Read kumam Hechos 18 Bible Online

Hechos 18 - kumam bible

Hechos 18

¹Tb'ajlenxitzun jlu etztzun Pablo tuj tnam Atenas ex xi' tuj tnam Corinto.

²Ex knet jun xjal judiy tu'n Pablo, Aquila tb'i, tzajni tuj tx'otx' Ponto. K'itzqetoq tetzlen Aquila tuj Italia tuk'ix Priscila aju t-xu'jil, tu'nju otoq tz'etz jun orden tu'n president Claudio tu'n kyetz b'aj kykyaqil xjal judiy tuj tnam Roma. Pontzun Pablo tja Aquila,

³ex ax kyaj ten kyuk'il, ex ax taq'un Pablo ik tza'n kyaq'un Aquila; e aq'nantzun junx, ex aju kyaq'un b'inchal ja lona.

⁴Ex tkyaqil q'ij te ojlab'l okx Pablo tuj ja te k'ulb'il yolil kyuk'il xjal, ex ok tilil tu'n tu'n tkub' ti'j kynab'l xjal judiy, ax ikx qe xjal mya judiy.

⁵Tejtzun tul Silas tuk'ix Timoteo, tzajni qe tuj Macedonia, b'i'x xi tq'on tib' Pablo tu'n tpakb'an ti'j tyol Dios ex in tma'n kye xjal judiy qa ax tok ate Jesús ju Crist aju at toklen tu'n Dios.

⁶Atzun kye xjal judiy e ok ten maqolte ex e ok ten yasul ti'j, eltzun tchto'n Pablo ti'j t-xb'alun te jun yek'b'il kyi'j qa mya b'a'n qe, ex tma kye: —Tuj kyilxe qa ma che kyime, minti' woklene ti'j. Texju ja'lo ma chinxe kyxol txqantl xjal mya judiy qe, chi Pablo kye.

⁷Etztzun Pablo kyxol, ex xi' tja jun xjal Ticio Justo tb'i; ate xjal lu in k'ulun te Dios, ex ax tkub' tja ttxlaj ja te k'ulb'il kye xjal judiy.

⁸Ex okslan Crispo ti'j Qajaw kyuk'ix kykyaqil qeju ate' tuj tja, nejeneltoq Crispo tuj ja te k'ulb'il. Ex nimku xjal aj Corinto, tej kyb'inte tyol Pablo, xi kyoksla'n ex e b'yan.

⁹Atzunte Qajaw tzaj tma'n te Pablo te qonik'an ik tza'n tuj witzik': —Mi'n xob'a, kukx yolina ex mi'n q'ajena.

¹⁰Porke atine tuk'ila, ex mi a'l jun ktzajel tzyunte teya tu'n tk'ixb'isanjtza, ex nimku xjal etzan wu'ne at tuj tnam lu, chi Qajaw.

¹¹Ex axtzun kyaj ten Pablo jun ab'q'i tuk'il qaq xjaw tuj tnam Corinto, in tq'o'n xnaq'tzb'il kye xjal ti'j tyol Dios.

¹²Ex tej toktoq Galión te gobernador tuj tx'otx' Acaya, e ok tzoqpaj qe xjal judiy ti'j Pablo, mojl kyyol ti'j. Xi kyi'n tuj jusgad,

¹³ex xi kyma'n te gobernador: —Ate xjal lu in kub' ti'j kynab'l xjal tu'n tu'n kyk'ulun twitz Dios tuj junxitl tumel, mya ik tza'n in tma'n ley, che chi.

¹⁴O tajb'e Pablo tu'n tyolin, ex xi tma'n naj Galión kye xjal judiy: —Aqeye xjal judiy, noqwit jun mya b'a'n ma tb'incha jlu ex noqwit ma'xix til, atwitlo tumel ex jakwitlo txi nb'i'ne kyyole.

