Read kumam Hechos 12 Bible Online

Hechos 12 - kumam bible

Hechos 12

¹Tujx tq'ijlalil lu e tzyettzun junjun okslal tu'n rey Herodes tu'n kyk'ixb'isanjtz.

²Ex xi tma'n Herodes tu'n tkub' b'yo'n Jacobo tu'n spad, aju ttzik Juan.

³Ex tej tb'inte qa b'a'n ela jlu tuj kywitz xjal judiy, ax ikx xi tma'n tu'n ttzyet Pedro. Atzun ninq'ij tu'n t-xi kywa'n xjal pan minti' t-samel tuj tu'n tjaw mal tk'u'j.

⁴Tejtzun ttzyet Pedro tu'n Herodes, okx tq'o'n tuj pres, ex xi tq'o'n tuj kykwent kyaje k'loj soldad tu'n tok kyxq'uqin, te kyajkyaj soldad junjun k'loj. Kub' t-ximan Herodes tu'n tetz ti'n tuj pres tb'ajlenxi Xjan Q'ij, tu'ntzun tkub' tq'o'n kywitz xjal.

⁵Kyja'tzun o xq'uqinjtz Pedro tuj pres, atzun kye okslal minti' e q'ajen tu'n kyna'n Dios ti'j.

⁶Nchi'jtoq tu'n tetz q'i'n Pedro tu'n Herodes tu'n tkub' tq'o'n kywitz xjal, lu te Pedro in tan kyxol kab'e soldad te qonik'an, k'alo'n tu'n kab'e caden, ax ikx ate' soldad in che xq'uqin twitz tlamel ja jatum ate' qe pres.

⁷Ex ul naj jun t-anjel Qajaw, kub' we' ttxlaj Pedro, ex at jun spik'un kub' qoptz'aj tuj pres; oktzun tmako'n anjel ttxlaj t-xu'k Pedro, jaw tk'asun, ex xi tma'n te: —Juratx we'ktza. Atzun qe caden e je'l tz'aq ti'j tq'ab' Pedro.

⁸Xitzun tma'ntl anjel te: —K'alo'nk tk'u'ja ex q'o'nk t-xajb'iya. Ex tb'inchatzun Pedro ikju. Xitzun tma'ntl anjel te: —B'alq'i'nk ttxo'wa ti'ja, ex lpe'tza wi'je.

⁹Etztzun Pedro, ok lpe' ti'j anjel; ex minti' el tnik' ti'j qa axix tok aju tb'incha anjel, tuj tnab'l Pedro qa in witzky'an.

¹⁰E je'tztzun kywitz tnejel xq'uqil ex kywitz tkab'in; tejtzun kye'lel twitz ju tlamel k'uxb'il tetz ttzi cay, jaqettzun tlamel tu'nx tib'; ex tej kyetz, e je'x b'et ch'in tuj jun cay, ex eltzun tpa'n naj tib' anjel ti'j.

¹¹Eltzun spik'e'xix tuj twitz Pedro, ex tma: —Matzun tz'el nnik'e ti'j ja'lo ax tok ma tzaj t-sama'n Qajaw t-anjel ex ma chin etz tzoqpi'ne tu'n tjaq' tkawb'il Herodes, tu'ntzun mi'n tb'inchanjtz wi'je aju in che ximan xjal judiy ti'j tu'n kyb'inchante, chi Pedro.

¹²Tejtzun tel tnik' Pedro ti'j jlu, xi'tzun tja Mariy aju ttxu' Juan aju Marcos tkab'in tb'i, jatum kyb'uyintoq kyib' nimku xjal in che na'n Dios.

¹³Tejtzun tok tq'ajtza'n Pedro tlamel ja te txa'n pe'n, etztzun jun txin Rode tb'i, ke'yil te alkye in q'ajtzan.

¹⁴Eltzun tnik' txin ti'j tq'ajq'ajel twi' Pedro, ex minti' okx tjaqo'n tlamel ja tu'n tzalajb'il, noq o'kx aj qelan tuja q'malte tqanil qa wa'ltoq Pedro ttzi ja.

¹⁵Atzun kye okslal xi kyma'n te txin: —B'alo tuj twitza ma tzaj. Ex ate txin o tkyuwsaxix qa ax tok. Atzun kye kyma: —Mya ate Pedro ma tzul; b'alo noq t-anjel, che chi.

¹⁶Atzunte Pedro kukxtoq tok tq'ajtza'n tlamel ja; tejtzun tjaqet tlamel ja kyu'n ex tej kyke'yinte, b'i'x naj kynab'l.

¹⁷Atzunte Pedro xi tyukun tq'ab' tu'n kyq'ajen, ex xi ttx'olb'a'n kye tza'n tten otoq tz'etz q'i'n tu'n Qajaw tuj pres. Ex xi tma'n kye: —Kyq'onxe tqanil jlu te Jacobo ex kye erman, chi Pedro. Etztzun, ex xi' tuj juntl lugar.

¹⁸Tejtzun qsqix, e jaw tilj qe soldad in che yolin ti'j tza'n otoq txi' Pedro.

¹⁹Atzunte Herodes xi tma'n tu'n kyok ten jyolte Pedro, ex minti' knet kyu'n, e oktzun qe soldad tuj xjel tu'n, ex xi tq'o'n orden tu'n kykub' b'yet. Etztzun Herodes tuj Judea ku'pun tuj Cesarea, ex axtzun kyaj ten.

²⁰Tzajtzun tq'oj Herodes kyi'j xjal aj Tiro ex aj Sidón; atzun kye moje' kyyol ex e ultzun tuk'il; ex kub' ti'j tnab'l Blasto kyu'n, aju tnejel kwentil tuj tja rey Herodes, xi kyqanin tu'n mi'n tq'ojintl rey kyi'j, ex atzun in tzaj kywa tuj tx'otx' jatum in kawin rey.

²¹Tejtzun tpon q'ij aju q'ma'maj tu'n Herodes tu'n kypon xjal, oktzun tq'o'n t-xb'alun tb'anilxix, kub' qe' tuj tq'uqb'il jatum in kawin, ex ok ten yolil kyuk'il xjal.

²²Atzun kye xjal jaw tq'ajq'ajel kywi' kyuwxix ex kyma: —Tq'ajq'ajel twi' jun dios te jlu, mya te jun xjal, che chi.

²³Ex jurat k'ixb'isanjtz Herodes tu'n jun t-anjel Qajaw, tu'nju minti' jaw tnimsa'n tb'i Dios; in che wa'ntoq ẍuq' ti'j tchib'jal, ex kyimtzun.

²⁴Atzunju tyol Dios mas in xi kyoksla'n xjal ex in pakb'anjtz tuj tkyaqil lugar.

²⁵Atzunte Bernabé tuk'ix Saulo e ajtz meltz'aj t-xilenxi kyq'o'n ju oyaj tuj Jerusalén, ex tzaj kyi'n Juan kyuk'il, aju Marcos tkab'in tb'i.