Read kumam Romanos 9 Bible Online

Romanos 9 - kumam bible

Romanos 9

¹Ax tok in nma'ne porke okslal qine ti'j Crist, minti' in chin nik'ane yol; ax wanmiye in q'mante weye qa ax tok jlu ex in tzaj tyek'un Xewb'aj Xjan.

²Nim nb'ise at ex kukx tchyo'n tuj wanmiye.

³Ex jaku wajb'eye tu'n tkub' nsentense tu'n nxi'ye tuj najen ex tu'n wel pa'ne ti'j Crist, noq tu'n kyklet qe wermaniye, aqeju nxjalile junx wiyjile kyuk'il.

⁴Aj Israel qe, ex o tzaj q'o'n kyoklen te k'wa'lb'aj. O ten t-spik'umal Dios kyxol, ex o b'ant ti'j jun yol tu'n Dios kyuk'il, ex o tzaj q'o'n tley Moisés kye, tuk'ix aju ajb'eb'l te Dios, ex tkyaqilju o tma Dios tu'n ttzaj tq'o'n kye.

⁵Kyk'wa'l qxe'chel qe, ex ti'j kyiyjil el Crist tej tok te xjal. Ate Crist ax Dioste tib'aj tkyaqil, ex in jaw nimsa'n tb'i te jumajx. Ikxwitju.

⁶Pero aju yol xi ttziyan Dios kye aj Israel minti' kyaj ten noq kukx, minti'wt ma japun, porke mya kykyaqil qeju elni itz'j ti'j Israel aj Israel qe.

⁷Ex mya noq tu'nju tiyjil Abraham qe okwit che okel kykyaqil te tk'wa'l; tu'nju otoq txi tma'n Dios te Abraham: O'kx qe tk'wa'l Isaac che okel te tiyjila, chi Dios te Abraham.

⁸Kyja'tzun tten, mya kykyaqil qe tk'wa'l Abraham che okel q'o'n te tk'wa'l Dios; noq o'kx che okel te tk'wa'l ex te tiyjil Abraham aqeju o che itz'j tu'nju yol tzaj ttziyan Dios te.

⁹Ex atzun yol lu tzaj ttziyan Dios te Abraham: Tuj juntl ab'q'i chin ule tuk'ila ex tzul itz'j jun tal Sara, chi tuj Tu'jil.

¹⁰Ex mya o'kxju, ax ikx te Rebeca ok ten kab'e tal tu'n jun xinaq Isaac tb'i, aju qxe'chel.

¹¹Ex na'nxtoq kyitz'j qe tal ex na'nxtoq kyb'inchante aju b'a'n ex qa aju mya b'a'n, xi tma'n Dios jun yol te Rebeca: Aju tzikb'aj k'okel te tmajen tz'inb'aj, chi Dios. Tma Dios ikju tu'ntzun kukx tten t-ximb'etz aju otoq kub' t-ximan, tu'n tjaw t-sk'o'n jun kyxol kab'e, ex mya tu'n taq'unb'en k'wa'l tu'n tjaw sk'o'n, noq o'kx tu'nju ax Dios o txkonte te, ex tu'ntzun tjapun aju yol tz'ib'an tuj Tu'jil: A Jacob o nk'ujlaye, atzunte Esaú el wik'une, chi Dios.

¹⁴¿Titzun kxel qma'n? ¿Myapelo tz'aqlxix Dios? Tz'aqlxix.

¹⁵Ex xi tma'n Dios te Moisés kyja': Qa waje tu'n ttzaj q'aq'an nk'u'je ti'j jun xjal, ktzajel q'aq'an nk'u'je ti'j; ex qa waje tu'n ttzaj tz'e'y wanmiye ti'j jun xjal, ktzajel tz'e'y wanmiye ti'j, chi Dios.

¹⁶Kyja'tzun, mya tu'nju tajb'il xjal, ex mya tu'nju in tipuman tib', o'kx tu'nju in q'aq'an tk'u'j Dios ti'j.

¹⁷Porke in tma'n Dios tuj Tu'jil te rey Faraón: Tu'n jlu ma jaw nsk'o'ne tu'n toka te rey, tu'ntzun tyek'unjtz wipumale ti'ja ti'j ju ok nb'incha'ye, ex tu'n tel tqanil nb'iye tuj tkyaqil twitz tx'otx', chi Dios.

