Read kumam Hechos 20 Bible Online

Hechos 20 - kumam bible

Hechos 20

¹Tb'ajlenxitzun jlu, e tzaj ttxko'n Pablo qe okslal, ex xi tq'o'n mastl kynab'l; [tu'n jlu b'aj kychlen kyib',] e kyajtzun tq'olb'e'n ex etztzun tu'n t-xi' tuj Macedonia.

²B'ajtzun tb'etin tuj tx'otx' Macedonia, xi tq'o'n kynab'l okslal tu'nju nim o yolin kyuk'il, ex pontzun tuj tx'otx' Grecia.

³Axtzun kyaj ten ox xjaw, ex attoq t-xi'yil tuj barc tu'n tpon tuj Siria, ex tej tb'inte aju otoq b'ant ti'j kyu'n xjal judiy tu'n tkub' b'yo'n kyu'n, kub'tzun t-ximan tu'n t-xi' tuj juntl b'e tu'n tik' juntl maj tuj Macedonia.

⁴Aqeju e je'x tuk'il Pablo, atzun qe jlu: Sópater aju aj Berea, aju tky'ajal Pirro, tuk'ix Aristarco ex Segundo aj Tesalónica qe, tuk'ix Gayo aju aj Derbe, tuk'ix Timoteo, tuk'ix Tíquico ex tuk'ix Trófimo, aj Asia qe.

⁵Atzun qe jlu e je'x nej ex e ayon qi'je tuj tnam Troas.

⁶Tb'ajlenxitzun ninq'ij tu'n kywa'n xjal pan minti' t-samel tuj tu'n tjaw mal tk'u'j, o etze tuj Filipos, o tzaje tuj barc, tuj jwe' q'ij o ule kyuk'il tuj Troas, ex axtzun o kyaj tene wuq q'ij.

⁷Tujtzun tnejel q'ij te seman, ok qchmon qib'e kyuk'il kykyaqil okslal tu'n tkub' qsipane pan qxolxe, ex in che xnaq'tzanjtztoq okslal tu'n Pablo. Attoq telex Pablo tuj juntl q'ij, ex kukxtoq tyolin te tmij aq'b'il.

⁸Ex nimku kandil at tuj cuart tuj toxkolin ja, jatum kyb'uyintoq kyib'.

⁹Ex at jun ku'xun Eutico tb'i q'uqltoq ttzi ventan, kyimni tu'n watl tu'nju nim tuj o yolin Pablo, etztzun tz'aq tuj toxkolin ja tu'nju kyimni tu'n watl, k'u'l tz'aq twitz tx'otx', ex otoq kyim tej tjaw q'i'n.

¹⁰K'u'ltzun naj Pablo, kub' mutze' tib'aj ju ku'xun lu ex jaw tchle'n ex xi tma'n kye erman: —Mi'n b'aj kyk'u'je porke itz'xte.

¹¹Jaxtzun juntl maj Pablo tuj cuart ex kub' t-sipan pan kyxol okslal ex o wa'n, kukxtoq tyolin, maxitzun we' tyolin tej ttzaj t-xe kya'j, ex xi'tzun.

¹²Xitzun kyi'n okslal ju ku'xun itz' tu'n tpon tja, ex nimxix q'uqb'anjtz kyk'u'j.

¹³Atzun qeye o tzaj neje twitz Pablo, o okxe tuj barc, o ultzune tuj tnam Asón jatum tu'n qayone ti'j Pablo, porke iktzun b'ant ti'j tu'n, tu'n ttzaj b'et tu'n tqan.

¹⁴Tejtzun tkanun Pablo quk'ile tuj tnam Asón, okxtzun quk'ile tuj barc, o ultzune tuj tnam Mitilene.

¹⁵Axtzun o okxe tuj barc, te juntl q'ij o ule ttxlaj tx'otx' Quío, ex texi juntl q'ij o ule tuj tnam Samos; [ex o we' ch'ine tuj tnam Trogilio,] tujtzun juntl q'ij o ule tuj tnam Mileto.

¹⁶Tu'nju otoq kub' t-ximan Pablo tu'n mi'n tik' tuj tnam Efeso, ex tu'n mi'n twe' tuj tx'otx' Asia, porke in txoktxon tu'n tpon naj tuj Jerusalén, qa at tumel tu'n tpon kanun tuj ninq'ij Pentecostés.

¹⁷Atxtoq Pablo tuj Mileto xi t-sama'n kab'e erman tu'n kypon tuj tnam Efeso txkol kye anciano te iglesi.

¹⁸Tejtzun kyul anciano tuk'il Pablo, xi tma'n kye: —B'a'n kyu'ne tza'n tten ẍin b'ete kyxole tkyaqil q'ij, atxix tuj tnejel q'ij tej wule tuj Asia,

¹⁹in chin ajb'ene te Qajaw mans qine, ex ela' maj etz ta'l nwitze, ex nimku maj ma chin oke tuj joyb'il wi'je tej tb'ant ti'j kyu'n xjal judiy tu'n nkub' b'yo'ne kyu'n.

