Read kumam Hechos 13 Bible Online

Hechos 13 - kumam bible

Hechos 13

¹Ate'toq t-sanjel Dios ex xnaq'tzal kyxol okslal tuj tnam Antioquía. Atzun qe jlu: Bernabé, tuk'ix Simón (aju Q'eq xjal tb'i kyu'n xjal), tuk'ix Lucio aju aj Cirene, tuk'ix Manaén (aju junx o ch'iysanjtz tuk'il Herodes aju gobernador) ex tuk'ix Saulo.

²In che k'uluntoq jlu te Qajaw, ex in kub' kyyo'n we'yaj, tzaj tma'n Xewb'aj Xjan kye kyja': —Kypa'mile Bernabé tuk'ix Saulo te weye, porke ma che txkonjtz wu'ne tu'n kyajb'en tuj aq'untl, chi Xewb'aj Xjan.

³Tkub'lenxitzun kyyo'n we'yaj ex kyb'ajlenxi na'n Dios, kub'tzun kyq'o'n kyq'ab' tib'aj kywi', ex e je'xtzun kysama'n.

⁴Atzunte Bernabé tuk'ix Saulo e je'x sama'n tu'n Xewb'aj Xjan, e pon tuj tnam Seleucia, atzun e je'x tuj barc, e pon tuj jun tx'otx' Chipre tb'i.

⁵Ex tej kypon tuj tnam Salamina, xi kypakb'a'n tyol Dios kyuj ja te k'ulb'il kye xjal judiy. Ex tuk'ix Juan uk'in kyu'n te onil kye.

⁶Ex b'aj kyb'etin tuj tx'otx' Chipre, e pon tuj tnam Pafos; ex atzun ok noj jun xjal judiy kywitz, Barjesús tb'i, chman te xjal lu ex in tma'n qa t-sanjel Dios te, ex nik'al yol.

⁷Axtoq ta' chman lu tuk'il gobernador Sergio Paulo tb'i, ex at-xix tnab'l gobernador lu. Txkettzun Bernabé tuk'ix Saulo tu'n gobernador ex tajb'il tu'n tb'inte tyol Dios.

⁸Atzunte chman, aju Elimas juntl tb'i tuj yol griego, ok ten maqolte tu'n mi'n t-xi toksla'n gobernador.

⁹Atzunte Saulo, aju ax Pablo tb'i, nojni tuj tanmi tu'n Xewb'aj Xjan, ok tke'yinxix ti'j chman,

¹⁰ex xi tma'n te: —Aya, nimxix in sb'una ex nimxix mya b'a'n in tb'incha'na, ex tk'wa'l tajaw ila, ex aj q'oja ti'j tkyaqilju b'a'n. ¿Tiqu'n minti' in kyaj tkolina tu'n t-ẍoksanteya qe tb'e Qajaw jiqun kyi'j?

¹¹Ja'lotzun, kb'el tcastiwoya tu'n Qajaw; k'okela moẍ, ex ela' q'ij ktela mlay b'ant tu'n tok tke'yina tqan q'ij, chi Saulo. Ex jurat naj kub' qloljxix tuj twitz, in takpaje', ex in jyon ti'j alkye tu'n t-xi lach'on te.

¹²Atzunte gobernador, tej tke'yinte jlu okslantzun, porke in lab'in ti'j ju xnaq'tzb'il ti'j Qajaw.

¹³E etztzun Pablo kyuk'ix qe tuk'il tuj tnam Pafos, e okx tuj barc tu'n kypon tuj tnam Perge tuj tx'otx' Panfilia; atzunte Juan el tpa'n tib' kyi'j, aj meltz'aj juntl maj tuj Jerusalén.

¹⁴E ik'tzun tuj Perge, e pon tuj tnam Antioquía tuj tx'otx' Pisidia; e okxtzun tuj ja te k'ulb'il tuj q'ij te ojlab'l ex e kub' qe'.

¹⁵Tb'ajlenxitzun sch'i'n tuj tu'jil ley ex tuj kyu'jil t-sanjel Dios, atzun kye nejenel tuj ja te k'ulb'il tzaj kysama'n jun xjal q'malte kye Pablo kyja': —Aqeye erman, qa at jun kyyole te q'ob'l kynab'l xjal, kymantze, che chi.

¹⁶Jawtzun we' Pablo, xi tyek'un tq'ab' tu'n mi'n kyq'ajt, ex tma: —Aqeye xinaq aj Israel, ex aqeye xjal mya judiy in che xob'e twitz Dios, kyb'intze nyole.

