Read kumam Hechos 5 Bible Online

Hechos 5 - kumam bible

Hechos 5

¹Ex attoq juntl xinaq Ananías tb'i, ex Safira tb'i t-xu'jil, xi kyk'ayin jun piẍ kytx'otx'.

²Ex b'ant ti'j tu'n tuk'il t-xu'jil tu'n tkyaj kytzyu'n ch'in twi tx'otx' te kye; noqtzun mijx ul ti'n, ex xi tq'o'n tuj kyq'ab' apostol.

³Xitzun tma'n Pedro te: —Ananías, ¿tiqu'n ma txi tq'o'na amb'il te Satanás tu'n tokx tuj tanmiya tu'n tnik'ana yol twitz Xewb'aj Xjan, ma kyaj ttzyu'na mij twi tx'otx'?

⁴¿Na'nxtoq t-xi tk'a'yina tx'otx', myapetzun teya? ex tej t-xi tk'a'yina tx'otx', ¿myapetzun tuj tkwenta ta' twi'? ¿Tiqu'n ma kub' t-ximana tuj tanmiya ikju? Mya twitz xjal ma nik'ana yol, noq o'kx twitz Dios.

⁵Tejtzun tb'inte Ananías ju yol lu, kub' tz'aq ex kyim. Tzajtzun nim kyxob'il kykyaqil qeju e b'inte jlu.

⁶E ultzun junjun ku'xun, okx kyb'alq'i'n t-ximlal Ananías tuj jun xb'alun, ex kyi'n ex ku'x kymaqu'n.

⁷Matoq ox or tb'ajlen jlu tej tul t-xu'jil Ananías, okx tuja minti' b'a'n tu'n ti otoq b'aj ti'j tchmil.

⁸Xitzun tqanin Pedro te: —Q'mantza, ¿ikpetzun twi tx'otx' xi kyk'ayine ik tza'n ma kymaye? Atzunte xu'j tma: —Iktzun twi'ju.

⁹Xitzun tma'n Pedro te: —¿Tiqu'n xb'ant ti'j kyu'ne tu'n tok T-xew Qman tuj joyb'il ti'j kyu'ne? B'inxa, lu ma che ul qe ku'xun ttzi ja, aqeju ma che'x aj maqulte tchmila; ikxtzun k'elex q'i'na kyu'n.

¹⁰B'i'x kub' tz'aq naj ju xu'j t-xe tqan Pedro ex kyim. Tejtzun kyokx qe ku'xun tuja, otoq kyim te xu'j; etztzun kyi'n, ex ku'x kymaqu'n ttxlaj tchmil.

¹¹Tzajtzun nim kyxob'il kykyaqil okslal, ex tzaj kyxob'il kykyaqil xjal aqeju e b'inte jlu.

¹²Ex nimku kyb'inchb'en apostol nim kyipumal ex nimku qe señ kyb'incha kyxol xjal tu'n tipumal Dios; ex junxtoq kychmon kyib' kykyaqil twitz ja te Salomón tb'i.

¹³Atzun kye txqantl xjal minti' ok kynimarin kyib' tu'n tok kymojb'an kyib' kyuk'il apostol; ex e yolin b'a'n kyi'j.

¹⁴Ex nimku xjal e okslan ti'j Qajaw; tkyaqil q'ij kukx in che okslan tza'nx qe xinaq ax ikx qe xu'j;

¹⁵kyja'tzun e je'tz q'i'n qe yab' ttzi b'e, ex kub' kyq'o'n twitz watb'il ex twitz koẍb'il, ichaq noq t-xlekumal Pedro tzik' aj kyib'aj yab' ok tik' tuj b'e.

¹⁶Ax ikx nimku xjal in che tzajtoq kyuj qe tnam niqayin ttxlaj Jerusalén, e ul tuj Jerusalén q'i'n qe yab' kyu'n ex qeju in che yajlanjtz kyu'n ju'ẍ, ex kykyaqil e b'anix.

¹⁷Jawtzun we' ju nejenel kye pal kyxol judiy kyuk'ix qe tuk'il, aqeju jun k'loj xjal saduceo kyb'i, ex tzaj tlo'ch kyk'u'j kyi'j apostol;

¹⁸ex e tzaj kytzyu'n qe apostol, e okx kyq'o'n tuj pres tuj tnam.

¹⁹Ex ul jun t-anjel Qman te qonik'an, e jaqet qe tlamel ja tu'n jatum ate' qe pres, e je'tztzun ti'n qe apostol, ex xi tma'n kye:

²⁰—Kyxi'ye, ex che we'kuye tuj tja Dios, ex kymanxe kye xjal tqanil yol te chwinqlal, chi anjel.

²¹Tejtzun kyb'inte qe apostol ju yol lu, e okx tuj tja Dios te prim ex xi kyq'o'n xnaq'tzb'il kye xjal. B'ajtzun kychmon kyib' qe nejenel kye pal kyxol judiy kyuk'ix qe kyuk'il, ex e je'x txokb'aj qe Aj Sanjelal kye xjal judiy kyu'n, ax ikx kykyaqil qe kytijil xjal aj Israel, ex xitzun kysama'n qe polisiy q'ilte kye apostol tuj pres.

