Read kumam Romanos 8 Bible Online

Romanos 8 - kumam bible

Romanos 8

¹Kyja'tzun, mlay kub' q'o'n kysentens tu'n kyxi' tuj najen aqeju at kymojb'ab'l kyib' tuk'il Jesucrist, [aqeju minti' in che b'et ik tza'nx tajb'il kychib'jal, o'kx ik tza'n tajb'il Xewb'aj Xjan.]

²Porke ma qo tzoqpet tjaq' tipumal il ex tjaq' tipumal kamik tu'n tipumal T-xew Dios, aju in q'onte qchwinqlal noq tu'nju qmojb'ab'l qib' tuk'il Jesucrist.

³Porke minti' xkye' tley Moisés ti'j tu'n qtzoqpet tjaq' tipumal il, tu'nju minti' tipun ley, tu'n tlaj tajb'il qchib'jal mya b'a'n, atzun ja'lo ma qo tzoqpet tu'n Dios tu'nju tzaj t-sama'n aku Tk'wa'l, ok t-ximlal Tk'wa'l ik tza'n t-ximlal xjal aj il, ex tzaj t-sama'n tu'n tchjet qil; kyja'tzun kyaj il tjaq' sentens tej tkyim t-ximlal Crist,

⁴tu'ntzun tjapun qu'n aju tz'aqlxix ik tza'n in tma'n ley, aqeqo' minti' in qo b'et ik tza'nx tajb'il qchib'jal, noq o'kx ik tza'nx tajb'il Xewb'aj Xjan.

⁵Porke aqeju in kyb'incha'n tajb'il kychib'jal, o'kx in che ximan ti'j ju tajb'il kychib'jal; atzun qeju in kyb'incha'n tajb'il Xewb'aj Xjan, o'kx in che ximan ti'j ju tajb'il Xewb'aj Xjan.

⁶Ex qa ma qo ximan ti'j ju tajb'il qchib'jal, kamik in tzaj tu'n; ex qa ma qo ximan ti'j ju tajb'il Xewb'aj Xjan, tu'n jlu in tzaj q'o'n qchwinqlal ex qmojb'ab'l qib' tuk'il Dios.

⁷Porke aju xjal o'kx in ximan ti'j tajb'il tchib'jal, aj q'oj ti'j Dios, porke minti' in xi tniman aju tley Dios, ex mlay b'ant tu'n.

⁸Ex aqeju in che anq'in ik tza'nx tajb'il kychib'jal, mlay b'ant kyu'n aju in tzalaj Dios ti'j.

⁹Atzun kyeye myatzun in che anq'ine ik tza'nx tajb'il kychib'jale, noq o'kx ik tza'nx tajb'il Xewb'aj Xjan, qa ax tok najl T-xew Dios tuj kyanmiye. Ex qa at jun minti' T-xew Crist tuj tanmi, myatzun te Cristju.

¹⁰Qatzun najl Crist tuj kyanmiye, maske ik tza'n kyimni kyximlale tu'n tlaj il, pero aju kyanmiye at tchwinqlal tu'nju ma che ok q'o'ne te tz'aqlxix tu'n Dios.

¹¹Qatzun najl T-xew Dios tuj kyanmiye, aju Dios jatz anq'in Jesús tu'n kyxol kyimni, ax ikx kyeye kjawil anq'in kyximlale tu'n, aju at tkyimel. Noq tu'nju T-xew Dios najl tuj kyanmiye, kjawil anq'in kyximlale, ik tza'n o jatz anq'in Jesucrist tu'n kyxol kyimni.

¹²Kyja'tzun erman, mya il ti'j tu'n t-xi qniman tajb'il qchib'jal, ex mya il ti'j tu'n qanq'in ik tza'nx tajb'il;

¹³ex qa ma che anq'ine ik tza'nx tajb'il kychib'jale, che kymele; qatzun ma kub' kyxitune aju taq'unb'en kychib'jale noq tu'n Xewb'aj Xjan, oktzun che anq'ile.

¹⁴Porke kykyaqil qeju ẍaqlun tu'n T-xew Dios, atzun qe tk'wa'l Diosju.

¹⁵Porke ma kyk'ame aju Xewb'aj Xjan, mya tu'n kytene juntl maj te majen ex mya tu'n kytene juntl maj tuj xob'ajil; noq o'kx ma kyk'ame Xewb'aj Xjan tu'n kyoke te tk'wa'l Dios; tu'ntzunju nno'k qma'n te Qman Dios: Tat, qo chi.

¹⁶Porke axte Xewb'aj Xjan tuk'ix qanmi in kyma'n qa tk'wa'l Dios qo'.

¹⁷Ex qa tk'wa'l Dios qo', ax ikx at qoklen tu'n ttzaj q'o'n qetzb'il; tu'n Dios ktzajel q'o'n qetzb'il, ex at qoklen ti'j etzb'il ktzajel q'o'n te Crist; qa ma tzik'x qu'n junx tuk'il Crist, ax ikx qo tel junx tuk'il tuj tajwalil tuj kya'j.

¹⁸Porke ma kub' nximane, aju yajb'il qe tuj tq'ijlalil ja'lo mya junx ta' tuk'il ju nimb'il qe tzul, aju ktzajel tq'o'n Dios qe.

¹⁹Porke tkyaqil tch'isb'en Dios kukx in che ayonxix ti'j ex in kyajb'e'n tu'n kytzaj tyek'un Dios alkye qe tk'wa'l.

