Read kumam Romanos 11 Bible Online

Romanos 11 - kumam bible

Romanos 11

¹Kyja'tzun in xi nma'ne: ¿Maj o tz'el tik'un Dios aju tnam Israel etzan tu'n? Mi'n. Porke ikx weye aj Israel qine, tiyjil Abraham qine, tiyjil Benjamín qine.

²Minti' o tz'el tik'un Dios tnam Israel aju etzan tu'n ex jaw t-sk'o'n atxix ojtxi. ¿Minti'petzun b'a'n kyu'ne aju in tma'n tuj Tu'jil ti'j Elías aju t-sanjel Dios, tza'n tten o yolin tuk'il Dios kyi'j aj Israel qa mya b'a'n qe? Ex tma:

³Nman, ma che kub' kyb'yo'n qe t-sanjela, ex ma kub' kyxitun qe t-altara; ex njunalxe ma chin kyaj tene, ex nno'k tilil kyu'n tu'n nkub' kyb'yo'n, chi Elías.

⁴Ex, ¿titzun tzaj ttzaq'we'n Dios? Atx wuq mil xinaq k'u'nx wu'ne te weye, na'nx kykub' ẍmeje' twitz tilb'ilal Baal, chi Dios.

⁵Ax ikxtzun tuj tq'ijlalil ja'lo atx junjun sk'o'maj qe tu'n t-xtalb'il Dios.

⁶Qatzun tu'n t-xtalb'il Dios, myatzun tu'n kyaq'unb'en; ex noqwit tu'n kyaq'unb'en, tu'n jlu aju t-xtalb'il Dios myawtlo jun xtalb'il.

⁷¿Tza'ntzun tten jlu? Minti' e kanun aj Israel ti'j ju in kyjyo'n; atzun qeju sk'o'maj qe kyxol, ma che kanun ti'j, ex txqantl kyuwix kyanmi;

⁸ik tza'n in tma'n tuj Tu'jil: Ax Dios jpunte kynab'l tu'n mi'n kylonte tu'n kywitz ex tu'n mi'n kyb'inte tu'n kyẍkyin, ex kukx kyten ja'lo, chi tuj Tu'jil.

⁹Ax ikx in tma'n David: Aju nintz wa'n nno'k kyu'n kyuk'il kyamiw, tz'okwit te k'ob'il kye ex te tzuyb'il kye, tu'ntzun kyjaw tolj ex tu'n tkub' kycastiw.

¹⁰Tz'okwit sjumj ti'j kywitz tu'n mi'n tb'ant kyke'yin, ex kub'xwit tze'jix ttzal kyi'j te jumajx, chi David tuj Tu'jil.

¹¹Kyja'tzun in xi nma'ne: ¿Ope che jaw tolj aj Israel tu'n kykub' tz'aq te jumajx? Mi'n. Ex tu'nju otoq che kub' tz'aq aj Israel, ul kolb'il kye xjal mya judiy qe, tu'ntzun ttzaj kyna'n kyib' aj Israel ex tu'n kyok lpe' kyi'j txqantl xjal.

¹²Qatzun ma tzaj q'o'n xtalb'il kye kykyaqil xjal noq tu'nju kykub'len tz'aq aj Israel, ex qa tu'nju e el txalpuj aj Israel, qe xjal mya judiy qe ma kyk'am xtalb'il, yajtzun ok kyjaw we' juntl maj kykyaqil aj Israel, ¿myapelo mas nim xtalb'il ok kyk'ma' qe xjal?

¹³Ex at jun nyole kyeye, aqeye xjal mya judiy qeye. Noq tu'nju apostol qine kye xjal mya judiy, kyja'tzun aju waq'une tzaj q'o'n ma'xix toklen tuj nwitze,

¹⁴nno'k tilil wu'ne tu'n ttzaj kyna'n kyib' qe nxjalile ex tu'n kyok lpe' kyi'je, tu'ntzun kyklet junjun kye.

¹⁵Qatzun ma b'ant kyten txqantl xjal tuk'il Dios noq tu'nju e el ik'un aj Israel tu'n, yajtzun ok kyk'met juntl maj aj Israel tu'n Dios, ¿myapelo jun anq'ib'l jlu kye qeju ik tza'n kyimni qe ja'lo?

¹⁶Ex qa xjansa'maj aju tnejel pan in xi q'ot te Dios, ax ikx tkyaqil tq'otjil pan xjansa'maj. Ex qa xjansa'maj tlok' tze', ax ikx qe tq'ab' xjansa'maj.

¹⁷Ex at junjun aj Israel ik kyten ik tza'n tq'ab' tze' olivo ma che el tx'emin, ex aqeye ik kytene ik tza'n tq'ab' tze' olivo tuj k'ul, ma che ok tx'apo'ne te kyxel. Kyja'tzun ma kyk'ame kyipumale ti'j tlok' olivo ex ti'j tlechil.

