Read kumam Hechos 15 Bible Online

Hechos 15 - kumam bible

Hechos 15

¹Ex at junjun xjal e pon tuj Antioquía, tzajni qe tuj Judea, in kyq'o'n xnaq'tzb'il kye erman in kyma'n: Qa minti' ma che sircunsidarinjtze ik tza'nx in tma'n tley Moisés, mlay che klete, che chi.

²Atzunte Pablo tuk'ix Bernabé nim e yolin ti'j jlu kyuk'il, ex jaw jun yol kyuw kyxol; b'anttzun ti'j tu'n t-xi' Pablo tuk'ix Bernabé tuj Jerusalén kyuk'ix junjuntl kyuk'il, tu'n kypon kywitz qe apostol ex kywitz qe anciano tu'n kyyolin ti'j jlu.

³E je'xtzun sama'n kyu'n qe okslal tuj tnam Antioquía, e ik'xtzun tuj tx'otx' Fenicia ex tuj tx'otx' Samaria, xi kytx'olb'a'n tza'n tten otoq che okslan txqantl xjal mya judiy qe, kyaj kyq'o'n ojtxi kyten e ok lpe' ti'j Dios. Ex nim e tzalaj kykyaqil erman tej kyb'inte jlu.

⁴Tejtzun tpon Pablo tuk'ix Bernabé tuj Jerusalén, b'a'n e k'monjtz kyu'n kykyaqil okslal ex kyu'n apostol ex kyu'n anciano, ex xi kytx'olb'a'n tkyaqilju otoq tb'incha Dios tu'n kyaq'unb'en.

⁵Ex at junjun fariseo otoq che okslan, e jaw we' q'malte kyja': —Ilxix ti'j tu'n kysircunsidarinjtz qeju ma che okslan mya judiy qe, ex tu'n t-xi q'met kye tu'n tjapun kyu'n aju ley kyaj tq'o'n Moisés, che chi.

⁶Oktzun kychmon kyib' qe apostol kyuk'ix qe anciano tu'n kyyolin ti'j jlu.

⁷Ex kyb'ajlenxi yolin nim ti'j, jawtzun we' Pedro ex xi tma'n kye: —Erman, b'i'maj kyu'ne, ela'xi q'ij njawlen sk'o'ne tu'n Dios kyxole tu'n t-xi nma'ne tqanil kolb'il kye txqantl xjal mya judiy qe, ex tu'n kyokslan.

⁸Ate Dios ojtzqi'n tuj kyanmi xjal tu'n, ex tzaj tyek'un qa b'a'n tu'n kyklet, ex tzaj tq'o'n Xewb'aj Xjan kye, ik tza'n tzaj tq'o'n qe.

⁹Ex minti' o tma Dios qa junxitl qo' ex qa junxitl qe txqantl xjal, o'kx saqix tuj kyanmi tu'n kyokslab'l ik tza'n qe.

¹⁰Ja'lotzun, ¿tiqu'n kyaje tu'n tmaqet t-xtalb'il Dios kyu'ne? Porke in kub' kyq'o'ne jun iqtz kyib'aj qe erman lu, aju minti' k'isj kyu'n qxe'chel ojtxi, ax ikx qe minti' in k'isj qu'n.

¹¹Mya tuj tumel aju in kyma'ne, porke ik tza'n qe ma qe' qk'u'j ti'j ma qo klet tu'n t-xtalb'il Qajaw Jesús, ik tza'nx kye ma che klet, chi Pedro xi tma'n kye.

¹²Ex kykyaqil xjal minti' e q'ajt, xi kyb'i'n aju tyol Bernabé ex tyol Pablo tzaj kytx'olb'a'n, tza'n tten tb'incha Dios qe señ ex qe tb'inchb'en nim kyipumal kyxol txqantl xjal mya judiy qe, xi tq'o'n Dios kyipumal Pablo tu'n kyb'ant qe señ lu.

¹³Tejtzun kyb'aj yolin Pablo, ok ten Jacobo yolil ex tma: —Aqeye erman, kyb'intze nyole:

¹⁴Ma tzaj ttx'olb'a'n Simón tza'n tten kub' t-ximan Dios tu'n ttzaj tq'o'n t-xtalb'il tnejel maj kye txqantl xjal mya judiy qe ma che jaw t-sk'o'n junjun kyxol tu'n kyok etzan tu'n.

¹⁵Ax yol jlu ik tza'n kyaj kytz'ib'an qe t-sanjel Dios in tma'n tuj Tu'jil, chi kyja':

¹⁶Tb'ajlenxi jlu chin ultle juntl maj, ex aju tkawb'il David aju otoq kub' xitj kjawil nb'incha'ne juntl maj ex kjawil nb'incha'ne ju xitb'en te, ex kjawil nwab'ane juntl maj,

¹⁷tu'ntzun kyjyon txqantl xjal ti'j Qman, ax ikx kykyaqil nasyon mya judiy qe, aqeju etzan wu'ne,

¹⁸chi Qman, aju tzaj ttx'olb'a'n tkyaqil jlu atxix ojtxi, chi tuj Tu'jil.

¹⁹Kyja'tzun ma kub' nximane tu'n mi'n qlab't kyi'j qe txqantl xjal mya judiy qe, aqeju in che okslan, ma kyaj kyq'o'n ojtxi kyten ex ma che ok lpe' ti'j Dios.

²⁰O'kx tu'n t-xi tz'ib'et jun u'j kye tu'n mi'n t-xi kychyo'n kychib'jal alumaj in kub' q'o'n te chojb'il kywitz qe tilb'ilal, ex tu'n mi'n kyb'inchante aj pajil, ex tu'n mi'n t-xi kychyo'n tchib'jal alumaj aju nno'k jatz'o'n tqul, ex tu'n mi'n t-xi kychyo'n chik'.

