Read kumam Hechos 4 Bible Online

Hechos 4 - kumam bible

Hechos 4

¹Matoq in yolin Pedro tuk'ix Juan kyuk'il qe xjal, e ul tilj qe pal kye judiy tuk'ix nejenel kye polisiy xq'uqil tja Dios ex kyuk'ix qe saduceo.

²Tzaj kyq'oj kyi'j tu'nju in kyq'o'ntoq xnaq'tzb'il kye xjal, ex tu'nju in kypakb'a'n tu'n kyjaw anq'in qe kyimni ik tza'n te Jesús jatz anq'in.

³Tzyettzun Pedro kyu'n, tuk'ix Juan, okx kyq'o'n tuj pres, texi juntl q'ij e je'tz q'i'n, tu'nju otoq tz'ok qax.

⁴Ex nimku xjal kyb'i kyyol, ex e okslan; japuntzun kyajlal xinaq b'alo jwe' mil.

⁵Texi juntl q'ij b'aj kychmon kyib' qe nejenel kyxol xjal judiy tuj Jerusalén, kyuk'ix qe kytijil xjal, ex kyuk'ix qe xnaq'tzal ti'j ley,

⁶ex tuk'ix Anás aju nejenel kye pal, tuk'ix Caipás, tuk'ix Juan, tuk'ix Alejandro, ex kyuk'ix kykyaqil kyiyjil nejenel kye pal.

⁷Tzajtzun q'i'n Pedro tuk'ix Juan ex kub' kyq'o'n kyxol, ex xi kyqanin kye: —¿Ti kyoklene, ex alkye saj q'mante kyeye tu'n kyb'inchanteye jlu?

⁸Atzunte Pedro, nojni tuj tanmi tu'n Xewb'aj Xjan, xi tma'n kye: —Aqeye nejenel kyxol xjal ex kytijil aj Israel qeye:

⁹Ma qo oke tuj xjel kyu'ne ti'j jun b'a'n xqb'inchaye te jun xjal yab', tza'n tten xb'anix.

¹⁰Kxe'ltzun qchik'b'a'ne kyeye ex kye kykyaqil xjal aj Israel: Ate xjal lu aju wa'l kywitze ma b'anix noq tu'n tipumal Jesucrist aj Nazaret, aju jaw kyq'o'ne twitz crus, ex o jatz anq'in kyxol kyimni tu'n Dios.

¹¹Ate Jesús aju ab'j el kyik'une aqeye b'inchal ja, ex ma tz'ok te skyini te simyent.

¹²Ex mi a'l juntl klol qe; porke tuj tkyaqil twitz tx'otx' minti' ma tzaj tma'n Dios qa at juntl tu'n qklet tu'n, chi Pedro xi tma'n kye.

¹³Tejtzun kyke'yinte aj sanjelal minti' kyxob'il Pedro tuk'ix Juan, e lab'in kyi'j, porke b'a'n kyu'n qa mya xnaq'tzamni qe tuj skwel, ex tal aq'nal xjal qe; ex el kynik' kyi'j qa otoq che ten tuk'il Jesús.

¹⁴Ex ok kyke'yin aju xjal otoq b'anix wa'l ttxlaj Pedro ex Juan, ya minti'tl tumel tu'n kyyolin mastl kyi'j.

¹⁵O'kx xi kyma'n aj sanjelal kye tu'n kyex laq'e' kyxol; ex e ok ten yolil ti'j kyxolx,

¹⁶in kyma'n: —¿Ti k'okel kyi'j xjal lu? Porke ma b'aj kyb'i'n kykyaqil xjal, aqeju najl tuj Jerusalén, ti'j jun señ nim tipumal ma kyb'incha, ex mlay b'ant tu'n tkub' qewan jlu.

¹⁷Ex tu'n mi'n tel mastl tqanil kyxol xjal, qxob'tza'n ok qe tu'n mi'n kyyolin mastl ti'j Jesús, che chi.

¹⁸E tzajtzun kytxko'n ex xi kyma'n kye: Mi'n che yoline ex mi'n txi kyq'o'ntle xnaq'tzb'il ti'j Jesús, che chi.

¹⁹Atzunte Pedro tuk'ix Juan xi kytzaq'we'n: —Kyximankuye qa b'a'n tuj twitz Dios tu'n t-xi qnimane kyyole ex mya ate Dios tu'n t-xi qnimane;

²⁰ex mlay b'ant tu'n t-xi qkoline tu'n t-xi qma'ne aju ma qile ex ma qb'iye, che chi.

