Read kumam Hechos 3 Bible Online

Hechos 3 - kumam bible

Hechos 3

¹At jun q'ij kyja'toq tjax Pedro ex Juan tuj tja Dios tuj or te nab'l Dios, te las tres te qale.

²Ex kyja'toq t-xi q'i'n jun xinaq kox titz'jlenx, aju in pon kyi'n xjal tkyaqil q'ij ttzi tja Dios aju tok tb'i Tb'anilxix, tu'n tqanin tkotz kye xjal in che okx tuj tja Dios.

³Tejtzun t-xi tke'yin kox kyja'toq tokx Pedro tuk'ix Juan tuj tja Dios xi tqanin tkotz kye.

⁴Ok tke'yin Pedro ex Juan ti'j, ex xi tma'n Pedro te: —Qo tke'yintza.

⁵Atzunte kox tok twi' ti'j ju yol, in ayon ti'j alkye ch'in tu'n t-xi q'o'n te.

⁶Xitzun tma'n Pedro te: —Minti' saq pwaq at wuk'ile, mi q'an pwaq, ex aju at wuk'ile atzunju kxel nq'o'ne teya: Tu'n tipumal Jesucrist aj Nazaret, we'ktza ex b'eta.

⁷Jawtzun ttzyu'n Pedro tb'anq'ab' kox, ex jaw twab'an; ex jurat e kyuwix naj qe tqan ex kymopil tqan.

⁸Jawtzun t'ikpaj kox, kub' we', ex ok ten b'etel; ex okx kyuk'il tuj tja Dios in b'et ex in t'ikpaj, ex in tq'o'n chjonte te Dios.

⁹Kykyaqil xjal e ke'yinte in b'et kox ex in tq'o'n chjonte te Dios.

¹⁰Ex tzaj nim kyxob'il, ex e jaw sek'paj tu'nju otoq b'anix kox, porke el kynik' ti'j qa ateju in kub' qe'toq qanil tkotz ttzi tja Dios, aju Tb'anilxix tb'i.

¹¹Matoq tzyu'n Pedro ex Juan tu'n kox aju otoq b'anix, b'aj kychmon naj kyib' xjal kyi'j twitz ja tok tb'i te Salomón, otoq naj kynab'l xjal.

¹²Tej t-xi tke'yin Pedro jlu, xi yolin kye xjal: —Aqeye xinaq aj Israel, ¿tiqu'n in che lab'ine ti'j jlu, ex tiqu'n o'kx nno'k b'aj kywitze qi'je? Baqa tu'n qipumale xb'ant tb'et jlu, tu'npetzunju nimal Dios qo'ye.

¹³Aju Tdios qxe'chel Abraham, Isaac ex Jacob, ate xjaw nimsante Tk'wa'l aju Jesús tb'i, ate jlu xi kyq'o'ne tuj tq'ab' Pilato, ex el kyik'une, ex otoq tma Pilato tu'n tetz ttzoqpi'n.

¹⁴Atzun kyeye el kyik'une Jesús aju Xjan ex Tz'aqlxix, ex xi kyqanine te Pilato tu'n tetz ttzoqpi'n jun b'yol xjal.

¹⁵Kyja'tzun kub' kyb'yo'ne aju Tajaw chwinqlal, ex jatz anq'in tu'n Dios kyxol kyimni, ex ma qo oke te testiw ti'j.

¹⁶Ate xjal lu, aju nno'k kyke'yine ex ojtzqi'n kyu'ne, ma tz'ok tipun tqan noq tu'n tipumal Jesús, tu'nju ma okslan ti'j. Ex tu'nju ma okslan ti'j Jesús, b'i'x ma kyaj b'anix kox ik tza'n ma kyile kykyaqile.

¹⁷Atzun ja'lo erman, b'a'n wu'ne, kub' kyb'yo'ne Jesús tu'nju minti' el kynik'e ti'j aju o kyb'inchaye, ikx qe nejenel kyxole minti' el kynik' ti'j.

¹⁸Kyja'tzun ma japun tu'n Dios aju tyol aju q'ma'maj ojtxi kyu'n kykyaqil qe t-sanjel, tu'n tkyim ju Crist aju tzaj t-sama'n.

¹⁹Tajtztzun ti'j kyanmiye, ex kyajtz meltz'aje tuk'il Dios tu'n tkub' najset kyile; tu'ntzun ttzaj tq'o'n Qman tq'ijlalil chewsab'l,

²⁰ex tu'n ttzaj sama'n Jesús aju Crist, aju sk'o'maj atxix ojtxi tu'n tok te Klol qe.

²¹Ilxix ti'j tu'n tkyaj ten Jesús tuj kya'j akutzun in japun tq'ijlalil tu'n tb'inchet tkyaqil juntl maj te ak'aj, ik tza'n o tma Dios tu'n kyyol qe t-sanjel xjan e ten atxix ojtxi.

²²Porke o tma Moisés kye qxe'chel ojtxi: Kjawil t-sk'o'n Qman Dios jun t-sanjel ax kyxol kyermaniye, tu'n tten kyuk'ile ik tza'n weye. Kyb'inxe tkyaqilju ok tma' kyeye,

²³ex alkye jun xjal minti' ma txi tb'i'n tyol aju t-sanjel Dios tzul t-sama'n, b'i'x knajel tu'n mi'n ttentl kyxol aj Israel, chi Moisés.

²⁴Kyja'tzun kykyaqil t-sanjel Dios o che yolin, tzajnix xe't ti'j Samuel, ex qe txqantl, o tzaj kyma'n tqanil ti'j tq'ijlalil ja'lo.

²⁵Te kyeye aju yol tzaj ttziyan Dios kye t-sanjel, ex at kyoklene ti'j ju yol kyaj b'ant ti'j tu'n Dios kyuk'il qxe'chel, o tma Dios te Abraham kyja': Noq tu'n tiyjila che b'el ky'iwla'n kykyaqil kyiyjil xjal twitz tx'otx', chi Dios.

²⁶Ate Dios jaw anq'in Tk'wa'l tu'n, ex tzaj t-sama'n tnejelxix te kyeye tu'n kyky'iwlanjtze tu'n, ex tu'n tajtz meltz'aj teyle junjun kyeye tu'n mi'n ttentl tuj til, chi Pedro kye.