Read kumam Romanos 3 Bible Online

Romanos 3 - kumam bible

Romanos 3

¹¿Alkyetzun at-xix kye xjal judiy aju minti' kye txqantl xjal? ¿ex ti in ajb'en aju sircunsisyón?

²Tuj tkyaqil nimxix tajb'en jlu. Porke tnejelxix tzaj tq'o'n Dios tyol kye xjal judiy.

³Qatzun qa at junjun kyxol minti' xi kyoksla'n, ¿baqa noq tu'nju minti' xi kyoksla'n, minti'wt ma japun tu'n Dios aju tyol?

⁴Ax tok ma japun. Porke axix tok te Dios tyol, maske kykyaqil xjal in che nik'an yol, ik tza'n in tma'n tuj Tu'jil: K'elel nik'b'aj ti'ja qa tz'aqlxix tyola, ex kb'el kyi'j xjal tu'na ok toka tuj xjel kyu'n, chi tuj Tu'jil.

⁵Qatzun tu'nju mya b'a'n in qb'incha'n mas in q'ancha'lin qa tz'aqlxix te Dios, ¿ti ok qma' ti'j jlu? (In chin yoline ik tza'n in che yolin xjal.) ¿Myapelo tz'aqlxix te Dios tu'nju in tq'o'n castiw?

⁶Ax tok tz'aqlxix. Ex noqwit mya tz'aqlxix te Dios, ¿tza'ntzun tten tu'n tkub' kycastiw xjal tu'n?

⁷At xjal in kyma'n kyja': Qa tu'nju in chin nik'ane yol mas in q'ancha'lin qa axix tok tyol Dios te nimb'il te, ¿tiqu'ntzun in q'manjtz wi'je qa aj il qine ex tu'n woke tuj xjel? Chi xjal.

⁸Qa ik tten ik tza'n in kyma'ne, qb'inchamtzun mya b'a'n tu'n tul aju b'a'n. At junjun in che si'min yol wi'je qa ik in xi nma'ne; ex tuj tumelxix tu'n tkub' kysentens qe jlu.

⁹¿Tza'ntzun tten jlu? Aqo' judiy xjal, ¿maspelo b'a'n qo' kywitz xjal mya judiy qe? Mi'n. Porke o txi qma'ne kye xjal judiy ex kye xjal mya judiy qe, kykyaqil ate' tjaq' tipumal il.

¹⁰Ik tza'n in tma'n tuj Tu'jil: Mi a'l jun xjal tz'aqlxix, misikyer jun;

¹¹mi jun nne'l tnik' ti'j, mi jun in jyon ti'j Dios.

¹²Kykyaqil e je'l txalpuj, kykyaqil e ok minti' kyajb'en. Mi jun in b'inchan b'a'n, misikyer jun.

¹³Aju kyqul mer ik tza'n tjulil kyimni katl. In che sb'un tu'n kyaq'. Ttx'ab'l lob'aj at tuj kytzi'.

¹⁴Nim in che yasun tu'n kytzi' ex nim tk'ayil yol nne'tz tuj kytzi'.

¹⁵In che qelan tu'n tkub' jun xjal kyu'n.

¹⁶In che b'et in che xitun ex in che yajlanjtz xjal kyu'n;

¹⁷ex minti' ch'in kymojb'ab'l kyib' kyuk'il txqantl.

¹⁸Minti' tchi Dios tuj kywitz, chi tuj Tu'jil.

¹⁹B'a'n qu'n, tkyaqilju in tma'n tuj ojtxi ley, in tma'n kye qeju ate' tjaq' ley, tu'n tmaqet kytzi' kykyaqil xjal, ex tu'n kyok kykyaqil xjal tuj xjel tu'n Dios ti'j kyb'inchb'en mya b'a'n;

²⁰ex mi jun xjal jaku tz'ok tq'o'n Dios te tz'aqlxix tu'nju in tb'incha'n tkyaqilju in tma'n ley, porke aju ley, atzun tajb'en tu'n tel qnik' ti'j qa aj il qo'.

²¹Atzun ja'lo ma tzaj yek'un jun tumel tza'n tten tu'n qok te tz'aqlxix tu'n Dios, mya tu'n ley tu'n qok te tz'aqlxix, noq o'kx in tzaj tyek'un ley alkye tumel tu'n qok te tz'aqlxix, ax ikx in kyma'n t-sanjel Dios.

²²Noq tu'n qokslab'l ti'j Jesucrist qo okel te tz'aqlxix twitz Dios. Ma tzaj tq'o'n Dios jlu kye kykyaqil qeju ma che okslan ti'j Jesús. Porke jun elni qo' qkyaqil.

²³Porke qkyaqil o qo b'inchan il, ex minti' in qo kanun tu'n qok tz'aqlxix ik tza'n te Dios tz'aqlxixte.

²⁴Ex noq kukx qo okel te tz'aqlxix noq tu'n t-xtalb'il Dios, tu'nju ma qo kolpet tu'n Jesucrist.

²⁵Ma tzaj q'o'n Crist tu'n Dios tu'n tchjet qil tu'n tchk'el noq tu'n qokslab'l ti'j, tu'ntzun tyek'unjtz qa tz'aqlxix te Dios, ex tu'nju tpasens at, minti' kub' tq'o'n kycastiw xjal tu'n tlaj kyil o kyb'incha ojtxi.

²⁶Tu'ntzun tchik'b'anjtz tuj tq'ijlalil ja'lo qa tz'aqlxix te Dios ex tu'n in che ok tq'o'n xjal te tz'aqlxix noq tu'n kyokslab'l ti'j Jesús.

²⁷¿Tza'ntzun tten tu'n tjaw qniman qib'? Minti' tumel tu'n tjaw qniman qib'. ¿Tiqu'ntzun tu'n mi'n tjaw qniman qib'? ¿Tu'npeju ma txi qniman ju ley? Mi'n. Noq o'kx tu'nju ma qo okslan ti'j Jesús.

²⁸Kyja'tzun ma tz'el qnik' ti'j, ate xjal nno'k te tz'aqlxix tu'n Dios noq tu'n tokslab'l, ex mya tu'nju in tb'incha'n aju in tma'n ley.

²⁹¿Ate Dios o'kxpe Dios kye xjal judiy? ¿Myapetzun ax Dios kye xjal mya judiy qe? Ax tok ax ikx Kydios xjal mya judiy qe,

³⁰porke noq o'kx jun Dios at. Qe xjal sircunsidarimaj che okel q'o'n te tz'aqlxix tu'n Dios noq tu'n kyokslab'l, ax ikx qeju mya sircunsidarimaj ax ikx che okel q'o'n te tz'aqlxix tu'n Dios noq tu'n kyokslab'l.

³¹¿Tu'npetzunju qokslab'l k'elel qi'n tipun ley? Mi'n. Tuj juntl tumel, mas k'okel tipun ley qu'n.