Read kumam Romanos 12 Bible Online

Romanos 12 - kumam bible

Romanos 12

¹Erman, ma tzaj q'aq'an tk'u'j Dios q'ij, kyja'tzun chin kub'sale kywitze tu'n t-xi kyq'o'ne kyximlale te Dios ik tza'n jun oyaj itz', tekuxix Dios ex b'a'n nne'la tuj twitz, atzun kyk'ulb'ile axix tok twitz Dios.

²Ex mi'n che ok lpe'ye ti'j kynab'l xjal mya b'a'n, noq o'kx kych'expum kynab'le tu'n kyoke te ak'aj, tu'ntzun kyojtzqinteye alkye tajb'il Dios, tu'n tel kynik'e ti'j alkye b'a'n, ex alkye in tzalaj Dios ti'j ex alkye ju tz'aqlxix.

³Noq tu'n t-xtalb'il Dios ma tzaj q'o'n woklene, kyja'tzun kxel nma'ne kyeye kykyaqile, mi jun tu'n t-ximan ti'jx qa at mas toklen ex b'alo minti', noq o'kx tu'n t-ximan ti'jx tujxix tumel, ik tza'nx tokslab'l junjun tzaj tmalo'n Dios.

⁴Porke ik tza'n qximlal nimku iqan tu'n ex mya junx ta' kyaq'un,

⁵ikxtzun qten, maske nimku qb'aj pero noq jun qximlal tu'nju qmojb'ab'l qib' tuk'il Crist, ex qkyaqil qtzuylaj qib' ti'j jun qximlal.

⁶Kyja'tzun, junxilchaq toklen junjun qe ma tzaj tq'o'n Dios ik tza'nx tajb'il, b'a'n tu'n qajb'en tuj tumelxix. Alkye at toklen tu'n t-xi tpakb'a'n tyol Dios, b'a'n tu'n t-xi tpakb'a'n ik tza'nx tokslab'l tzaj tmalo'n Dios.

⁷Alkye at toklen tu'n tajb'en kye txqantl, b'a'n tu'n tajb'en. Alkye at toklen tu'n tq'onte xnaq'tzb'il, b'a'n tu'n t-xi tq'o'n xnaq'tzb'il.

⁸Alkye at toklen tu'n t-xi tq'o'n kynab'l txqantl, b'a'n tu'n t-xi tq'o'n kynab'l. Alkye b'a'n q'on kotzb'aj, q'onx tu'n tkyaqil tk'u'j. Alkye b'a'n tok te nejenel, b'a'n tu'n tok tq'o'n kwent ti'j; ex alkye in q'aq'an tk'u'j ti'j juntl, oninx tu'n tkyaqil tzalajb'il.

⁹Aju kyk'ujlalile myawt noq tten. Kyik'un ele aju mya b'a'n, che lpe'ke ti'j ju b'a'n.

¹⁰Kyk'ujlam kyib'e kyxolxe porke kyitz'in kyib'e; tz'ok tililx kyu'ne tu'n kynimanjtz qe txqantl okslal ex mya o'kx aqeye tu'n kynimanjtze.

¹¹Tz'ok tililx kyu'ne ex mi'n che oke ky'aj; tenwt t-sek'al kyanmiye ex che ajb'ene te Qajaw.

¹²Che tzalajxe tu'nju q'uql kyk'u'je tu'n kytene tuk'il Qajaw; tzik'xwit yajb'il kyu'ne; ex mi'n che q'ajene tu'n kyna'ne Dios.

¹³Che onine kyi'j okslal ti'j ju atx taj kye; ex kyq'onxe kyposad okslal.

¹⁴Che kub'sane twitz Dios tu'n kykub' ky'iwla'n qeju in che yajlan kyeye; kyqaninxe ky'iwb'il kyib'aj, ex mi'n txi kyqanine mya b'a'n kyib'aj.

¹⁵Che tzalajxe kyuk'il qeju in che tzalaj; che oq'e kyuk'il qeju in che oq'.

¹⁶Junxwit kynab'le kyxolxe; mi'n jaw kyniman kyib'e; kymojb'an ok kyib'e kyuk'il qeju noq ch'in kyoklen. Mi'n che ximane ti'j qa mas at kynab'le.

¹⁷Qa ma b'inchanjtz mya b'a'n kyi'je, mi'n tz'aj kyq'o'ne t-xel mya b'a'n; tz'ok tililx kyu'ne tu'n tb'ant aju b'a'n tuj kywitz kykyaqil xjal.

¹⁸Qa jaku b'ant kyu'ne, tz'ok tililx kyu'ne tu'n kytene b'a'n kyuk'il kykyaqil xjal.

¹⁹Aqeye erman at nk'u'je kyi'je, mi'n tz'aj kyq'o'ne t-xel mya b'a'n, noq o'kx kyq'onkje tuj tkwent Dios; porke in tma'n tuj Tu'jil: Wu'ne k'ajel t-xel; aqine chin q'olte castiw, chi Qman.

²⁰Kyja'tzun, aju aj q'oj ti'ja, qa at we'yaj ti'j, q'onxa twa; ex qa at txqetle'n ti'j, q'onxa tk'a'; qa ma tb'inchaya ikju ktzajel tch'ixwi, chi tuj Tu'jil.

²¹Mi'nwt kub' ti'ja tu'nju mya b'a'n, noq o'kx tu'n tkub' ti'j mya b'a'n tu'na tu'nju tb'inchb'ena b'a'n.