Read kumam Hechos 14 Bible Online

Hechos 14 - kumam bible

Hechos 14

¹Junxtzun e okx Pablo tuk'ix Bernabé tuj ja te k'ulb'il kye xjal judiy tuj tnam Iconio, e yolintzun tuj tumelxix, kyja'tzun e okslan nim xjal, qe xjal judiy ex qe xjal mya judiy.

²Atzun kye xjal judiy mya okslal qe, b'aj kytzpet-sa'n kynab'l txqantl xjal mya judiy qe tu'n kyq'ojin kyi'j erman.

³Kyja'tzun ax e ten apostol nim q'ij, in che yolin minti' in che xob', q'uql kyk'u'j ti'j Qajaw; ex tzaj tyek'un Qajaw qa ax tok ju yol ti'j t-xtalb'il Dios, tzaj tq'o'n kyoklen apostol tu'n kyb'inchanjtz qe señ ex qe b'inchb'en nim kyipumal.

⁴Atzun kye xjal tuj tnam attoq jun pab'l tib' kyxol; jun k'loj in che ok lpe' kyi'j qe xjal judiy, ex juntl k'loj kyi'j apostol.

⁵Tu'n jlu b'ant ti'j kyu'n xjal judiy kyuk'ix txqantl xjal mya judiy qe ex qe nejenel kyxol, tu'n kyyajlanjtz apostol kyu'n ex tu'n kyok kyxo'n tu'n ab'j.

⁶Ex tej kyb'inte apostol jlu, e ex oq e pon tuj tnam Listra ex tuj tnam Derbe, ex kyuj txqantl tnam ti'jele, atzun ate' tnam lu tuj tx'otx' Licaonia,

⁷ex atzun e pakb'an ti'j tqanil kolb'il.

⁸Ex at jun xjal aj Listra minti' tipun tqan tu'n tb'et, q'uqltoq porke kox titz'jlenx, ex minti' b'ant ch'in tb'et.

⁹Tb'itzun xjal lu in yolin Pablo, atzunte Pablo ok tke'yinxix, ex tej tlonte qa at tokslab'l xjal tu'n tb'anix,

¹⁰jaw tq'ajq'ajel twi' Pablo kyuw ex tma: —We'ktza, jiqumanx ti'ja, chi Pablo. Atzunte kox jaw t'ikpaj ex ok ten b'etel.

¹¹Tejtzun kyke'yinte xjal aju tb'incha Pablo, e jaw sch'in in kyma'n tuj kyyol xjal aj Licaonia: —Ma che k'u'l dios quk'ile, ik che ke'yin ik tza'n qe xjal.

¹²Oktzun kyq'o'n tb'i Bernabé Júpiter, atzunte Pablo ok kyq'o'n tb'i Mercurio,[1] tu'nju ate Pablo o yolin.

¹³Atzun tja dios Júpiter tkub' ttxa'n tnam; atzunte pal teju dios Júpiter pon ti'n kab'e tor tuk'ix b'ech ttzi tlamel tnam, ex o tajb'e pal ex qe xjal tu'n kykub' qe wakẍ te jun oyaj kywitz apostol.

¹⁴Tejtzun kyb'inte Bernabé tuk'ix Pablo jlu, el kysb'it'un kyxb'alun, e okx qelan kyxol xjal ex jaw tq'ajq'ajel kywi' kyuwxix:

¹⁵—Aqeye xinaq. ¿Tiqu'n in kyb'incha'ne jlu? Ikx qeye xjal qo'ye ikx tza'n kyeye, ex in xi qpakb'a'ne kyeye tu'n tkyaj kyq'o'ne aju noqx gan, ex tu'n kyok lpe'ye ti'j Dios itz', aju b'inchante kya'j tuk'ix tx'otx' ex tkyaqilju at twitz, tuk'ix mar ex tkyaqilju at tuj.

¹⁶Kyuj qe tq'ijlalil ojtxi xi tq'o'n Dios amb'il kye kykyaqil xjal tu'n kyb'et tuj kyex kyb'e;

¹⁷ex minti' kyaj ten Dios minti'wt testiw ti'j, ex tzaj tq'o'n aju b'a'n kye, ex in ku'tz tq'o'n jb'al qib'aj, ex in tzaj tq'o'n tq'ijlalil tu'n tchmet qawal, ex in tzaj tq'o'n qwa tu'n ttzalaj qanmi, che chi apostol xi kyma'n kye xjal.

¹⁸Penitzun e mayet qe xjal kyu'n apostol tu'nju yol lu, tu'n mi'n tkub' kyb'yo'n qe wakẍ te jun oyaj kywitz apostol.

¹⁹E ultzun junjun xjal judiy tzajni qe tuj Antioquía ex tuj Iconio, kub' ti'j kynab'l xjal kyu'n, oktzun xo'n Pablo tu'n ab'j kyu'n; ex ex kyjawo'n ti'jxi tnam, tuj kynab'l qa otoq kyim.

²⁰Ex b'aj kytxolb'a'n kyib' okslal ti'j, atzunte Pablo jaw we' ex okx tuj tnam; ex te juntl q'ij ex tuj tnam tuk'ix Bernabé, pon tuj tnam Derbe.

²¹Xi kypakb'a'n tqanil kolb'il tuj tnam Derbe, ex nim xjal e okslan; e ajtztzun meltz'aj qe apostol tu'n kyul tuj tnam Listra, ex tuj tnam Iconio, ex tuj tnam Antioquía.

²²In kykyuwsa'ntoq kyanmi qe okslal, ex in kyq'o'ntoq kynab'l tu'n kywe'xix tuj kyokslab'l, ex in kyma'n qa ilxix ti'j tu'n ttzaj nim yajb'il qe, tu'ntzun qokx tuj tkawb'il Dios.

²³Ex oktzun kyq'o'n kyoklen anciano kyxol okslal tuj junjun tnam, ex kyb'ajlenxi na'n Dios ex tkub'lenxi kyyo'n we'yaj, kyajtzun kyoqxenan tuj tq'ab' Qajaw, aju otoq che okslan ti'j.

²⁴E ik'xtzun tuj tx'otx' Pisidia, e pon tuj tx'otx' Panfilia.

²⁵Ex t-xilenxi kypakb'a'n tyol Dios tuj tnam Perge, e ku'pun tuj tnam Atalía.

²⁶E etztzun tuj tnam Atalía, e okx tuj barc tu'n kypon tuj tnam Antioquía, atzun tzaj xe't kyaq'un tuj tnam lu nej, ex ok na'j Dios kyi'j tu'n ttzaj tq'o'n Dios t-xtalb'il kye tu'n kyex aq'nal; japuntzun aq'untl kyu'n aju otoq tzaj q'ma'n kye.

²⁷Tejtzun kypon tuj tnam Antioquía e b'aj kychmo'n qe okslal, ex xi kytx'olb'a'n tkyaqilju otoq tb'incha Dios tu'n kyaq'unb'en, ex tza'n tten otoq txi tq'o'n Dios amb'il kye txqantl xjal mya judiy qe tu'n kyokslan.

²⁸Ex axtzun e kyaj ten Pablo tuk'ix Bernabé nim q'ij kyuk'il qe okslal.