Read kumam Hechos 8 Bible Online

Hechos 8 - kumam bible

Hechos 8

¹Atzunte Saulo mojl tyol kyuk'il tu'n tkyim Esteban. Ax q'ij e ok ten xjal yajlal kye kykyaqil okslal ate' tuj Jerusalén; ex kykyaqil e je'l sputj, e pon tuj tx'otx' Judea ex tuj tx'otx' Samaria, o'kx qe apostol e kyaj ten.

²Ku'xtzun maqu'n Esteban kyu'n junjun xinaq nimal Dios, ex e oq'xix ti'j.

³Atzunte Saulo kukx kyyajlanjtz qe okslal tu'n, nno'kx kyuj kykyaqil ja, ex in che etz tjawo'n qe xinaq ex qe xu'j, in che okx tq'o'n tuj pres.

⁴Atzun kye qeju otoq che el sputj, in che b'et tuj tkyaqil lugar in che pakb'an ti'j tqanil kolb'il.

⁵Atzunte Felipe xi' tuj tnam Samaria, ex xi tpakb'a'n kye xjal ti'j Crist aju at toklen tu'n Dios.

⁶Atzun kye xjal tej kyb'inte tyol Felipe ex tej kyke'yinte in che b'ant qe señ nim kyipumal tu'n, xi kyb'i'nxix, junx tok kynab'l ti'j aju xi tma'n Felipe kye.

⁷Ex nimku xjal at ju'ẍ tuj kyanmi in che b'anix, in che sch'in qe ju'ẍ ok kyetz tuj kyanmi xjal; ex nimku xjal tzqijle'n kyyab'il in che b'anix kyuk'ix nimku kox.

⁸Kyja'tzun nimxix e tzalaj qe xjal tuj tnam Samaria.

⁹Ex attoq jun chman tuj tnam, Simón tb'i, b'a'n mañ tu'n ex otoq che b'aj t-sb'u'n qe aj Samaria, in tma'n qa nim toklen.

¹⁰Xitzun kyb'i'nxix kykyaqil xjal aju tyol chman, tza'nx qeju ch'in kyoklen ax ikx qeju ma' kyoklen in kyma'n: —Ate xjal lu ma tz'ok te tipumal Dios ma'xix.

¹¹Ex xi kyb'i'nxix aju tyol chman, tu'nju otoq tz'el q'ij in che sb'unjtz tu'n noq tu'nju mañ b'a'n tu'n.

¹²Ex tej t-xi kyoksla'n aju tpakb'ab'l Felipe ti'j tkawb'il Dios ex ti'j Jesucrist, e b'yantzun qe xinaq ex qe xu'j.

¹³Ax ikxte Simón xi toksla'n, ex tej tb'yan ax o ten tuk'il Felipe; ex tej tok tke'yin qe señ ex qe b'inchb'en nim kyipumal in che b'ant tu'n Felipe, jawtzun lab'in ti'j.

¹⁴Atzun kye apostol ate'toq tuj Jerusalén, tej kyb'inte qa otoq kyk'am aj Samaria aju tyol Dios, xitzun sama'n Pedro kyu'n tuk'ix Juan tu'n kypon kyuk'il.

¹⁵Tejtzun tpon Pedro tuk'ix Juan tuj Samaria, e oktzun ten na'l Dios kyi'j okslal tu'n ttzaj q'o'n Xewb'aj Xjan kye.

¹⁶Tu'nju na'nxtoq ttzaj q'o'n Xewb'aj Xjan kye; noq o'kx otoq che b'yan tuj tb'i Qajaw Jesús.

¹⁷Atzunte Pedro tuk'ix Juan kub' kyq'o'n kyq'ab' tib'aj kywi' okslal, ex kyk'amtzun okslal aju Xewb'aj Xjan.

¹⁸Tejtzun tke'yinte Simón in q'onjtztoq Xewb'aj Xjan noq tu'nju in kub' kyq'o'n kyq'ab' apostol tib'aj kywi' xjal, xitzun tma'n kye tu'n t-xi kyi'n ch'in pwaq,

¹⁹ex tma: —Ax ikx kyq'ontze weye aju ipumalj lu, tu'ntzun kyk'monte xjal Xewb'aj Xjan ok tkub' nq'o'ne nq'ab'e tib'aj kywi'.

²⁰Atzunte Pedro xi tma'n te: —Knajel tpwaqa, ax ikx teya, porke ma kub' t-ximana qa noq tu'n tpwaqa tu'n tk'monteya aju oyaj in tzaj tq'o'n Dios.

²¹Minti' toklena ti'j jlu porke aju tanmiya mya tz'aqlxix twitz Dios.