¹⁵Ex qa tu'n tlaj yol ma che ule tzalu, ex qa tu'n tlaj kyb'i xjal, ex qa ti'j kyleye, kyke'yinxe ti k'okel ti'j kyu'ne; porke mi'n wajb'ile tu'n woke te jwes ti'j jlu, chi Galión.

¹⁶E je'tztzun tlajo'n tuj jusgad.

¹⁷Atzun kye kykyaqil xjal [griego] tzaj tzyu'n Sóstenes kyu'n, aju nejenel tuj ja te k'ulb'il, ex b'aj kyb'ju'n twitz jusgad. Atzunte Galión minti' taj ti'j jlu.

¹⁸Atzunte Pablo nim q'ij o tentl tuj Corinto, e kyajtzun tq'olb'e'n qe erman ex xi' tuj barc tu'n tpon tuj tx'otx' Siria; ex tuk'ix Priscila ex Aquila xi' tuk'il. Na'nxtoq t-xi' Pablo tuj barc otoq tz'el tmatzo'n ttzmal twi' tuj tnam Cencrea, tu'nju otoq txi ttziyan jun yol te Dios.

¹⁹E pontzun tuj tnam Efeso, ex axtzun e kyaj q'o'n Aquila tuk'ix Priscila tu'n Pablo; okxtzun Pablo tuj ja te k'ulb'il kye xjal judiy, ex o yolin kyuk'il.

²⁰Atzun kye xjal judiy e kub'san twitz Pablo tu'n tkyaj ten nim q'ij kyuk'il; atzunte Pablo minti' kub' tuj twitz,

²¹noq o'kx e kyaj tq'olb'e'n, chi kyja': —[Ilxix ti'j tu'n nxi'ye tuj Jerusalén tu'n tkub' wik'sa'ne aju ninq'ij tzul; ex] qa ik tajb'il Dios, chin ultle juntl maj kyuk'ile, chi Pablo. Etztzun tuj Efeso, ex xi' tuj barc.

²²Tejtzun tpon Pablo tuj tnam Cesarea, jaxtzun q'olb'el kye okslal tuj Jerusalén, ik'tzun ex ku'pun tuj tnam Antioquía.

²³Ex axtzun kyaj ten ela' q'ij; etztzun, ex xi b'etel tuj tkyaqil tx'otx' Galacia ex tuj Frigia, txolsa'n ti'j tu'n, in che tkyuwsa'n kykyaqil okslal.

²⁴Ex at jun xjal judiy aj Alejandría, Apolos tb'i. Pontzun Apolos tuj tnam Efeso, ex mejorxix yolin, ex at-xix tnab'l ti'j ju in tma'n tuj Tu'jil.

²⁵Xnaq'tzamni te xjal lu ti'j ju xnaq'tzb'il te Qajaw; at t-sek'al tu'n tyolin ex in tq'o'n xnaq'tzb'il tuj tumelxix ti'j Jesús, ex o'kxtoq ojtzqi'n tu'n aju b'yab'l tu'n Juan.

²⁶Tu'n jlu ok ten Apolos yolil tuj ja te k'ulb'il minti' t-xob'il; tejtzun kyb'inte Priscila tuk'ix Aquila, xi kyi'n kyuk'il, ex xi kychik'b'a'n te mas tuj tumelxix aju xnaq'tzb'il tu'n Dios.

²⁷Ex kub' t-ximan Apolos tu'n t-xi' tuj tx'otx' Acaya, xitzun kyq'uqb'a'n erman tk'u'j, ex xi kytz'ib'an jun u'j kye okslal tu'n tk'monjtz Apolos kyu'n. Tejtzun tpon Apolos tuj Acaya, nimxix o tz'ajb'en kyxol qeju otoq che okslan tu'n t-xtalb'il Dios,

²⁸ex xi tchik'b'a'nxix kywitz xjal aju in tma'n tuj Tu'jil, qa ate Jesús ju Crist aju at toklen tu'n Dios, kyja'tzun minti' tumel tu'n tkub' kyewan xjal judiy qa mya ax tok jlu.