Read kumam Hechos 24 Bible Online

Hechos 24 - kumam bible

Hechos 24

¹Tel-lenxitzun jwe' q'ij, ku'pun Ananías tuj Cesarea kyuk'ix junjun kytijil xjal, ex jun xjal licenciado, Tértulo tb'i, ate Ananías nejenel kye pal. E pontzun twitz gobernador chik'b'alte alkye til Pablo.

²Tejtzun ttxket Pablo, ok ten Tértulo tx'olb'alte alkye til Pablo, xi tma'n te Félix: —Chjonte teya, tat gobernador, tu'nju ato'ye tuj txub'txaj tu'na ex b'a'nxix tleya tkub' kyib'aj tnam tu'nju tnab'la b'a'nxix.

³Kyja'tzun in qk'mo'ne t-xtalb'ila tkyaqil q'ij ex tuj tkyaqil lugar, nimxix in xi qq'o'ne chjonte teya tat Félix, aya nimxix toklena.

⁴Ex tu'n mi'n t-sikta mas nim tuj, chin kub'sale twitza tu'n t-xi tb'i'na kab' ox qyole, qa ma tb'inchaya xtalb'il.

⁵Ma knet ju xjal lu qu'ne noq in tzpet-san kynab'l xjal, ex in oksan kyk'u'j kykyaqil xjal judiy tuj tkyaqil twitz tx'otx' tu'n kyq'ojin kyxolx, ex nejenel kyxol jun k'loj xjal t-xnaq'tzb'en jun xjal aj Nazaret.

⁶Ax ikx o tajb'e tu'n tb'aj ttz'ilsa'n tja Dios; kyja'tzun tzyet qu'ne [ex o qajb'eye tu'n tok tuj xjel qu'ne ik tza'nx in tma'n qleye.

⁷Ex pon coronel Lisias, el ti'n tuj qq'ab'e tuk'il tipun,

⁸ex tzaj tma'n tu'n qule tuk'ila q'malte alkye til.] Ax ikx teya ok tok tuj xjel tu'na, k'elel tnik'a ti'j qa at til ik tza'n in qma'ne, chi Tértulo.

⁹Ax ikx kye xjal judiy xi kymojtza'n: —Tkyaqil jlu ax tok, che chi.

¹⁰Tzajtzun tyek'un tq'ab' gobernador tu'n tyolin Pablo, xitzun tma'n Pablo: —B'a'n wu'ne ela'xi ab'q'i toklen tena te jwes tuj ju nasyon lu, kyja'tzun ma qe'xix nk'u'je tu'n t-xi nma'ne nkolb'il wib'e teya.

¹¹B'a'n tu'n t-xi tqanina tu'n tb'inteya, ma kab'laj q'ij njaxlene tuj Jerusalén k'ulul te Dios.

¹²Minti' in knete kyu'n xjal judiy tzinwt chin yoline kyuk'il xjal ex qa tzinwt che jaw tilj xjal wu'ne, mi tuj tja Dios, mi kyuj ja te k'ulb'il, mi tuj tnam;

¹³ex mlay che el twitz ti'j wile in kyma'n.

¹⁴Ex ax tok kxel nma'ne teya, oksla'n wu'ne aju okslab'l in che yolin ti'j qa mya b'a'n, ex in chin ajb'ene te Dios, aju Kydios qtzan nxe'chele, porke oksla'n wu'ne tkyaqilju tz'ib'an tuj tu'jil ley ex tuj kyu'jil t-sanjel Dios.

¹⁵Ex q'uql nk'u'je ti'j Dios, ik tza'n kye q'uql kyk'u'j ti'j, qa ok che jawil anq'in qe kyimni, tza'nx qeju tz'aqlxix, ax ikx qeju mya tz'aqlxix.

¹⁶Kyja'tzun nno'k tilil wu'ne kukx tu'n nb'inchanteye b'a'n twitz Dios ex kywitz xjal ik tza'nx in tma'n wanmiye, ex tu'n ntene minti' npaltile.

¹⁷Tb'ajlenxitzun ela' ab'q'i, in ultzune tuj ntanmiye q'ol kotzb'aj kye nxjalile ex q'ol oyaj te Dios.

¹⁸Matoq in b'ant jlu wu'ne tuj tja Dios te tx'ajb'il weye, tej nknete kyu'n junjun xjal judiy aj Asia, mya nim xjal uk'in wu'ne ex mya in che tilin xjal wuk'ile.

¹⁹Awttzun qeju ma che ul twitza q'malte alkye wile, qa at kyq'oj wi'je.

²⁰Ex qa mi'n, ax qe xjal ate' tzalu b'a'n tu'n ttzaj kyma'n alkye wile knet kyu'n tej npone kywitz Aj Sanjelal kye xjal judiy.

²¹Qatzun qa a wile tuj kywitz, tej ntene kyxol jaw tq'ajq'ajel nwi'ye kyuw ex xi nma'ne kyja': Ti'j anq'ib'l kye kyimni ma chin oke tuj xjel kyu'ne ja'lo, nchiye kye, chi Pablo.

²²Atzunte Félix, tej tb'aj tb'i'n jlu xi tma'n tu'n kyayon, porke elni tnik' ti'j ju Okslab'l lu, ex xi tma'n kye: —Okxi tkub'il coronel Lisias k'eleltzun b'aj nnik'e ti'j kyxtise.

²³Xitzun tma'n Félix te capitán tu'n tok xq'uqit Pablo, ex tzoqpi'n ch'in ex tu'n mi'n kymayet qe tamiw ok kypon tuk'il tu'n kyajb'en te.

²⁴Tb'ajlenxitzun kab' q'ij, pon juntl maj Félix tuk'ix t-xu'jil Drusila tb'i, ex judiy xjal. Txkettzun Pablo tu'n Félix, ex xi tb'i'n aju tyol Pablo in yolin ti'j qa il ti'j tu'n qokslan ti'j Jesucrist.

²⁵Ex tej tmante Pablo tu'n qok tz'aqlxix ex tu'n qjak'unte qib' ex tej tyolin ti'j ju jwisi tzul, b'i'x jaw sek'paj Félix, ex tma: —Txi'ya ja'lo; alkye q'ij at amb'il weye ktxketela juntl maj wu'ne, chi Félix.

²⁶Ax ikx in ayontoq Félix ti'j tu'n t-xi tq'o'n Pablo ch'in pwaq te tu'n t-xi ttzoqpi'n; kyja'tzun nimku maj xi txokb'aj Pablo tu'n ex o yolin tuk'il.

²⁷Tejtzun tjapun kab' ab'q'i, eltzun q'i'n Félix, ex kyaj ten Porcio Festo te t-xel; ex tu'nju o tajb'e Félix tu'n tkub' xtalin kyu'n xjal judiy, kyja'tzun kyaj q'o'n Pablo tuj pres tu'n.