Read kumam Romanos 2 Bible Online

Romanos 2 - kumam bible

Romanos 2

¹Tu'ntzunju minti' tkolb'il tib'a, aya wuk'il, noq alxkyeya in yolina ti'j juntl qa aj ilxix; tu'nju in yolina ti'j juntl qa aj ilxix, tib'ajxa in kub' tz'aq, porke in tma'na qa aj ilxix juntl, ax ikx teya in tb'incha'na mya b'a'n.

²Ex b'a'n qu'n, tuj tumelxix kb'el kysentens xjal tu'n Dios, aqeju in che b'inchan il.

³Yajtzun teya wuk'il, in yolina kyi'j qeju in che b'inchan il ax ikx teya in tb'incha'na mya b'a'n, ¿maj in ximana ti'j qa tu'n ttzoqpaja tuj jwisi tzul tu'n Dios?

⁴¿Mujqa nne'l tik'una Dios tu'nju b'a'nxix ex at tpasens ex apa'nx tu'n? ¿Minti'pe b'a'n tu'na ate Dios in txokon teya tu'n tajtz ti'j tanmiya tu'nju at nim t-xtalb'il?

⁵Ex tu'nju kyuw tanmiya ex minti' nna'jtz ti'j, kyja'tzun mas in ch'iy tcastiwoya aju ok tk'ma'ya tuj q'ij ok ttzaj tcastiwoya tu'n Dios, ex ok ttzaj jwisi tuj tumelxix tu'n Dios.

⁶Porke ktzajel tq'o'n Dios chojb'il te teyle junjun ik tza'nx taq'unb'en.

⁷Ktzajel tq'o'n Dios chwinqlal te jumajx kye qeju kukx tok tilil kyu'n tu'n kyb'inchante b'a'n, nno'k tilil kyu'n tu'n kykamb'ante jun nimb'il kye tuj kya'j ex tu'n tten kychwinqlal te jumajx.

⁸Atzun kye qeju kyk'i' che b'in ex minti' in xi kyniman aju yol ax tok, noq o'kx in xi kyniman aju mya tuj tumel, tzul tq'oj Dios kyi'j ex ktzajel tq'o'n kycastiw.

⁹Tzul yajb'il ex k'ixk'oj kyib'aj kykyaqil xjal in che b'inchan mya b'a'n, tnejelxix kye xjal judiy, ax ikx kye xjal mya judiy.

¹⁰Atzun kye qeju in kyb'incha'n b'a'n, ktzajel tq'o'n Dios nimb'il kye tuj kya'j, ex che tel tuj txub'txaj, tnejelxix kye xjal judiy, ax ikx kye xjal mya judiy.

¹¹Porke minti' nno'k tke'yin Dios ti kyxilen xjal.

¹²Ex kykyaqil qeju o che b'inchan il ex minti'toq b'i'n tley Moisés kyu'n, ok che najel minti' toklen ley kyi'j; ex kykyaqil qeju o che b'inchan il ex b'i'ntoq tley Moisés kyu'n, che okel tuj xjel ex kb'el kysentens tu'nxju ley.

¹³Ex mlay che ok tq'o'n Dios qe xjal te tz'aqlxix qa noq in che b'in ti'j ley ex minti' in japun kyu'n; noq o'kx che okel te tz'aqlxix tu'n, aqeju in japun ley kyu'n.

¹⁴Porke qe xjal mya judiy qe, aqeju minti' tley Moisés kyuk'il, qa ma kyb'incha aju in tma'n ley, ax kynab'l in q'mante alkye tu'n kyb'inchante maske minti' jun ley kyuk'il, kyja'tzun kyleyx kyib'.

¹⁵Ax kyb'inchb'en in yek'unte qa at jun ley tz'ib'an tuj kyanmi, aju ley lu in tma'n tu'n tjapun kyu'n ik tza'n in tma'n tuj tley Moisés, ex ax kyanmi in q'mante qa ax tok jlu, ex tuj kyximb'etz at maj in kyma'n qa at kyil ex at maj in kyma'n qa minti'.

¹⁶Tkyaqil jlu k'elel tuj q'ancha'l tuj tq'ijlalil ok kyok xjal tuj xjel twitz Dios tu'n Jesucrist, ik tza'nx tqanil kolb'il in xi npakb'a'ne, ex tkyaqil kyb'inchb'en xjal mya b'a'n ewan kyu'n, k'elel chik'e'.

¹⁷Aya tok tb'iya xjal judiy ex q'uql tk'u'ja ti'j tley Moisés ex in jaw tniman tib'a tu'nju ojtzqi'n Dios tu'na.

¹⁸Ojtzqi'n tajb'il Dios tu'na, ex ik'ni twitza ti'j aju b'a'nxix, porke xnaq'tza'maja ti'j ley.

¹⁹Ex q'uql tk'u'ja ti'j qa aya ẍaqlul kye moẍ ex qa aya q'ol spik'un kye qeju in che b'et tuj qlolj.

²⁰Tuj tnab'la qa aya q'ol xnaq'tzb'il kye qeju minti' b'a'n kyu'n, ex xnaq'tzala kye k'wa'l, tu'nju at ttxuylal ojtzqib'l tuk'ila tuj ley, ax ikx ttxuylal ju yol axix tok.

²¹Qatzun aya xnaq'tzal te juntl, ¿tiqu'n minti' in t-xnaq'tzan tib'a? Aya in pakb'an kye xjal tu'n mi'n kyelq'an, ¿yajtzun teya, tiqu'ntzun in elq'a'na?

²²Aya in q'mante tu'n mi'n kyb'inchante xjal aj pajil, ¿yajtzun teya, tiqu'ntzun in tb'incha'na aj pajil? Ex aya ik'un qe tilb'ilal tu'na, ¿tiqu'ntzun nne'tz telq'a'na q'inumab'l tuj kyja qe tilb'ilal?

²³Aya in jaw tniman tib'a tu'nju at tley Dios tuk'ila, ex in kub' tq'o'na tch'ixwi Dios tu'nju nnik'a tib'aj tley.

²⁴Tuj tumelxix in tma'n tuj Tu'jil kyja': Qe xjal mya judiy qe in che yolin mya b'a'n ti'j Dios noq tu'n kylaje, chi tuj Tu'jil.

²⁵Ax tok at tajb'en sircunsisyón qa ma japun tley Moisés tu'na; ex qa ma tzik'a tib'aj ley, k'okela ik tza'n mya sircunsidarimaja.

²⁶Atzunju xjal mya sircunsidarimaj ex qa ma japun tu'n aju in tma'n ley, junx ta' ik tza'n otoq sircunsidarinjtz.

²⁷Ex aju xjal mya sircunsidarimaj ti'j tchib'jal, qa ma japun ley tu'n, k'okel q'o'na te aj il tu'n, tu'nju at tley Dios tz'ib'an tuk'ila ex o sircunsidarinjtza, pero nnik'a tib'aj ley.

²⁸Porke mya ax tok judiyte xjal noq tu'nju in tyek'un tib' qa judiy xjalte; ex mya ax tok sircunsisyón aju in b'ant ti'j qchib'jal.

²⁹Aju xjal axix tok judiy, atzun teju at tley Dios tuj tanmi; ex aju sircunsisyón axix tok, atzun tu'n tten tuj qanmi, mya tu'n ley tz'ib'an in b'ant jlu, noq o'kx tu'n T-xew Dios in tb'incha'n. Ate xjal lu kjawil nimsa'n tu'n Dios, mya kyu'n xjal.