¹⁷Aj Israel qo', aju Qdios jaw sk'onte kye qxe'chel, ex e chmet-xix qxjalil tej kyten tuj tx'otx' Egipto jatum e ten te stranjer xjal; ex tu'n tipumal Dios e je'tz ti'n tuj Egipto.

¹⁸Ex 40 ab'q'ilo ten tpasens Dios kyi'j tuj lugar minti' kynajb'il xjal tuj;

¹⁹ex tej kynaj wuq nasyon tu'n Dios tuj tx'otx' Canaán, xi tq'o'n kytx'otx' xjal aj Canaán te kyetzb'il qxe'chel.

²⁰Te tib'ajxitzun, ok tq'o'n Dios qe jwes kyxol, b'alo kyaje syent tuk'il 50 ab'q'i e ten jwes, o kanun ti'j Samuel aju t-sanjel Dios.

²¹Xitzun kyqanin tu'n tok jun kyrey, ex tzaj tq'o'n Dios jun kyrey Saúl tb'i, aju tky'ajal Cis ex ok te kyrey, ate xinaq lu tiyjil Benjamín, ex o ten 40 ab'q'i te kyrey.

²²Tej tel q'i'n jlu, ok tq'o'n Dios juntl kyrey aju David tb'i; ex o yolin Dios ti'j: Ma tz'el nnik'e ti'j David aju tky'ajal Isaí, ate jlu jun xinaq ik tza'nx wajb'ile, ok tb'incha' tkyaqil alkye wajb'ile, chi Dios.

²³Ti'jtzun tiyjil David ul itz'j Jesús aju tzaj sama'n tu'n Dios tu'n tok te Kolol kye aj Israel, ik tza'nx otoq tzaj ttziyan.

²⁴Na'nxtoq tul Jesús, xi tpakb'a'n Juan kye kykyaqil aj Israel tu'n kyb'yan ex tu'n tajtz ti'j kyanmi.

²⁵Tej ch'ixtoq tjapun b'aj taq'un Juan, tma: ¿Alkye qine tuj kynab'le? Mya we qin aju Crist; ex lu jun xjal lepchix ttzaj wi'je mya b'a'n qine tu'n tel npaju'ne taq'al t-xajab' ti'j tqan, chi Juan.

²⁶Erman, aqeye tiyjil Abraham, ex qe xjal mya judiy ate' kyxole in che xob' twitz Dios: te qe ma tzaj q'o'n ju yol lu te kolb'il.

²⁷Porke qe xjal najl tuj Jerusalén kyuk'ix qe nejenel kyxol, minti' el kynik' ti'j Jesús, ex minti' el kynik' ti'j aju in tma'n tuj kyu'jil t-sanjel Dios, aju in jaw sch'i'n tuj tkyaqil q'ij te ojlab'l; ex o japun kyu'n aju tz'ib'an tuj Tu'jil tej tkub' t-sentens Jesús kyu'n.

²⁸Ex maske minti' knet jun til kyu'n tu'n tkyim, pero xi kyqanin te Pilato tu'n tkub' b'yet.

²⁹Ex tjapunlenxitzun b'aj tkyaqil kyu'n aju tz'ib'amaj ti'j tuj Tu'jil, ku'tztzun kyi'n twitz crus, ex okx kyq'o'n tuj jun pantyón.

³⁰Ex tu'n Dios jaw anq'in kyxol kyimni.

³¹Ex nimku q'ij kub' tyek'un tib' Jesús kywitz qeju e tzaj tuk'il tuj Galilea e pon tuj Jerusalén; atzun qe jlu ma che ok te testiw ti'j kywitz xjal ja'lo.

³²Ax ikx qeye in xi qma'ne b'a'n tqanil kyeye ti'j ju yol tzaj ttziyan Dios kye qxe'chel.

³³Aqo' kyiyjil xjal lu, kyja'tzun ma tzaj tq'o'n Dios qe aju tziyimaj tu'n kye qxe'chel, porke ma jaw anq'in Jesús tu'n; ik tza'n tz'ib'an tuj tkab'in salmo in tma'n: Aya nky'ajale, ma chin oke te tmana ja'lo, chi tuj Tu'jil.

³⁴Ex ma jaw anq'in Jesús tu'n kyxol kyimni tu'n mi'n ttzuwix t-ximlal. Ti'jtzun jlu tma Dios kyja': Kjapunel wu'ne kyeye aju yol axix tok xi ntziyane te David, tu'n kykub' nky'iwla'ne, chi Dios tuj Tu'jil.

