Read kumam Romanos 15 Bible Online

Romanos 15 - kumam bible

Romanos 15

¹Kyja'tzun, awqo' at qipun tuj qokslab'l, tzik'xwit qu'n aju kypaltil qeju minti' kyipun, ex mi'n qb'incha aju qex qajb'il tu'n qtzalaj ti'j.

²Teyle junjun qe qb'incham aju b'a'n, tu'n tajb'en te jun onb'il te quk'il ex tu'n ttzalaj ti'j, ex tu'n tch'iy tnab'l.

³Porke ik tza'n te Crist minti' tb'incha tex tajb'il tu'n ttzalaj ti'j; noq o'kx ik'x tu'n ik tza'n in tma'n tuj Tu'jil: Aju yasb'il kyu'n qeju in che yasun ti'ja kub' tz'aq wib'aje.

⁴Ex tkyaqil aju o tz'ib'anjtz tuj Tu'jil ojtxi, o tz'ib'anjtz te xnaq'tzb'il qe, tu'n tten qpasens ex tu'n tqe' qk'u'j tu'nju yol tz'ib'an tuj Tu'jil, tu'ntzun tqe'xix qk'u'j ti'j Dios.

⁵Aju Dios q'ol kypasense ex q'uqb'al kyk'u'je, awt Dios tz'onin kyeye tu'n kytene junx kynab'le kyxolxe ik tza'nx tajb'il Jesucrist,

⁶tu'ntzun tjaw kynimsa'ne tb'i Dios, aju Tman Qajaw Jesucrist, junx kynab'le kykyaqile ex junx kyyole.

⁷Kyja'tzun kyk'mom kyib'e kyxolxe ik tza'n te Crist ma qo tk'am, tu'n tjaw nimset tb'i Dios.

⁸Kyja'tzun kxel nma'ne kyeye, ate Jesucrist ok tq'on tib' te ajb'el kye aj Israel tu'n tyek'unjtz qa ax tok tyol Dios, tu'ntzun tjapun aju tyol Dios tziyimaj tu'n ojtxi kye qxe'chel,

⁹ex tu'n tjaw nimsa'n tb'i Dios kyu'n xjal mya judiy qe, tu'nju ma tzaj q'aq'an tk'u'j Dios kyi'j, ik tza'n in tma'n tuj Tu'jil: Tu'ntzunju kjawil nnimsa'ne tb'iya kyxol txqantl xjal kyuj txqantl nasyon, ex chin b'itzale tu'n tjaw nimset tb'iya.

¹⁰Ex juntl maj in tma'n: Aqeye txqantl xjal kyuj txqantl nasyon, che tzalajxe tuk'il ju tnam etzan tu'n Dios.

¹¹Ex juntl maj in tma'n: Kynimsa'nktze tb'i Qman, aqeye txqantl xjal kykyaqile kyuj txqantl nasyon, ex kykyaqile aqeye tnam kynimsa'nktze tb'i.

¹²Ex at jun yol in tma'n Isaías kyja': Ktzajel jun tiyjil Isaí. Tzul te kawil kyib'aj txqantl xjal kyuj txqantl nasyon; ex kqeb'el kyk'u'j txqantl xjal ti'j, chi tuj Tu'jil.

¹³Ate Dios in tzaj q'uqb'ante qk'u'j, awt nojsante kyanmiye tu'n tkyaqil tzalajb'il, ex awt q'onte kymojb'ab'l kyib'e noq tu'n kyokslab'le, tu'ntzun tqe'xix kyk'u'je ti'j tu'n tipumal Xewb'aj Xjan.

¹⁴Q'uql nk'u'je kyi'je, erman, tu'nju b'a'n kymodiye, ex at nim kyojtzqib'le, ex b'a'n che q'on kynab'le kyxolxe.

¹⁵Ex clarxix ma txi ntz'ib'ane kyeye erman ti'j junjun yol, tu'n mi'n tik' tna'l kyu'ne. Ma txi nma'ne tu'nju at woklene tzaj tq'o'n Dios,

¹⁶tu'n woke ajb'el te Jesucrist kyxol xjal mya judiy. Aju wajb'eb'le, tu'n t-xi npakb'a'ne tqanil kolb'il aju ma tzaj tq'o'n Dios, tu'ntzun kyk'met txqantl xjal tu'n Dios ik tza'n jun oyaj b'a'n nne'la tuj twitz, pa'nmaj qe tu'n Xewb'aj Xjan tu'n kyajb'en o'kx te Dios.

