Read kumam 1 Corinto 13 Bible Online

1 Corinto 13 - kumam bible

1 Corinto 13

¹Qa ma qo yolin tuj junxilchaq kyyol xjal ex qa tuj kyyol anjel, ex qa minti' qk'ujlalil, qo okel ik tza'n k'uxb'il in tzinun ex qa ik tza'n jun k'uxb'il tmoj chnab' nim in q'ajt.

²Ex qa at qoklen tu'n t-xi qchik'b'a'n aju in tzaj tma'n Dios, ex qa ma tz'el qnik' ti'j tkyaqilju yol at tuj ewaj, ex qa ojtzqi'n tkyaqil qu'n, ex qa at nim qokslab'l tu'n tik' jun witz qu'n tu'n tpon tuj juntl lugar, ex qa minti' qk'ujlalil, minti' qajb'en.

³Ex qa ma txi qsipan tkyaqilju at qe tu'n kywa'n qe meb'a, ex qa ma txi qq'on qib' tu'n tkub' patun qximlal, ex qa minti' qk'ujlalil, minti'lo tajb'en jlu qe.

⁴Aju xjal at tk'ujlalil at tpasens ex in tz'e'y tk'u'j ti'j tuk'il; aju xjal at tk'ujlalil minti' in tzaj tlo'ch tk'u'j ti'j juntl, ex minti' in jaw tniman tib', minti' in b'aj tyolin tib'.

⁵At tchi tuj twitz, mya noq o'kx ti'jx tok tk'u'j; mya tx'u'j twi', ex minti' in xi tk'u'n q'oj.

⁶Minti' in tzalaj ti'j ju mya b'a'n in kyb'incha'n xjal, o'kx in tzalaj ti'j ju yol ax tok.

⁷Tkyaqil nnik'x tu'n, tkyaqil niman tu'n, ex tuj tkyaqil ayo'n tu'n, ex at tpasens tuj tkyaqil.

⁸Aju k'ujlalil mlay b'aj; ex tzul tq'ijlalil tu'n mi'n t-xi qchik'b'a'ntl aju in tzaj tma'n Dios qe, ex kweb'el tu'n qyolin tuj junxilchaq yol, ex kb'ajel ojtzqib'l.

⁹Porke aju ojtzqi'n qu'n noq ch'in, ex aju tyol Dios in xi qchik'b'a'n noq ch'in.

¹⁰Oktzun tul aju tz'aqlxix, aju mya tz'aqlxix kb'ajel.

¹¹Tej k'wa'lxtoq qo', in qo yolin ik tza'n qe k'wa'l, ik tten qnab'l ik tza'n kynab'l k'wa'l, ex in qo ximan ik tza'n qe k'wa'l; ex tejtzun xqo ok tij xjal, kyaj qq'o'n aju in kyb'incha'n k'wa'l.

¹²Ja'lo in xi qke'yin ik tza'n tuj jun espej myaxix q'ancha'l; ex tzul tq'ijlalil k'okel qke'yin qwitz. Ja'lo noq ch'in ma tz'el qnik' ti'j, ex tuj tq'ijlalil tzul k'elel b'aj qnik' ti'j tkyaqil, ik tza'n qe ma qo ojtzqinjtz tu'n Dios.

¹³Ja'lo kukx tten qokslab'l, ex kukx tqe' qk'u'j ti'j Dios, ex kukx tten qk'ujlalil; mlay che b'aj ox lu; pero aju mas ma' t-xilen kyxol jlu, aju qk'ujlalil.