²¹Porke atxix ojtxi in pakb'anjtz tley Moisés kyuj kykyaqil tnam kyuj ja te k'ulb'il, ex atzun in jaw sch'i'n tuj tkyaqil q'ij te ojlab'l, chi Jacobo.

²²B'a'ntzun ela tuj kywitz apostol kyuk'ix qe anciano ex kykyaqil okslal tu'n kyjaw sk'et kab'e xinaq kyxolx ex tu'n t-xi kysama'n tuj tnam Antioquía junx tuk'il Pablo ex Bernabé; ate Judas jaw sk'o'n, aju Barsabás tkab'in tb'i, tuk'ix Silas; aqeju xinaq lu nejenel qe kyxol erman.

²³Ex xi kytz'ib'an jun u'j tu'n t-xi kyi'n Pablo; ex atzun in tma'n tuj u'j kyja': Aqo'ye apostol, kyuk'ix qe anciano ex qe erman, in che'x qq'olb'e'ne aqeye erman mya judiy qeye ate'ye tuj tnam Antioquía, ex tuj tx'otx' Siria ex tuj tx'otx' Cilicia.

²⁴Ma qb'iye at junjun xjal e je'x qxole, ma che lab't kyi'je tu'n kyyol, ex ma jolpaje' kyk'u'je kyu'n, [in kyma'n tu'n kysircunsidarinjtze ex tu'n tjapun kyu'ne aju ley kyaj tq'o'n Moisés,] ex minti' xi qq'o'ne orden kye tu'n kymante ikju.

²⁵Kyja'tzun b'ant ti'j qu'ne ex b'a'n ela tuj qwitze tu'n kyjaw sk'et kab'e xinaq qxole ex tu'n t-xi qsama'ne tu'n kypon kyuk'ile tuk'ix Bernabé ex Pablo, aqeju at qk'u'je kyi'j;

²⁶aqeju erman lu kyq'on kyib' tu'n kykyim noq tu'n tlaj okslal qe ti'j Qajaw Jesucrist.

²⁷Kyja'tzun ma txi qsama'ne Judas tuk'ix Silas, ax jlu kxel kyma'n kyeye ok kypon kyuk'ile.

²⁸B'a'n ma tz'e'la tuj twitz Xewb'aj Xjan ex tuj qwitze tu'n mi'n tkub' qq'o'ne jun iqtz kyib'aje, noq o'kx tu'n kyb'inchanteye aju ilxix ti'j:

²⁹tu'n mi'n txi kychyo'ne kychib'jal alumaj in kub' q'o'n te oyaj kywitz qe tilb'ilal, ex tu'n mi'n t-xi kychyo'ne chik', ex tu'n mi'n t-xi kychyo'ne tchib'jal alumaj aju nno'k jatz'o'n tqul, ex tu'n mi'n kyb'inchanteye aj pajil. Qa ma tz'ok kykwentin kyib'e tu'n mi'n kyb'inchanteye jlu, b'a'n ok kyb'incha'ye. Kylomtzun kyib'e, chi tuj u'j.

³⁰Kyja'tzun, aqeju e je'x sama'n e pon tuj tnam Antioquía, e ok kychmo'n qe okslal, ex xi kyq'o'n ju u'j kye.

³¹Tejtzun tjaw kysch'i'n erman ju u'j lu, e jaw tzalajxix tu'nju q'uqb'ab'l kyk'u'j.

³²Ex ate Judas tuk'ix Silas t-sanjel Dios qe, xi kyq'uqb'a'n kyk'u'j erman ex nimku yol xi kyma'n kye tu'n kywe'xix tuj kyokslab'l.

³³Axtzun e kyaj ten nim q'ij; yajxitzun e ajtz sama'ntl kyu'n erman tuj tzalajb'il tu'n kyul juntl maj kyuk'il qeju e je'x saman kye.

³⁴[Atzunte Silas b'a'n ela tuj twitz ax tu'n tkyaj ten.]

³⁵Ax ikx te Pablo tuk'ix Bernabé ax e kyaj ten tuj tnam Antioquía, in kyq'o'n xnaq'tzb'il ti'j tyol Qajaw ex in kypakb'a'n tqanil b'a'n, kyuk'ix nimkutl erman.

³⁶Tel-lenxitzun ch'in q'ij xi tma'n Pablo te Bernabé: —Qo' juntl maj visitaril kye erman kyuj kykyaqil tnam jatum o txi qpakb'a'n tyol Qajaw, tu'ntzun tqil tza'n ate', chi Pablo.

³⁷O tajb'e Bernabé tu'n t-xi' Juan kyuk'il, aju Marcos tkab'in tb'i;

³⁸atzunte Pablo, mya b'a'n ela tuj twitz tu'n t-xi' Juan kyuk'il, tu'nju otoq tz'el tpa'n tib' kyi'j max tuj tx'otx' Panfilia, ex minti' xi' kyuk'il tuj aq'untl.

³⁹Ex jaw jun yol kyuw kyxolx, kyja'tzun kub' kypa'n kyib'; ate Bernabé xi uk'inte Marcos, e je'x tuj barc tu'n kypon tuj tx'otx' Chipre;

⁴⁰atzunte Pablo jaw sk'onte Silas tu'n t-xi' tuk'il; atzun kye erman e na'n Dios kyi'j tu'n kyxi' tuj aq'untl ex tu'n ttzaj tq'o'n Dios t-xtalb'il kye.

⁴¹E ik'xtzun tuj tx'otx' Siria ex tuj tx'otx' Cilicia, in kykyuwsa'n kynab'l okslal tuj junjun tnam.