¹⁷Tu'nju okslal qine ti'j Jesucrist, kyja'tzun in chin tzalaje ti'j wajb'eb'le te Dios.

¹⁸Ex mlay chin yoline ti'j juntl ti'xti, o'kx ti'j ju ma tb'incha Crist, tu'n nyole ex tu'n waq'unb'ene tu'n t-xi kyniman xjal mya judiy tyol Dios.

¹⁹Ma b'ant jlu wu'ne noq tu'n kyipumal qe señ ex tu'n kyipumal qe b'inchb'en ma'xix kyxilen, ex tu'n tipumal T-xew Dios; kyja'tzun, ma pon b'aj npakb'a'ne tqanil kolb'il tu'n Crist, tzajnix tuj tnam Jerusalén ex max ma pon b'aj tuj tx'otx' Ilírico.

²⁰Ex kyja'tzun nno'k tilil wu'ne tu'n t-xi nma'ne tqanil kolb'il jatum na'nxtoq kyb'inte xjal tqanil ti'j Crist, tu'ntzun mi'n waq'nane jatum otoq xe't tu'n juntl xjal,

²¹ik tza'n in tma'n tuj Tu'jil: Aqeju b'ajx kyb'i tqanil ti'j, ok kyila', ex aqeju na'nxtoq kyb'inte tqanil ti'j, k'elel kynik' ti'j, chi tuj Tu'jil.

²²Kyja'tzun, nimku maj o chin we'ye tu'n mi'n nxi'ye kyuk'ile.

²³Ex ja'lo, minti'tl jatum tu'n waq'nane kyuj lugar tzalu, ex ma b'et-xi ab'q'i in wajb'e'ne tu'n nxi'ye kyuk'ile.

²⁴Kyja'tzun, ok nxi'ye tuj España, chin ik'ele kyuk'ile; porke ximan wu'ne ok wila'ye kywitze ok wik'e, ex tu'n ttzaj kyq'o'ne ch'in onb'il weye tu'n tajb'en tuj nb'eye, otoqxi chin tzalaj ch'ine kyuk'ile nej.

²⁵Atzun ja'lo ma chinxe tuj tnam Jerusalén tu'n t-xi wi'ne jun onb'il kye okslal.

²⁶Porke b'a'n ela tuj kywitz aj Macedonia ex qe aj Acaya tu'n tjaw chmet jun oyaj tu'n t-xi q'ot kye meb'a ate' kyxol okslal tuj Jerusalén.

²⁷Porke b'a'n ela tuj kywitz aj Macedonia tu'n t-xi kyq'o'n jun oyaj kye okslal tuj Jerusalén, ok kyq'o'n mer ik tza'n at kyk'as kyuk'il; porke ik tza'n ma kyk'am xjal mya judiy ju tky'iwb'il Dios noq kyu'n okslal judiy, ax ikxtzun il ti'j tu'n kyonin xjal mya judiy ti'j ju at tajb'en kye okslal judiy.

²⁸Kyja'tzun, ok tjapun jlu wu'ne, t-xilenxi nq'o'ne aju oyaj lu kye, chin ik'ele visitaril kyeye ok nxi'ye tuj España.

²⁹Ex b'a'n wu'ne, ok nxi'ye kyuk'ile, ok kyk'ma'ye nimxix t-xtalb'il Crist ok npone kyuk'ile.

³⁰Chin kub'saltzune kywitze erman, noq tu'nju okslal qo' ti'j Qajaw Jesucrist, ex tu'nju at kyk'ujlalile tu'n Xewb'aj Xjan, che onine wi'je tuj kyna'j Diose, ex che kub'sane twitz Dios wi'je,

³¹tu'n nkolpaje kywitz qe xjal mib'an che b'in ate' tuj Judea, ex aju oyaj kxel wi'ne kye okslal tuj Jerusalén b'a'nwt tz'e'la tuj kywitz;

³²ex tu'n npone kyuk'ile tuk'il tzalajb'il noq tu'n tajb'il Dios, ex tu'n wojlan ch'ine kyuk'ile.

³³Awt Dios ten kyuk'ile kykyaqile, aju q'olte qmojb'ab'l qib'. Ikxwitju.