²⁰Porke aju tch'isb'en Dios ok te minti' tajb'en, mya tu'nju tex tajb'il, noq o'kx tu'nju atzun tajb'il Diosju; ex ax Dios q'uqb'ante tk'u'j tu'n tayon ti'j ju oyb'il te.

²¹Porke ax ikx ax tch'isb'en Dios ktzoqpetel tu'n mi'n ttentl tjaq' tipumal najen, o'kx tu'n tten junx kyuk'il tk'wa'l Dios tuj tzoqpib'l kye ma' t-xilen.

²²Porke b'a'n qu'n, tkyaqil tch'isb'en Dios junx ate' tuj k'ixk'oj ex kukx ky-ayin ja'lo ik tza'n jun xu'j nnu'l itz'j tal.

²³Ex mya o'kx qe jlu, ax ikx qe nimxix in qo ayin tuj qanmi, maske ma qk'am Xewb'aj Xjan ik tza'n jun señ ti'j ju ktzajel q'o'n qe, ex in qo ayon ti'j tu'n qk'monte qoklen te k'wa'lb'aj, ex tu'n jlu kkolpetel qximlal.

²⁴Ex tej qklet, b'i'x qe' qk'u'j ti'j jlu ex in qo ayon ti'j; ex qa ma qil aju in qo ayon ti'j, mlay qo ayon txqantl; ex qa ma qil ¿ti tten tu'n qayontl?

²⁵Qatzun in qo ayon ti'j ju na'nx qlonte, b'a'n tu'n qayon ti'j tuk'il qpasens.

²⁶Ax ikx te Xewb'aj Xjan in onin quk'il tu'nju minti' qipun; porke minti' b'a'n qu'n tza'n tten tu'n qna'n Dios; ex axte Xewb'aj Xjan in kub'san qi'j twitz Dios tu'nju nimxix tajb'il qi'j ex tu'nju minti' in knet tumel qu'n tu'n qyolin.

²⁷Atzunte Dios in xpich'un tuj qanmi ex ojtzqi'n tu'n alkye t-ximb'etz Xewb'aj Xjan qi'j; porke in kub'san Xewb'aj Xjan kyi'j okslal ik tza'n tajb'il Dios.

²⁸Ex b'a'n qu'n, tuj tkyaqil in aq'nan Dios tu'n tel b'a'n kye qeju in che k'ujlan te, kye qeju txko'majtl qe ik tza'nx t-ximb'etz Dios.

²⁹Porke aqeju ojtzqi'maj tu'n Dios ojtxi, ax ikx kub' t-ximan Dios ojtxi tu'n kyok ik tza'nx ju Tk'wa'l, tu'ntzun tok Tk'wa'l te nej k'wa'l kyxol nimku tz'inb'aj.

³⁰Ex aqeju o che el tpa'n Dios ojtxi, ax ikx e tzaj ttxko'n; ex aqeju e tzaj ttxko'n, ax ikx ma che ok tq'o'n te tz'aqlxix; ex aqeju ma che ok tq'o'n te tz'aqlxix, ax ikx tzaj tq'o'n Dios kyoklen tu'n kyten tuk'il tuj tajwalil.

³¹¿Titzun ok qma' ti'j jlu? Qa a Dios quk'il, ¿alkyetzun b'a'n tq'ojl qi'j?

³²Minti' kub' t-xk'ayin Dios tu'n ttzaj tq'o'n Tk'wa'l, noq o'kx xi tq'o'n tu'n tkyim tu'n tlaj qil qkyaqil. Qa ma tb'incha qe ikju, ¿tza'ntzun tten tu'n mi'n ttzaj tq'o'n tkyaqil qe junx tuk'il Tk'wa'l?

³³¿Alkye b'a'n ttx'olb'ante kyil qeju sk'o'maj tu'n Dios? Mi a'l jun porke a Dios ma tz'ok q'onte kye te tz'aqlxix.

³⁴¿Alkye b'a'n tkub' q'onte kysentens? Mi a'l jun porke o kyim Crist ex jaw anq'in kyxol kyimni, at ttxlaj Dios tuj b'anq'ab'aj, ex ax in kub'san qi'j.

³⁵¿Alkye b'a'n tel pa'nte qe ti'j tk'ujlalil Crist? ¿Apelo ju k'ixk'oj in tzaj qi'j, ex qa tu'n yajb'il qe, ex qa tu'nju in qo yajlanjtz tu'n tlaj tyol Dios, ex qa tu'n we'yaj, ex qa tu'n qxb'alun minti', ex qa tu'n xob'ajil, ex qa tu'n qkub' b'yo'n?

³⁶Ik tza'n in tma'n tuj Tu'jil: Tkyaqil q'ij nne'lje' qi'je tu'n qkub' b'yo'ne noq tu'n tlaja; in qo ok q'o'ne ik tza'n qe ẍne'l in che kub' b'yet, chi tuj Tu'jil.

³⁷Maske ikju, pero tuj tkyaqil jlu in kub'xix kyi'j qu'n noq tu'n Crist aju o qo tk'ujla.

³⁸Kyja'tzun q'uql nk'u'je ti'j, mi a'l jun b'a'n tel pa'nte qe ti'j tk'ujlalil Dios; mi kamik, mi ju qchwinqlal tzalu twitz tx'otx', mi qe anjel, mi qe nejenel minti' q'ancha'l, mi qeju at kyipumal, mi ju at ja'lo, mi ju tzul,

³⁹mi qeju ate' twitz kya'j, mi qeju ate' tjaq'xi tx'otx', ex mi jun tch'isb'en Dios jaku qo el kypa'n ti'j tk'ujlalil Dios, aju ma tzaj q'o'n qe tu'n Jesucrist aju Qajaw.