²⁰Ex minti' kub' nxk'ayin wib'e tu'n t-xi nma'ne aju at tajb'en kyeye, xi nq'o'ne xnaq'tzb'il kyeye jatum nno'k kychmon kyib' xjal, ax ikx tuj kyjaye.

²¹Xi nma'ne kye xjal judiy ex kye txqantl xjal mya judiy qe tu'n tajtz ti'j kyanmi ex tu'n kyajtz meltz'aj tuk'il Dios ex tu'n kyokslan ti'j Qajaw Jesucrist.

²²Ja'lotzun ma chinxe tuj Jerusalén, in tma'n Xewb'aj Xjan tuj wanmiye qa il ti'j tu'n nxi'ye, minti' b'a'n wu'ne ti ok nk'ulb'a'ye ma chixin;

²³noq o'kx in tzaj tma'n Xewb'aj Xjan weye ok in chin ik'e tuj junjun tnam, in tma'n tu'n wokxe tuj pres ex tu'n nb'aj yajla'ne.

²⁴Ex minti' in xi nk'ujla'ne jlu; ex minti' ma kub' nximane qa ma'xix toklen nchwinqlale te wexe, o'kx in chin ximane ti'j tu'n tjapun b'aj aq'untl wu'ne tuk'il tzalajb'il, ex tu'n tjapun wajb'eb'le aju o nk'ame te Qajaw Jesús tu'n t-xi npakb'a'ne tqanil b'a'n ti'j t-xtalb'il Dios.

²⁵Ja'lotzun b'a'n wu'ne mi a'l jun kyxole kykyaqile k'okel tke'yin juntl maj nwitze, aqeye o chin b'ete kyxole in chin pakb'ane ti'j tkawb'il Dios.

²⁶Kyja'tzun kxel nma'ne kyeye ja'lo, minti'tl woklene kyi'je kykyaqile qa at jun ma txi' tuj najen;

²⁷porke minti' ma kub' nxk'ayin wib'e tu'n t-xi nma'ne tkyaqil tyol Dios kyeye.

²⁸Kyja'tzun, ten kykwente kyi'je ex kykwentin oke qe txqantl okslal, porke ma che ok q'o'ne tu'n Xewb'aj Xjan te kwentil kye, tu'n kypastorine kyi'j qe okslal etzan tu'n Qajaw, aqeju ma che laq'et tu'nx ju tchk'el.

²⁹Porke b'a'n wu'ne, ok wexe tzalu che ul txqantl xjal xitul kye okslal, ik kyten xjal lu ik tza'n qe xo'j puro jawni, jurat in b'aj kychyo'n txqan ẍne'l.

³⁰Ex ax kyxolxe kjawil kyi'n kyib' junjun xjal, kxel kyq'o'n jun xnaq'tzb'il mya ax tok, noq tu'n kyok lpe' okslal kyi'j.

³¹Kyja'tzun, ten kykwente kyi'je, kyna'ntze, tuj ox ab'q'i minti' in q'ajene tu'n t-xi nq'o'ne tnab'l teyle junjun, in yoline kyuk'ile q'ijl ex qonik'an, ex etz ta'l nwitze.

³²Ja'lotzun, erman, tuj tq'ab' Dios che kyjel woqxenane, ex kyjel nq'o'ne tyol Dios kyuk'ile, aju q'olte xtalb'il ex at tipumal tu'n kych'iye tu'n ex tu'n ttzaj q'o'n jun etzb'il kyeye kyxol kykyaqil qeju pa'nmaj qe tu'n Dios tu'n kyajb'en o'kx te.

³³Minti' o pon nk'u'je ti'j saq tpwaq jun xjal ex qa ti'j q'an pwaq at tuk'il ex qa ti'j t-xb'alun.

³⁴B'a'n kyu'ne ma chin aq'nane tu'n nq'ab'e tu'n tknet aju at tajb'en weye ex kye qeju ate' wuk'ile.

³⁵Tuj tkyaqil ma txi nyek'une kyeye tu'n kyaq'nane ikju, ex tu'n kyonine kye qeju minti' kye, ex tu'n ttzaj kyna'ne aju tyol Qajaw Jesús chi o tma: Mas at tzalajb'il kyeye qa at ch'in ma txi kyq'o'ne te juntl, ex mya aqeye tu'n kyk'monteye ch'in ktzajel q'o'n kyeye tu'n juntl, chi Jesús, chi Pablo kye.

³⁶Tej tb'aj tma'n Pablo jlu, kub' ẍmeje' ex ok ten na'l Dios kyuk'il kykyaqil.

³⁷Kykyaqiltzun e jaw oq'xix nim, tzajtzun chle'n Pablo kyu'n, ex el kytz'ub'an twitz.

³⁸Tzajxix kyb'is tu'nju yol tma Pablo: Mlay kyile nwitze juntl maj, chi Pablo. E je'xtzun wab'al te tu'n tokx tuj barc.