Read kumam 1 Corinto 11 Bible Online

1 Corinto 11 - kumam bible

1 Corinto 11

¹Kykano'mele wi'je, ik tza'n weye ma tz'el nkano'ne ti'j Crist.

²Kxel nq'o'ne chjonte kyeye erman porke tuj tkyaqil in chin tzaj kyna'ne, ex tzyu'nx ju xnaq'tzb'il kyu'ne ik tza'n xi nq'o'ne kyeye.

³Porke waje tu'n kyb'inteye, ate Crist nejenel te tkyaqil xinaq, atzunte xinaq nejenel te xu'j, ex ate Dios nejenel te Crist.

⁴Qa at jun xinaq in na'n Dios ex qa in xi tchik'b'a'n aju in tma'n Dios te ex tjax tpasb'il tuj twi', jun ch'ixb'ajil jlu ti'j twi'.

⁵Ex qa at jun xu'j in na'n Dios ex in xi tchik'b'a'n aju in tma'n Dios te ex minti' jun xb'alun tjax tuj twi', jun ch'ixb'ajil jlu ti'j twi'; porke junx ta' mer ik tza'n otoq tz'el tk'oẍin ti'j twi'.

⁶Ex qa minti' in jax tq'o'n xu'j jun xb'alun tuj twi', matzo'mil ttzmal twi'; qatzun at tch'ixwi xu'j ti'j tu'n tel tmatzo'n ttzmal twi' ex qa tu'n tel tk'oẍin ti'j twi', b'a'n tu'n tjax tq'o'n jun xb'alun tuj twi'.

⁷Ate xinaq mi'n jax tq'o'n tpasb'il tuj twi', porke tilb'ilal Dioste ex in tyek'un tajwalil Dios ti'j, atzunte xu'j in yek'unjtz tajwalil xinaq ti'j.

⁸Porke ate xinaq mya ti'j xu'j ela, ate xu'j el ti'j xinaq.

⁹Ex mya tu'n tlaj xu'j o b'inchanjtz te xinaq, ate xu'j o b'inchanjtz tu'n tlaj xinaq.

¹⁰Kyja'tzun il ti'j tu'n tjax tq'o'n xu'j jun xb'alun tuj twi', tu'n tok te jun techal qa at toklen tchmil ti'j, tu'n kylaj qe anjel.

¹¹Ex ik tza'n kyaj b'ant ti'j tu'n Qajaw, ate xinaq at tajb'en xu'j te, ex ate xu'j at tajb'en xinaq te.

¹²Porke ik tza'n te xu'j ti'j xinaq ela, ax ikxtzun kye xinaq ti'j xu'j in che el itz'j; ex tkyaqil tuk'il Dios in tzaj.

¹³Ax qeye che ximane ti'j jlu: ¿B'a'npe tu'n tna'n xu'j Dios mya tjax xb'alun tuj twi'?

¹⁴¿Myapetzun qu'nx nne'l qnik' ti'j, qa ma ch'iy ttzmal twi' xinaq in tzaj tch'ixwi?

¹⁵Atzunte xu'j at tzalajb'il te qa ma ch'iy ttzmal twi'; porke ma tzaj q'o'n ttzmal twi' xu'j tu'n tajb'en te txayb'il ti'j twi'.

¹⁶Qa at jun taj tu'n tq'ojl tu'n tlaj jlu, b'a'n tu'n tel tnik' ti'j, qeye minti' in qb'incha'ne juntl costumr, ikx qe txqantl okslal tuj junjun iglesi etzan qe tu'n Dios.

¹⁷Kxel nma'ne juntl yol kyeye, ex mlay txi nma'ne qa b'a'n in kyb'incha'ne; ex ok nno'k kychmon kyib'e tuj k'ulb'il, minti' jun b'a'n in kyk'mo'ne ti'j, noq mas mya b'a'n nne'la te kyeye.

¹⁸Tnejelxix, ok nno'k kychmon kyib'e kykyaqile okslal qeye, in nb'i'ne qa at pab'l tib' kyxole, ex tuj nnab'le ax tok junjun yol.