²¹Atzun kye aj sanjelal e ok kyxob'tza'n juntl maj, e je'tztzun kytzoqpi'n, minti' knet tumel kyu'n tu'n tkub' kysentens tu'n kylaj xjal, ex kykyaqil xjal in jaw kynimsa'n tb'i Dios ti'j ju xjal kox otoq b'anix.

²²Porke ate xjal lu otoq japun 40 ab'q'i tu'n tej tb'anix tu'n tipumal Dios.

²³Tejtzun kyetz tzoqpi'n Pedro tuk'ix Juan, e je'xtzun kyxol kyuk'il, ex xi kytx'olb'a'n tkyaqilju otoq q'manjtz kye kyu'n nejenel kye pal ex kyu'n kytijil xjal.

²⁴Tejtzun kyb'inte qe okslal, jaw tq'ajq'ajel kywi' junx, ex e yolin tuk'il Dios ex kyma: —Aya Tajaw Tkyaqil, ex aya Dios b'inchal kya'j, tx'otx' ex mar ex tkyaqilju at kywitz.

²⁵Tu'n Xewb'aj Xjan o tma tmajena David jun tyola chi kyja': ¿Tiqu'n ma che jaw tilj qe xjal? ¿Ex tiqu'n in kub' kyximan aju noqx gan?

²⁶B'aj kytxolb'an kyib' qe rey te twitz tx'otx', ex qe nejenel kyxol xjal b'aj kychmon kyib' junx tu'n kyq'ojin ti'j Qman ex ti'j Crist aju at toklen tu'n Dios, chi David tuj Tu'jil.

²⁷Ex ax tok tuj tnam lu kymojb'a kyyol Herodes tuk'ix Poncio Pilato, kyuk'ix qe xjal aj Israel ex kyuk'ix txqantl xjal, tu'n kyq'ojin ti'j Jesús aju Tk'wa'la xjan, aju ok tq'o'na toklen.

²⁸Ex ma kyb'incha tkyaqilju ximamaj tu'na ojtxi tu'n tipumala, ik tza'nx tajb'ila.

²⁹Ja'lotzun Tat, b'intza kyyol te xob'tzab'l qeye, ex q'ontza qipumale tu'n t-xi qma'ne tyola kye xjal, ex tu'n mi'n qxob'e, porke aqo'ye tmajena.

³⁰Ex q'ontza tipumala tu'n kyb'anix qe yab' ex tu'n kyb'inchet nimku b'inchb'en nim kyipumal ex nimku señ noq tu'n tipumal Jesús aju Tk'wa'la xjan, che chi.

³¹Ex tej kyb'aj na'n Dios, tzaj yukch ja jatum kyb'uyin kyib'; ex kykyaqil o noj tuj kyanmi tu'n Xewb'aj Xjan, ex xi kyma'n tyol Dios minti' kyxob'il.

³²Ex kykyaqil qeju otoq che okslan, junx kyximb'etz ex junx tb'is kyk'u'j tuj kyokslab'l; ex mi jun in q'mante qa noq teku aju at te, noq o'kx in b'aj kysipan kyxolx tkyaqilju at kye.

³³Ex nim tipumal kyyol apostol, in kychik'b'a'n qa axix tok otoq jatz anq'in Qajaw Jesús; ex nimxix t-xtalb'il Dios kub' ten kyib'aj.

³⁴Kyja'tzun mi a'l jun kye atxwit taj aju in ajb'en te; ex kykyaqil qeju at kytx'otx' ex qa kyja, in xi kyk'a'yintoq, ex tzaj kyi'n twi' aju otoq txi kyk'ayin,

³⁵ex xi kyq'o'n tuj kyq'ab' apostol; atzun kye apostol xi kysipan kye qeju at tajb'enxix kye.

³⁶Attoq jun xjal José tb'i, tiyjil Leví ex aj Chipre, Bernabé juntl tb'i ok kyq'o'n apostol. (Aju tnab'l tb'i, Q'uqb'alte kyk'u'j txqantl.)

³⁷Ate xjal lu attoq jun ttx'otx' xi tk'a'yin, ex tzaj ti'n twi tx'otx', ex xi tq'o'n tuj kyq'ab' apostol.