¹⁸Kyja'tzun, qa tajb'il Dios tu'n ttzaj q'aq'an tk'u'j ti'j junjun xjal, in tzaj q'aq'an tk'u'j kyi'j, ex qa tajb'il Dios tu'n tkyuwsante tanmi junjuntl xjal, in kub' tkyuwsa'n.

¹⁹Ex oklo tma'ya weye: Qa ik ttenju ¿tiqu'ntzun in tma'n Dios qa at til xjal? Ex, ¿alkye jaku we' twitz ju tajb'il?

²⁰Ex aya wuk'il, ¿alkyetzuna tu'nju nno'k tmojtza'na yol tuk'il Dios? ¿Jakupelo tma jun k'il teju b'inchal te: Tiqu'n ma chin kub' tb'incha'na ikju, chiwt?

²¹Aju b'inchal k'il ¿minti'pelo toklen ti'j ax xoq'l tu'n tb'inchante jun xar mejorxix ke'yin ex juntl myaxix mejor ke'yin?

²²¿Titzun kxel qma'n? Maske o tajb'e Dios tu'n ttzaj tyek'un tq'oj ex tu'n tel kynik' xjal ti'j ju tipumal, pero ik'x ti'j tu'n, tu'nju at nim tpasens kyi'j qeju at ttzajel tq'oj kyi'j ex b'animaj qe tu'n kyxi' tuj najen.

²³Ik'x ti'j tu'n Dios noq tu'n ttzaj tyek'un tajwalil ma'xix kye qeju in q'aq'an tk'u'j kyi'j ex b'anin ti'j tu'n tu'n kyten tuk'il tuj t-spik'umal.

²⁴A jlu in tma'n qi'j, aqo' txko'majtl qo' tu'n, mya o'kx kyxol xjal judiy, ax ikx kyxol xjal mya judiy qe.

²⁵Ik tza'n in tma'n tuj u'j tu'n Oseas: Qe xjal mya etzan wu'ne che okel nq'o'ne te weye, ex aqeju mya k'ujla'n wu'ne, ok che k'ujlanjtzel wu'ne.

²⁶Ex tuj lugar jatum o q'manjtz kye: Aqeye xjal mya etzan qeye wu'ne nchiye, axtzun k'okel kyb'i tk'wa'l Dios itz', chi Dios tuj Tu'jil.

²⁷Ax ikx te Isaías in jaw tq'ajq'ajel twi' kyuwxix kyi'j aj Israel, in tma'n: Maske ik kyajlal aj Israel ik tza'n ttxa tz'a'n ttzi mar, pero noq nik'xi junjun ok che kletel.

²⁸Porke jurat kjapunel tyol Qman tu'n kykyaj xjal tjaq' kysentens, ex tuj tumelxix kjapunel tu'n, chi Isaías.

²⁹Ik tza'n o tma Isaías ojtxi: Noqwit minti' kyaj q'o'n qiyjil tu'nju Tajaw Tkyaqil, mawtlo qo ok ik tza'n tnam Sodoma, ex ik tza'n tnam Gomorra, chi Isaías.

³⁰¿Titzun ok qma' ti'j jlu? Qe xjal mya judiy qe minti'toq in che ximan ti'j tu'n kyok te tz'aqlxix, atzun qeju ma che ok te tz'aqlxix, noq tu'n kyokslab'l ma che ok q'o'n te tz'aqlxix.

³¹Atzun kye aj Israel lepch qe'ktoq ti'j jun ley tu'n kyok te tz'aqlxix tu'n, ex minti' e xkye' ti'j tu'n tjapun kyu'n.

³²¿Tiqu'n? Porke lepch qe'ktoq ti'j, mya tu'n kyokslab'l, noq o'kx tu'nju kyaq'unb'en, ik tza'n in tma'n ley. Kyja'tzun e jaw tolj ti'j ju ab'j tkub' kywitz,

³³ik tza'n in tma'n tuj Tu'jil: Kb'el nq'o'ne jun ab'j tuj tnam Sión tu'n kyjaw tolj xjal ti'j ex tu'n kykub' tz'aq; alkyetzunju ma tz'okslan ti'j, mlay tzaj tch'ixwi, chi tuj Tu'jil.