¹⁹Ex il ti'j tu'n tten pab'l tib' kyxole, tu'ntzun tel kynik'e kyi'j qeju axix tok okslal qe kyxole.

²⁰Ex ok tok kychmon kyib'e minti' tumel tu'n kywa'ne ti'j ju wab'j kyaj tma'n Qajaw.

²¹Ex ok in che wa'ne, teyle junjun nej in wa'n ti'j ju tex twa; kyja'tzun at junjun minti' in wa'n tu'nju minti' twa, atzun junjuntl b'i'x in chyo'n kywi' tu'nju nim in xi' kyu'n.

²²¿Titzun tten ikju? ¿Minti'pe kyjaye jatum tu'n kywa'ne ex tu'n kyk'ane? ¿Myapetzun tu'n jlu nne'l kyik'une qe okslal etzan qe tu'n Dios, ex in tzaj kych'ixwi qeju minti' kye? ¿Titzun kxel nma'ne? ¿Okpelo kxel nma'ne qa b'a'n in kyb'incha'ne? Ti'j jlu mlay txi nma'ne qa b'a'n in kyb'incha'ne.

²³Porke aju xnaq'tzb'il tzaj tq'o'n Qajaw weye, axju xi nq'o'ne kyeye: Tzaj ttzyu'n Qajaw Jesús pan ax qonik'an tej t-xi q'o'n tuj kyq'ab' xjal;

²⁴ex tb'ajlenxi tq'o'n chjonte, kub' t-sipan ju pan kyxol ex tma: Kytzyunxe ex kywa'nxe; atzun nximlale jlu kjawil q'o'n twitz crus tu'n kyklete, kyb'inchame jlu te nab'l weye.

²⁵Ax ikx tzaj ttzyu'n ju vas tb'ajlenxi wa'n ex tma: Aju tku'x tuj vas lu, atzun ak'aj yolju tziyi'maj wu'ne tu'n nchk'ele; tkyaqil maj ok t-xi kyk'a'ne jlu, kyb'inchame te nab'l weye, chi Jesús kye.

²⁶Kyja'tzun, tkyaqil maj ok t-xi kywa'ne ju pan lu ex ok t-xi kyk'a'ne aju tku'x tuj vas lu, in kyyek'une ti'j tkyimlen Qajaw; maxi kxel kykoline okxi tul.

²⁷Kyja'tzun, alkye jun ma wa'nte ju pan lu ex ma k'ante ju k'ab'j lu aju kyaj tma'n Qajaw, qa mya xo'n tu'n, at til tu'nju mya xo'n t-ximlal ex tchk'el Qajaw tu'n.

²⁸Kyja'tzun, teyle junjun tu'n t-ximan ti'jx qa b'a'n tten, tu'ntzun twa'n ti'j ju pan ex tu'n tk'an ti'j ju k'ab'j.

²⁹Ex alkye jun in xi twa'n ex in xi tk'a'n, qa mya xo'n tu'n ex minti' nne'l tnik' ti'j qa atzun t-ximlal Qajaw jlu, tu'nx in tzaj ti'n jun castiw tib'aj, tu'nju in xi twa'n ex in xi tk'a'n.

³⁰Tu'ntzun tlaj jlu at nimku yab' kyxole ex nimku minti' kyipun, ex at junjun o che kyim.

³¹Noqwit in qo ximan qi'jx tza'n qten, minti'wtlo in kub' qcastiw tu'n Qajaw.

³²Qatzun ma qo ok tuj xjel tu'n Qajaw, in tzaj tq'o'n Qajaw ch'in qcastiw, tu'ntzun mi'n tkub' qsentens tu'n qnaj junx kyuk'il kykyaqil xjal.

³³Kyja'tzun aqeye wermaniye, ok tok kychmon kyib'e tu'n kywa'ne, che ayone kyi'j txqantl.

³⁴Qa at jun nne'l tk'u'j, b'a'n tu'n twa'n tuj tja tu'ntzun mi'n ttzaj q'o'n kycastiwoye ok tok kychmon kyib'e. Atzun txqantl kb'antel ti'j wu'ne ok npone kyuk'ile.