Read kumam 1 Corinto 12 Bible Online

1 Corinto 12 - kumam bible

1 Corinto 12

¹Erman, waje tu'n kyb'inteye ti'j ju qoklen in tzaj tq'o'n Xewb'aj Xjan te teyle junjun qe.

²B'i'n kyu'ne, na'nxtoq t-xi kyoksla'ne, xi kyq'on kyib'e tu'n kyok lpe'ye kyi'j qe tilb'ilal men qe.

³Kyja'tzun kxel nma'ne kyeye tu'n kyb'inteye, qa at jun xjal at T-xew Dios tuk'il, mlayx tma tu'n t-xi' Jesús tuj najen; ex mlayx tma jun xjal: Ate Jesús Wajawe, qa minti' Xewb'aj Xjan tuk'il.

⁴Ja'lotzun, teyle junjun qe at junxilchaq qoklen ex axte Xewb'aj Xjan in tzaj q'onte.

⁵Ex at junxilchaq tumel tu'n qajb'en, ex o'kx jun Qajaw tu'n qajb'en te.

⁶Ex at junxilchaq tumel tu'n qaq'nan, ex axte Dios in aq'nan quk'il qkyaqil tu'n tb'ant tkyaqil.

⁷Ex teyle junjun in tzaj q'o'n toklen tu'n Xewb'aj Xjan tu'n tajb'en kye kykyaqil.

⁸Tu'nju at junjun in tzaj tq'o'n Xewb'aj Xjan kyoklen tu'n kyyolin tuk'il nab'l; atzun kye junjuntl in tzaj q'o'n nim kyojtzqib'l tu'n kyyolin, axju Xewb'aj Xjan in tzaj q'onte.

⁹Ex te junjuntl in tzaj q'o'n toklen tu'n tqe'xix tk'u'j ti'j Dios, tu'nx ju Xewb'aj Xjan; ex kye junjuntl in tzaj q'o'n kyoklen tu'nx ju Xewb'aj Xjan tu'n kyb'anix qe yab' kyu'n.

¹⁰Ex kye junjuntl in tzaj q'o'n kyoklen tu'n kyb'inchanjtz qe b'inchb'en nim tipumal; ex kye junjuntl in tzaj q'o'n kyoklen tu'n t-xi kychik'b'a'n aju in tma'n Dios kye; ex kye junjuntl in tzaj q'o'n kyoklen tu'n tel kynik' ti'j kyyol qe xjal pakb'al qa ax tok ex qa mi'n; ex kye junjuntl in tzaj q'o'n kyoklen tu'n kyyolin ti'j junxilchaq yol; atzun kye junjuntl in tzaj q'o'n kyoklen tu'n tel pjet junxilchaq yol.

¹¹Ex tkyaqil jlu axte Xewb'aj Xjan in b'inchante junx te, in xi t-sipan toklen teyle junjun ik tza'nx tajb'il.

¹²Porke ik tza'n tten qximlal noq junx ex nimku tok ti'j, ex kykyaqil qeju ate'k ti'j qximlal maske nimku kyb'et pero noq junx qximlal, ikxtzun tten Cristju.

¹³Porke noq tu'n jun Xewb'aj Xjan ma qo b'yan qkyaqil tu'n qok te junx qximlal, maske judiy xjal qo' ex qa griego xjal, maske tzyu'n qo' te majen ex qa tzoqpi'n qo', ex junx Xewb'aj Xjan ma qk'am qkyaqil.

¹⁴Aju qximlal mya junx tten, nimku tok ti'j.

¹⁵Qa ma tma qqan: Mya q'ab'aj qine kyja'tzun mya ti'j t-ximlal xjal atine, chiwt, ¿tu'npetzun jlu minti' toklen ti'j qximlal?

¹⁶Ex qa ma tma qẍkyin: Mya tb'aq' witzb'aj qine kyja'tzun mya ti'j t-ximlal xjal atine, chiwt, ¿tu'npetzun jlu minti' toklen ti'j qximlal?

¹⁷Noqwit o'kx tb'aq' qwitz tok ti'j tkyaqil qximlal, ¿tza'ntzun tten tu'n qb'in? Noqwit o'kx qẍkyin tok ti'j tkyaqil qximlal, ¿tza'ntzun tten tu'n tb'ant qsqonte?

¹⁸Atzun ja'lo tkyaqilju tok ti'j qximlal, ate Dios ok q'onte teyle junjun ik tza'nx tajb'il.

¹⁹Aqeju ate'k ti'j qximlal noqwit junx kyten, ¿tza'nwtlo tten qximlal?

²⁰Atzun ja'lo nimku tok qi'j, ex junx qximlal.

²¹Mlay b'ant tmante tb'aq' qwitz te qq'ab': Minti' tajb'ena weye, chiwt. Ex mlay b'ant tmante qwi' te qqan: Minti' kyajb'ene weye, chiwt.

²²Aqeju ate'k ti'j qximlal ch'in kyipun, alpe qeju at-xix kyajb'en.

²³Aqeju noq ch'in kyoklen tuj qnab'l tok ti'j qximlal, mas xb'alumi'nxix qu'n; ex aqeju mya b'a'nxix che ke'yin, mas kwentinxix qe qu'n.

²⁴Porke aqeju b'a'nxix che ke'yin tok qi'j, minti' txqantl at tajb'en kye. B'i'x kyaj b'ant tten tu'n Dios tkyaqilju tok ti'j qximlal, ex aju ch'in toklen tok ti'j qximlal xi tq'o'n Dios mas toklen,

²⁵tu'ntzun mi'n tel kyik'un kyib' qeju ate'k ti'j qximlal, o'kx tu'n tok kykwentin kyib' kyxolx.

²⁶Qa at jun tok ti'j qximlal ma k'ixb'i, kykyaqil qeju ate'k ti'j qximlal nnik'x kyu'n junx tuk'il; ex qa at jun tok ti'j qximlal in tk'mo'n jun nimb'il, kykyaqil qeju ate'k ti'j qximlal in che tzalaj junx tuk'il.

²⁷Kyja'tzun kytene, t-ximlal Crist qeye, ex teyle junjun kyeye tok ti'j t-ximlal Crist.

²⁸Ex ok tq'o'n Dios kyoklen junjun kyxol kykyaqil okslal: Tnejelxix qe apostol, tkab'in qe t-sanjel Dios, toxin qe xnaq'tzal, ax ikx qeju in b'ant b'inchb'en nim tipumal kyu'n, ex qeju in che b'anix qe yab' kyu'n, ex qeju in che onin, ex qeju in che kawin, ex qeju in che yolin ti'j junxilchaq yol.

²⁹¿Kykyaqilpe apostol qe? ¿Kykyaqilpe t-sanjel Dios qe? ¿Kykyaqilpe xnaq'tzal qe? ¿Kykyaqilpe in che b'inchan b'inchb'en nim kyipumal?

³⁰¿Kykyaqilpe at kyoklen tu'n kyb'anix qe yab' kyu'n? ¿Kykyaqilpe in che yolin ti'j junxilchaq yol? ¿Kykyaqilpe in pjet yol kyu'n?

³¹Kyja'tzun kyq'o'nke tilil tu'n tten kyoklene mas b'a'nxix. Ex kxel nyek'une kyeye jun tumel mas b'a'nxix.