Mateo, tuk'ix Jacobo aju tky'ajal Alfeo, tuk'ix Simón aju toktoq te tajlal kyxol jun partid xjal cananista kyb'i ex tuk'ix Judas aju titz'in Jacobo.

¹⁴Kykyaqil qe jlu kukx nno'k kychmon kyib' tu'n kyna'n Dios, kyuk'ix qe xu'j, tuk'ix Mariy aju ttxu' Jesús, ex kyuk'ix qe titz'in Jesús, junx kyximb'etz kykyaqil.

¹⁵Kyujx qe q'ij lu jaw we' Pedro kyxol qe erman, atzun kyajlal b'aj kychmon kyib' b'alo 120, ex xi tma'n Pedro:

¹⁶—Aqeye erman, ilxix ti'j tu'n tjapun aju tz'ib'an tuj Tu'jil jatum o yolin David tu'n Xewb'aj Xjan ti'j Judas, ate Judas kub' nej kywitz qeju e tzaj tzyunte Jesús;

¹⁷porke tuk'ix Judas ok te tajlal qxole, ex tk'am toklen tu'n taq'nan quk'ile.

¹⁸Ate jlu laq'et jun piẍ tx'otx' tu'n tu'nju twi' tk'u'j tk'am tej tb'inchante mya b'a'n; ex tzaj t-xon tib' pich'l tten, b'i'x el sb'it'j tk'u'j, ex b'i'x etz chitpaj tkyaqil tuj tk'u'j.

¹⁹Ex el tqanil jlu kyxol kykyaqil xjal najl tuj Jerusalén, kyja'tzun Acéldama tb'i ju tx'otx' lu ok kyq'o'n tuj kyex kyyol, atzun in tma'n ju yol lu: Tx'otx' twi' chik'.

²⁰Tu'nju at jun yol tz'ib'an tuj Salmo, chi kyja': Tz'okwit tnajb'il minti' xjal tuj, ex mi junwt xjal ten tuj. Ax ikx in tma'n: Juntlxwit txi k'monte toklen, chi tuj Tu'jil.

²¹Kyja'tzun ilxix ti'j tu'n tjaw sk'et jun erman kyxol qe xinaq o che ten junx quk'il tkyaqil q'ij tej tten Qajaw Jesús qxol,

²²ex o che ten quk'il atxix tej tb'yan Jesús tu'n Juan tuj a', ex ate'x quk'il tej tjaw q'i'n Jesús qxol tu'n t-xi' tuj kya'j; ilxixtzun ti'j tu'n tjaw sk'et jun erman kyxol qe jlu tu'n tok te testiw junx quk'il ti'j tjawlen anq'in Crist, chi Pedro xi tma'n kye.

²³E yolintzun kyi'j kab'e xinaq alkye jun tu'n tkyaj: A José Barsabás aju Justo tkab'in tb'i, ex tuk'ix Matías.

²⁴Ex e na'n Dios, kyma: —Aya Tat, ojtzqi'n tu'na kyanmi kykyaqil xjal, yek'untza alkye sk'o'maj tu'na kyxol kab'e xinaq lu

²⁵tu'ntzun tajb'en tuj aq'untl lu ex tu'n tok te apostol te t-xel Judas, porke tu'n tlaj kub' tz'aq Judas tuj il el tpa'n tib' tu'n tpon tuj tex tlugar, che chi.

²⁶Jawtzun kyi'n swert ti'j alkye tu'n tkyaj, ate Matías kyaj, ex ok te tajlal kyxol junlajtl apostol.