Read kumam Romanos 10 Bible Online

Romanos 10 - kumam bible

Romanos 10

¹Erman, ax tok tajb'il wanmiye ex in chin kub'sane twitz Dios kyi'j aj Israel, tu'n kyklet.

²Porke ma wile tza'n kyten, nim kygan tu'n kyajb'en te Dios, ex minti' nne'l kynik' ti'j alkye tumel tu'n kyajb'en te Dios,

³porke minti' nne'l kynik' ti'j tza'n tten tu'n kyok te tz'aqlxix tu'n Dios, noq o'kx nno'k tilil kyu'n tu'n kyok te tz'aqlxix kyu'nx kyb'inchb'en, ex minti' in xi kyq'on kyib' te Dios tu'n kyok q'o'n te tz'aqlxix.

⁴Porke aju tley Moisés o'kx japun b'aj ti'j Crist, tu'ntzun kyok q'o'n te tz'aqlxix tu'n Dios kykyaqil qeju ma che okslan ti'j Crist.

⁵Porke kyaj ttz'ib'an Moisés tza'n tten tu'n tok jun xjal te tz'aqlxix tu'nju ley, chi in tma'n kyja': Qa ma japun tu'n xjal tkyaqilju in tma'n tuj ley, ok k'anq'il tu'n, chi tuj ley.

⁶Atzun ti'j ju tu'n qok tq'o'n Dios te tz'aqlxix noq tu'n qokslab'l in tma'n kyja': Mi'n tmaya tuj tanmiya: ¿Alkye kjawix tuj kya'j? (atzunte jlu taj tu'n tku'tz Crist tu'n tzalu twitz tx'otx');

⁷ex mi'n tmaya: ¿Alkye kb'elex tuj kynajb'il kyimni? (atzunte jlu taj tu'n tjatz q'i'n Crist tu'n kyxol kyimni).

⁸Ex ¿ti t-xilen ju yol lu? Niqayin ta' ju yol ttxlaja, tuj ttzi'ya ta' ex tuj tanmiya, chi tuj Tu'jil. Atzunju yol lu in xi qpakb'a'ne in yolin ti'j okslab'l:

⁹Qa in tchik'b'a'na tu'n ttzi'ya qa a Jesús Qajaw, ex qa ma tokslaya tuj tanmiya qa tu'n Dios jatz anq'in Jesús kyxol kyimni, ok kletela.

¹⁰Porke tuj qanmi in xi qoksla'n tu'n qok te tz'aqlxix tu'n Dios, ex tu'n qtzi' in qchik'b'a'n qa a Jesús Qajaw tu'n qklet.

¹¹Porke in tma'n tuj Tu'jil: Kykyaqil qeju ma che okslan ti'j, mlay che ch'ixwi, chi tuj Tu'jil.

¹²Tuj twitz Dios mya part kyxilen xjal judiy kyuk'il qe xjal mya judiy, tu'nju axte Qajaw, Kyajaw kykyaqil, ex in tzaj tq'o'n nimku kye kykyaqil qeju in che kub'san twitz.

¹³Porke in tma'n tuj Tu'jil, kykyaqil qeju in che kub'san twitz Qman, ok che kletel.

¹⁴Ex ¿tza'ntzun tten tu'n kykub'san twitz Qajaw qa na'nx kyokslan ti'j? ¿Ex tza'ntzun tten tu'n kyokslan ti'j qa na'nx kyb'inte ti'j? ¿Ex tza'n tten tu'n kyb'inte qa mi a'l jun q'ol tqanil kye?

¹⁵¿Ex tza'n tten tu'n kyq'onte tqanil ti'j qa mi ẍe'x sama'n? Ik tza'n in tma'n tuj Tu'jil: Tb'anilxix kyke'yinx qeju [in che pakb'an tu'n kyten xjal tuj txub'txaj, ex] in che pakb'an tqanil b'a'n.

¹⁶Ex mya kykyaqil in xi kyb'i'n aju tqanil kolb'il; porke in tma'n Isaías: Tat, ¿Mape txi kyoksla'n xjal qpakb'ab'le? Chi Isaías.

¹⁷Kyja'tzun in qo okslan tu'nju yol in qb'i'n, ex aju yol in qb'i'n tyol Crist.

¹⁸Ex in xi nma'ne: ¿Maj minti' o kyb'i aju yol lu? O kyb'i. Porke in tma'n tuj Tu'jil: Tuj tkyaqil twitz tx'otx' ma tz'ex tqanil kyyol, ex ma pon b'aj kyyol ttxa'npun tx'otx', chi tuj Tu'jil.

¹⁹Ex in xi nma'ne juntl maj: ¿Maj minti' b'a'n jlu kyu'n aj Israel? B'a'n kyu'n. Porke tnejelxix in tma'n Moisés kyi'j aju tzaj tma'n Dios te: Ktzajel tlo'ch kyk'u'je wu'ne tu'n tlaj juntl tnam aju in kyma'ne ti'j qa minti' tajb'en; ex che jawil q'ojle wu'ne tu'n tlaj jun tnam minti' tnab'l, chi Dios.

²⁰Ax ikx te Isaías o yolin kyuwxix ex tma kyja': Ma chin knete kyu'n qeju minti' in che jyon wi'je. Ma txi nyek'un wib'e kye qeju minti' in che qanin wi'je, chi Dios.

²¹Atzun kyi'j aj Israel in tma'n Isaías kyja': Enter jun q'ij ma txi nnuqpi'n nq'ab'e txkol te jun tnam mib'an b'in ex mojtzal yol, chi Isaías.