Read kumam Hechos 25 Bible Online

Hechos 25 - kumam bible

Hechos 25

¹Ultzun Festo tuj tnam Cesarea tu'n tok te gobernador, tujtzun toxin q'ij jax tuj tnam Jerusalén.

²Atzun kye nejenel kye pal ex qe nejenel kyxol xjal judiy, e pon twitz Festo q'malte alkye til Pablo, ex e kub'san twitz,

³xi kyqanin te tu'n tb'inchante xtalb'il tu'n tul q'i'n Pablo tuj Jerusalén, otoq b'ant ti'j kyu'n tuj ewaj tu'n tkub' Pablo kyu'n tuj b'e.

⁴Atzunte Festo xi ttzaq'we'n: —Ax ta' Pablo tuj Cesarea tokx tuj pres, ax ikx weye chin ajel naje tu'n npone tuj Cesarea.

⁵Kyja'tzun, aqeju nejenel kyxole b'a'n tu'n kyku'pun wuk'ile, ex qa at jun til xjal lu, b'a'n tu'n kymanteye, chi Festo.

⁶Axtzun o ten Festo tuj Jerusalén wajxaq q'ijlo ex qa laj, ku'xtzun tuj Cesarea. Tujtzun juntl q'ij, kub' qe' tuj tq'uqb'il tu'n tkawin, ex xi tma'n tu'n ttzaj q'i'n Pablo.

⁷Tejtzun tul Pablo, ok kychmon kyib' xjal judiy ti'jele, aqeju otoq che tzaj tuj Jerusalén, kymatzun qa ma'xix til Pablo ex nimxix mya b'a'n in tb'incha'n, ex minti' b'ant tu'n kyel twitz.

⁸Yolintzun Pablo te tkolb'il tib' chi kyja': —Minti' ma nb'inchaye jun il ti'j kyley xjal judiy, mi ti'j tja Dios, mi ti'j tat gobierni.

⁹Atzunte Festo o tajb'e tu'n tkub' xtalin kyu'n xjal judiy, kyja'tzun xi tqanin te Pablo: —¿Tajpeya tu'n tjaxa tuj Jerusalén ex matzun tu'n toka tuj xjel wu'ne ti'j tkyaqil jlu?

¹⁰Xi ttzaq'we'n Pablo: —Twitz tkawb'il gobierni atine, jatum tu'n woke tuj xjel. B'a'n tu'na minti' jun mya b'a'n ma nb'inchaye kyi'j xjal judiy.

¹¹Qa at jun mya b'a'n ma nb'inchaye ex qa at jun wile tu'n nkyime, mlay kub' nxk'ayin wib'e tu'n nkyime; ex qa minti' jun ma nb'inchaye ik tza'n in kyma'n jlu, mi a'l jun b'a'n t-xi q'onte weye tuj kyq'ab'. Mas b'a'n, chin t-samanxa tu'n woke tuj xjel twitz tat gobierni.

¹²Atzunte Festo tb'ajlenxi tqanin kye tuk'il, xi tma'n te Pablo: —Ma tmaya tu'n t-xi'ya twitz tat gobierni tu'n toka tuj xjel. Kxe'ltzuna twitz tat gobierni.

¹³Tb'ajlenxitzun kab' q'ij, ul rey Agripa tuk'ix tanb' aju Berenice tb'i, e ul tuj tnam Cesarea q'olb'elte Festo.

¹⁴Ex axtzun e ten ela' q'ij; xitzun ttx'olb'a'n Festo te rey aju tkaws Pablo, ex tma: —At jun xjal tzalu kyaj q'o'n tuj pres tu'n Félix.

¹⁵Tejtzun nxi aje tuj Jerusalén, tzaj kytx'olb'a'n qe nejenel kye pal ex qe kytijil xjal judiy ti'j ju xjal lu, tzaj kyqanin tu'n tkub' t-sentens.

¹⁶Xitzun nma'ne kye, minti' kycostumr aj Roma ikju, tu'n tkub' q'ot t-sentens jun xjal tu'n tkyim qa mi a'l te xjal kywitz qe aj q'oj ti'j ex tu'n t-xi q'ot amb'il te qa at jun tyol te tkolb'il tib'.

¹⁷Kyja'tzun, tej kyul tzalu wuk'ile, te juntl q'ij jurat in kub' qe'ye tuj nq'uqb'ile tu'n nkawine, xi nma'ne tu'n t-xi q'ib'aj ju xjal.

¹⁸Tejtzun kyul nwitze qe aj q'oj ti'j, mya ik tten til o kyma ik tza'n otoq kub' nximane,

¹⁹noq o'kx in che q'ojin ti'j tu'n tlaj kyokslab'l ex tu'n tlaj jun xjal Jesús tb'i, o kyim, ex in tma'n Pablo qa itz'.

²⁰Minti' pujet wu'ne alkye tumel ti'j jlu, kyja'tzun xi nqanine te Pablo qa tajb'il tu'n t-xi' tuj Jerusalén ex matzun tu'n tok tuj xjel ti'j tkyaqil jlu.

²¹Atzunte Pablo tzaj tma'n tu'n t-xi q'it twitz presidente Augusto, tu'ntzun tok tuj xjel tu'n presidente, kyja'tzun xi nma'ne ax tu'n tten tuj pres akutzun in chin ximane ti'j alkye q'ij tu'n t-xi nsama'ne twitz presidente, chi Festo.

²²Xitzun tma'n Agripa te Festo: —Ax ikx weye wajb'ile tu'n nb'inteye tyol ju xjal lu. Ex xi tma'n Festo te: —Nchi'jxi tb'iya tyol, chi Festo.

²³Tujtzun juntl q'ij, tzaj Agripa tuk'ix Berenice kyuk'ix nim xjal kyuk'il, e okxtzun tuj despach kyuk'ix qe coronel, ex qe kytijil xjal tujx tnam. Xitzun tma'n Festo tu'n ttzaj q'i'n Pablo.

²⁴Ex o tma Festo: —Aya rey Agripa ex kykyaqile aqeye xinaq ate'ye tzalu junx quk'ile, lu jun xjal lu in che qanin kykyaqil xjal judiy ti'j, e pon q'malte weye tuj Jerusalén ax ikx tzalu, in jaw tq'ajq'ajel kywi' kyuwxix in kyma'n qa b'a'n tu'n tkyim.

²⁵Atzun weye ma tz'el nnik'e ti'j minti' jun mya b'a'n ma tb'incha tu'n tkyim, ex axte o qaninte tu'n tok tuj xjel twitz presidente Augusto, kyja'tzun kyaj b'ant ti'j wu'ne tu'n t-xi nsama'ne tuk'il.

²⁶Ex tu'nju minti' jun tumel axix tok tu'n t-xi ntz'ib'ane te tat gobierni, kyja'tzun ma tzul wi'ne Pablo kywitze, ex tnejelxix twitza, aya rey Agripa, tu'ntzun tok tuj xjel ex tu'n nb'inteye jun tumel tu'ntzun t-xi ntz'ib'ane tuj u'j.

²⁷Porke tuj nnab'le qa mya tuj tumel tu'n t-xi nsama'ne jun pres qa minti' ma txi ntz'ib'ane tuj u'j alkye til, chi Festo xi tma'n kye.