²²Tejtzun kypon qe polisiy minti' e knet qe apostol kyu'n tuj pres; e ajtztzun meltz'aj q'olte tqanil,

²³che chi kyja': —Ax tok aju kyja pres ma knet qu'ne lamo'nxix wen, ex qe xq'uqil pres ma che knet qu'ne wa'l qe ttzi tlamel ja; ex tej xjaqet qu'ne, mi jun xjal at tuj, che chi.

²⁴Tejtzun tb'inte nejenel kye xq'uqil tja Dios aju yol lu, kyuk'ix qe nejenel kye pal, tzaj jun kyximb'etz ti'j jatum kpol we' tkyaqil jlu.

²⁵Ex ul jun xjal kyuk'il tzaj tma'n tqanil kye, chi kyja': —Aqeju xinaq okx kyq'o'ne tuj pres, lu qe ate' tuj tja Dios, in kyq'o'n xnaq'tzb'il kye xjal.

²⁶Xi'tzun aju nejenel kye polisiy kyuk'ix qe polisiy, ex cheb'a e tzaj kyi'n, ex tzaj kyxob'il tu'n mi'n kyok xo'n tu'n ab'j kyu'n xjal.

²⁷E ultzun q'i'n apostol kywitz Aj Sanjelal kye xjal judiy, ex xitzun tqanin nejenel kye pal kye apostol, chi kyja':

²⁸—¿Minti'pe xi kyb'i'ne aju orden xi qq'o'ne kyeye tu'n mi'n t-xi kyq'o'ntle xnaq'tzb'il ti'j xjal lu? Atzun ja'lo ma kyb'i kykyaqil xjal aju kyxnaq'tzb'ile tuj tkyaqil Jerusalén, ex kyajb'ile tu'n tok kyq'o'ne te qeye qil aju tkyimlen ju xjal lu, che chi.

²⁹Xi kytzaq'we'n Pedro ex qe txqantl apostol: —Tnejel ilxix ti'j tu'n t-xi qnimane Dios, ex mya qe xjal.

³⁰Aju Kydios qxe'chel jaw anq'in Jesús tu'n, aju jaw kyyob'ine twitz jun crus, ex kub' kyb'yo'ne.

³¹Ate jlu ma jaw tnimsa'n Dios, ma kub' tq'o'n ttxlaj tuj b'anq'ab'aj tu'n tok te Nejenel ex Kolol, tu'ntzun tajtz ti'j kyanmi aj Israel ex tu'n tnajset kyil.

³²Ex testiw qo'ye ti'j tkyaqil jlu, ax ikx te Xewb'aj Xjan testiw ti'j, aju ma tzaj tq'o'n Dios kye qeju in che niman te, che chi apostol.

³³Tejtzun kyb'inte Aj Sanjelal jlu, tzaj nimxix kyq'oj, ex o kyajb'e tu'n kykub' b'yo'n apostol kyu'n.

³⁴Ex at jun fariseo kyxol Aj Sanjelal, Gamaliel tb'i, chik'b'al ti'j ley, ex nimanxix kyu'n kykyaqil xjal. Kub' we' Gamaliel ex xi tma'n tu'n kyetz q'i'n qe apostol ttxa'n pe'n noq te ch'in tuj.

³⁵Xitzun tma'n kye Aj Sanjelal: —Aqeye xinaq aj Israel, kyq'o'nke kwent ti'j ju ok kyb'incha'ye kyi'j xjal lu.

³⁶Porke na'n kyu'ne, ela'xi q'ij ul jun xjal Teudas tb'i, tma qa ma' toklen. Ex atlo kyaje syent xjal e ok lpe' ti'j. Ex kub' b'yo'n Teudas ex kykyaqil qeju e ok lpe' ti'j e je'l sputj ex e kub' naj.

³⁷Tb'ajlenxi jlu ul jun xjal Judas tb'i, aj Galilea; ul tuj tq'ijlalil tu'n ttz'ib'anjtz kyb'i xjal, ex nim xjal e ok lpe' ti'j. Ax ikx kub' b'yo'n te jlu, ex kykyaqil qeju e ok lpe' ti'j e el sputj.

³⁸Ja'lotzun kxel nma'ne kyeye: Mi'n tz'ok kyq'on kyib'e kyi'j xjal lu, ex mi'n che lab'te kyi'j; ex qa kyu'n xjal aju kyximb'etz lu ex ju kyaq'un, k'okel yupjtzun;

³⁹ex qa tu'n Dios, mlay b'ant tu'n tyupj kyu'ne; atwit tchi tuj kywitze, mya yajku ti'j Dios in che q'ojine, chi Gamaliel.

⁴⁰Xitzun kyniman tyol Gamaliel; e tzajtzun kytxko'n qe apostol ex e b'aj kyasyalin, ex xi kyma'n kye tu'n mi'n kyyolintl ti'j Jesús, ex e je'xtzun kytzoqpi'n.

⁴¹E je'tztzun qe apostol kywitz Aj Sanjelal in che tzalaj tu'nju b'a'n ela tuj twitz Dios tu'n tkub' kych'ixwi kywitz xjal, noq tu'n tlaj okslal qe ti'j Jesús.

⁴²Ex tkyaqil q'ij minti' xi kykolin tu'n t-xi kyq'o'n xnaq'tzb'il tuj tja Dios ex tujile kyja xjal ex tu'n t-xi kypakb'a'n tqanil b'a'n ti'j Jesús aju at toklen tu'n Dios.