²²Tajtz ti'j tanmiya tu'nju mya b'a'n ma tb'inchaya, ex kub'sana twitz Dios, qapelo jaku kub' najsa'n aju ma kub' t-ximana tuj tanmiya;

²³porke nno'k nke'yine puro nojni tuj tanmiya tu'n mya b'a'n, ex tzyu'nxa tu'nju mya b'a'n.

²⁴Xitzun ttzaq'we'n Simón: —Che kub'sane twitz Qajaw wi'je, tu'n mi'n ttzaj jlu wib'aje aju ma kymaye, chi Simón.

²⁵Atzun kye apostol t-xilenxi kychik'b'a'n aju axix tok ex tb'ajlenxi kyma'n tyol Dios kye xjal, e ajtz meltz'aj tu'n kyul tuj Jerusalén, ex tuj b'e in che pakb'an ti'j tqanil kolb'il kyuj nimku tal tnam kye aj Samaria.

²⁶Tb'ajlenxi jlu o yolin jun t-anjel Qajaw tuk'il Felipe ex tma: —We'ktza ex txi'ya tuj tnayaj q'ij tuj b'e in xi' tuj Jerusalén tu'n tku'pun tuj Gaza, chi anjel. Aju b'e lu in ku'x tuj lugar minti' kynajb'il xjal tuj.

²⁷Jawtzun we' Felipe, ex xi'tzun. Ex ok tk'ulb'an tib' tuk'il jun xjal aj Etiopía. Nim toklen ju xjal lu, ex onil te jun xu'j rey Candase tb'i, aju kyrey aj Etiopía. Tuj tkwent ta' aju tq'inumab'l xu'j rey, ex otoq tzul aj tuj Jerusalén k'ulul te Dios.

²⁸Kyja'toq taj xjal tuj ttanmi q'uqltoq tuj tcarwaj, ex in sch'intoq tuj Tu'jil Isaías aju t-sanjel Dios.

²⁹Atzunte Xewb'aj Xjan tzaj tma'n te Felipe: —Laq'e'xa ttxlaj carwaj.

³⁰Xitzun qelan Felipe ttxlaj, ex o tb'i in sch'intoq tuj Tu'jil Isaías aju t-sanjel Dios. Xitzun tqanin Felipe te: —¿Tzinpe nne'l tnik'a ti'j aju in jaw t-sch'i'na?

³¹Atzunte xjal tma: —¿Tza'n tten tu'n tel nnik'e ti'j qa mi a'l jun chik'b'alte weye? Ex o kub'san xjal tu'n tjax Felipe tuk'il ex tu'n tkub' qe' ttxlaj.

³²In sch'intoq tuj Tu'jil jatum in tma'n kyja': Xi q'i'n ik tza'n jun ẍne'l in xi q'i'n tuj b'iyb'il te; ex ik tza'n jun ẍne'l minti' in q'ajt twitz ju matzol ti'j, kyja'xtzun te minti' o q'ajt.

³³Tej tyajlanjtz minti' xi b'inchet ti'j; atzunju tiyjil, ¿alkye jun jaku b'ant ttx'olb'ante te? Porke kub' b'yo'n tu'n mi'n ttentl twitz tx'otx', chi tuj Tu'jil.

³⁴Xitzun tqanin aj Etiopía te Felipe: —Chin kub'sale teya tu'n ttzaj tma'na weye, ¿al i'j o yolin t-sanjel Dios; ti'jxpe o yolin ex qa ti'j juntl?

³⁵Tzyettzun tyolin Felipe, tzaj xe't tyol ti'j ju in tma'n tuj tu'jil Isaías aju t-sanjel Dios, ex xi tpakb'a'n aju tqanil b'a'n ti'j Jesús.

³⁶Ex kyja' kyxi' tuj b'e, e kanun ttzi jun a', tmatzun ju xjal: —Lu jun a' lu; ¿myapelo b'a'n tu'n nb'yane?

³⁷[Xitzun tma'n Felipe te: —Qa ma txi toksla'na tu'n tkyaqil tanmiya, jaku b'ant. Xi ttzaq'we'n xjal: —Kxel woksla'ne ate Jesucrist Tk'wa'l Dios.]

³⁸Xitzun tma'n xjal tu'n twe' carwaj; e ku'xtzun kykab'il tuj a', ex o b'yan ju xjal tu'n Felipe.

³⁹Tejtzun kyjatz tuj a', jaw q'i'n naj Felipe tu'n T-xew Qajaw, ex minti' o ilwaj juntl maj Felipe tu'n xjal; ik'tzun xjal in tzalaj tuj tb'e.

⁴⁰Atzunte Felipe pon q'i'n tuj tnam Azoto; ex ik'tzun in pakb'an ti'j tqanil kolb'il kyuj kykyaqil tnam, ex pon max tuj Cesarea.