¹⁸Ex mi'n jaw kyniman kyib'e kywitz qeju mer tq'ab' tze'; qatzun ma jaw kyniman kyib'e, kyna'ntze mya aqeye k'a'chalte tlok' tze', ate tlok' tze k'a'chal kyeye.

¹⁹Oklo kyma'ye: Ikloju, ex ma che el tx'emin qe tq'ab' tze' tu'n qok tx'apo'ne te kyxel, che chiloye.

²⁰Ax tok; ex ma che el tx'emin tu'nju minti' kyokslab'l, atzun kyeye noq tu'n kyokslab'le ma che ok tx'apo'ne te kyxel. Mi'ntzun jaw kyniman kyib'e, o'kx che xob'e twitz Dios.

²¹Ex qa minti' kyaj tklo'n Dios aju tekuxix tze' tq'ab', ax ikx kyeye mlay che kyaj klo'ne tu'n.

²²Ex tz'elx kynik'e ti'j, ate Dios b'a'n, ax ikx kyuw te Dios; ax tok kyuw tyol kye qeju e kub' tz'aq, ex tb'anilxix tyol kyeye, qa kukx ma qe' kyk'u'je ti'j qa b'a'n te Dios; qatzun mi'n, ax ikx kyeye ok che elel tx'emine tu'n.

²³Ax ikx qe aj Israel, qa ma tz'ajtz ti'j kyanmi ex qa ma che okslan, ok che okel tx'apo'n juntl maj, porke ate Dios at tipumal tu'n kyok tx'apo'n juntl maj.

²⁴Ex qa ma che el tx'emine ti'j jun tze' olivo tajx in tzaj ch'iy tuj k'ul, ex qa ma che ok tx'apo'ne ti'j jun tze' olivo awa'n in ku'x ex tb'anil, myatzun ẍe el ch'iye ti'j, yajtzunlo kye qeju mer tq'ab' olivo tb'anil, ¿mlaypelo che ok tx'apo'n juntl maj ti'j kyximlalx?

²⁵Erman, waje tu'n kyb'inteye aju yol lu ewantoq nej tu'n Dios, tu'ntzun mi'n tkub' kyximane qa mas at kynab'le: ax tok ma kyuwix kyanmi aj Israel, pero mya te jumajx, ma kyuwix ch'in akutzun in tz'aqet kyajlal txqantl xjal mya aj Israel qe, aqeju che kletel.

²⁶Ex kyja'xtzun che kletel kykyaqil aj Israel, ik tza'n in tma'n tuj Tu'jil: Tuj tnam Sión ktzajel aju tzoqpil kye, k'elel ti'n ju mya b'a'n kyxol tiyjil Jacob.

²⁷Atzunwe nyol jlu kyjel b'ant ti'j wu'ne kyuk'il ok tel wi'ne kyil, chi Dios.

²⁸Tuj jun tumel, aj q'oj qe aj Israel ti'j Dios tu'n tlaj minti' xi kyoksla'n tqanil kolb'il; kyja'tzun ma tzaj q'o'n amb'il kyeye tu'n kyokslane, aqeye xjal mya judiy; ex tuj juntl tumel, k'ujla'n qe aj Israel tu'n Dios tu'n kylaj qe kyxe'chel sk'o'maj qe tu'n Dios.

²⁹Ex mlay tz'el ti'n Dios aju t-xtalb'il o tzaj tq'o'n kye, ex mlay ch'expet aju tyol ti'j ju txokb'il kye.

³⁰Ik tza'n kyeye, ojtxi minti' xi kynimane Dios, atzun ja'lo ma tzaj q'aq'an tk'u'j Dios kyi'je tu'nju minti' xi kyniman aj Israel,

³¹ax ikxtzun kye jlu minti' ma txi kyniman ja'lo, ex tzul q'aq'an tk'u'j Dios kyi'j, ik tza'n kyeye ma tzaj q'aq'an tk'u'j kyi'je.

³²Ex kykyaqil xjal mib'an che niman, tza'nx qe xjal judiy ex qe xjal mya judiy, junx ma che ok tq'o'n Dios mer ik tza'n kyokx qe tuj pres, tu'ntzun ttzaj q'aq'an tk'u'j kyi'j kykyaqil.

³³Ma'xix t-xilen tnab'l Dios ex ju tojtzqib'l. Mlay tz'el qnik' ti'j t-ximb'etz ex mlay knet tumel tb'e qu'n.

³⁴Ex ¿atpe jun xjal o tz'el tnik' ti'j t-ximb'etz Qman? Ex ¿atpe jun xjal o q'onte tnab'l?

³⁵Ex ¿atpe jun xjal o txi q'onte jun ti'xti nej te Dios tu'n tajtz t-xel tu'n? Minti'.

³⁶Porke tuk'il Dios in tzaj tkyaqil, ex tu'n Dios o b'ant tkyaqil, ex tete Dios tkyaqil. Nimanxwit ju tb'i te jumajx. Ikxwitju.