³⁵Kyja'tzun in tma'n tuj juntl salmo: Mlay kyaj tq'o'na tu'n ttzuwix nximlale, aqine tmajena nimal teya, chi tuj Tu'jil.

³⁶Ex ax tok ate David ajb'en kye t-xjalil ik tza'nx tajb'il Dios, ex kyimtzun, ex ku'x maqu'n kytxlaj qe tman, ex tzuwix t-ximlal.

³⁷Atzunte Jesús minti' tzuwix t-ximlal, porke jaw anq'in tu'n Dios.

³⁸Tz'elxtzun kynik'e ti'j jlu, aqeye erman: In xi qma'ne tqanil kyeye, noq tu'n Jesús knajsetel kyile.

³⁹Minti' tumel tu'n tnajset kyile tu'n tley Moisés, atzun ja'lo kykyaqil qeju ma che okslan, knajsetel kyil tu'n Jesús.

⁴⁰Kyq'o'nktzune kwent ti'j tu'n mi'n ttzaj kyib'aje aju in tma'n tuj kyu'jil t-sanjel Dios, chi kyja':

⁴¹Kyb'intze, aqeye xmayil, ex che lab'ine ti'j, ex kykub' naje; tu'nju at jun ti'xti ok nb'incha'ye tuj kyq'ijlalile, ex mlay txi kynimane, maskelo at jun ma q'mante kyeye, chi tuj Tu'jil, chi Pablo.

⁴²Tejtzun kyetz Pablo tuj ja te k'ulb'il kye xjal judiy, e kub'san qe txqantl xjal mya judiy kywitz tu'n kypontl kyuk'il tuj juntl q'ij te ojlab'l tu'n kyyolin ch'intl ti'j jlu.

⁴³Ex tej kyetz pax xjal tuj ja te k'ulb'il, nimku xjal judiy e ok lpe' ti'j Pablo ex ti'j Bernabé kyuk'ix qeju otoq kyoksla kyley judiy ex nimal Dios qe. Oktzun ten Pablo ex Bernabé yolil kyuk'il, xi kyq'o'n kynab'l ex ax tu'n kyten tuj t-xtalb'il Dios.

⁴⁴Tuj juntl q'ij te ojlab'l ok kychmon kyib' kykyaqil xjal tuj tnam tu'n kyb'inte tyol Dios, nik'xi junjun minti' pon.

⁴⁵Tejtzun kylonte xjal judiy nim xjal otoq tz'ok kychmon kyib', tzaj tlo'ch kyk'u'j, ex e ok ten maqolte aju in tma'n Pablo, in kyma'n qa mya ax tok, ex in che yasun ti'j.

⁴⁶Atzunte Pablo tuk'ix Bernabé e yolin minti' kyxob'il: —Ax tok, che chi, tnejel ilxix ti'j tu'n t-xi qma'ne tyol Dios kyeye aqeye xjal judiy; ex ma tz'el kyik'une, ex kyk'i'ye kyk'ame aju chwinqlal te jumajx, kyja'tzun qo xe'le kyxol txqantl xjal mya judiy qe.

⁴⁷Porke iktzun tten tzaj tma'n Qajaw qeye: Aya ma kub' nq'o'ne te jun spik'un kye xjal kyuj txqantl nasyon, tu'ntzun t-xi tma'na tuj tkyaqil twitz tx'otx' aju kolb'il wu'ne, chi Qajaw, chi Pablo.

⁴⁸Tejtzun kyb'inte txqantl xjal jlu, aqeju mya judiy, e jaw tzalaj ex e yolin ti'j qa b'a'n te Qajaw tyol; ex e okslan kykyaqil qeju sk'o'maj tu'n tten kychwinqlal te jumajx.

⁴⁹Atzunju tyol Qajaw nne'l laq'e'toq tqanil tuj tkyaqil lugar te Pisidia.

⁵⁰Ex qe xjal judiy e ok ten oksalte kyk'u'j qe xu'j nimal Dios ex at kyoklen, ax ikx qe kytijil xjal tuj tnam, ex e ok ten q'ojlel ti'j Pablo ex ti'j Bernabé, ex e ex kylajo'n tuj kytanmi.

⁵¹Atzunte Pablo tuk'ix Bernabé el kychto'n quq ti'j kyqan te jun yek'b'il kyi'j xjal qa mya b'a'n qe, ex e je'x tuj tnam Iconio.

⁵²Atzun qe okslal nimxix in che tzalaj ex nojni tuj kyanmi tu'n Xewb'aj Xjan.