Read kumam 1 Corinto 15 Bible Online

1 Corinto 15 - kumam bible

1 Corinto 15

¹Ktzajel nna'ntle kyeye erman aju tqanil kolb'il xi npakb'a'ne kyeye ex o kyk'ame ex oksla'nx kyu'ne.

²Tu'ntzunju tqanil lu ma che klete, qa oksla'nx kyu'ne aju yol xi npakb'a'ne kyeye, ex qa mya tu'n kab'e kyk'u'je xi kyoksla'ne.

³Porke tnejelxix xi nq'o'ne xnaq'tzb'il kyeye, axju o nk'ame. Xi nma'ne: Ate Crist o kyim tu'n tchjet qil, ik tza'n in tma'n tuj Tu'jil;

⁴ex ku'x maqu'n, ex jatz anq'in tuj toxin q'ij, ik tza'n in tma'n tuj Tu'jil;

⁵ex kub' tyek'un tib' twitz Pedro, ex te tib'ajxi kub' tyek'un tib' kywitz qeju kab'laj apostol.

⁶Ex te tib'ajxi kub' tyek'un tib' kywitz mas te jwe' syent erman ate' junx; kyxol qe jlu nimku itz'x qe, ex junjuntl o che kyim.

⁷Ex te tib'ajxi kub' tyek'un tib' twitz Jacobo; ex te tib'ajxi jlu kub' tyek'un tib' kywitz kykyaqil apostol.

⁸Te mankb'ilxitzun kub' tyek'un tib' nwitze, ik ntene ik tza'n jun k'wa'l in itz'j na'nxtoq tpon tq'ijlalil.

⁹Porke aqine tal ch'in qine kywitz qe txqantl apostol, mya b'a'n qine tu'n tok q'o'n nb'iye apostol, ex e b'aj nyajla'ne qe okslal etzan qe tu'n Dios.

¹⁰Ex noq tu'n t-xtalb'il Dios ma chin oke apostol; ex mya noqx gan ju t-xtalb'il Dios tzaj tq'o'n weye, ex mas ma chin aq'nane kywitz kykyaqil; ex mya wu'nxe ma b'ant, noq o'kx tu'n t-xtalb'il Dios at wuk'ile.

¹¹Kyja'tzun, qa aqine ma chin aq'nane ex qa aqe txqantl apostol, ex atzun jlu in xi qpakb'a'ne, ex atzun jlu ma txi kyoksla'ne.

¹²Qatzun in xi qpakb'a'ne qa o jaw anq'in Crist kyxol kyimni, ¿tza'ntzun tten in kyma'n junjun kyxole qa mlayx jatz anq'in jun xjal kyxol kyimni?

¹³Ex qa mlayx jatz anq'in jun xjal kyxol kyimni, entons minti' o jatz anq'in Crist ikju.

¹⁴Ex qa minti' o jatz anq'in Crist, ex noqxlo gan aju in xi qpakb'a'ne, ax ikx noqxlo gan aju kyokslab'le.

¹⁵Ex ma qo oke nik'al yol ti'j Dios; porke ma txi qma'ne qa o jatz anq'in Crist tu'n Dios, ex qa ax tok mlayx jaw anq'in jun xjal kyxol kyimni, ex minti'lo o jatz anq'in Crist tu'n Dios.

¹⁶Ex qa mlayx che jatz anq'in qe kyimni, ex ikx te Crist minti'lo o jatz anq'in;

¹⁷ex qa minti' o jatz anq'in Crist, noqxlo gan aju kyokslab'le; ex axlo ate'ye tuj kyile.

¹⁸Ax ikx qeju o che kyim okslal qe ti'j Crist, b'i'xlo ma che naj.

¹⁹Qa o'kx at tajb'en qokslab'l ti'j Crist akux itz'x qo' tzalu twitz tx'otx', b'ek'b'ilxix qwitz kywitz kykyaqil xjal.

²⁰Ex ja'lo ax tok o jatz anq'in Crist kyxol kyimni; ate Crist o jatz anq'in nej, tu'ntzun kyjaw anq'in qeju o che kyim ik tza'nx te, ik tten jlu ik tza'n tnejel twitz awal in tyek'un qa tzul txqantl twitz.

²¹Porke noq tu'n jun xjal tzaj kamik, ax ikxtzun noq tu'n jun xjal ok che jawil anq'in xjal kyxol kyimni.

²²Porke ik tza'n in che kyim kykyaqil xjal noq tu'nju tiyjil Adán qe, ikxtzun ok che jawil anq'in kykyaqil qeju o che okslan ti'j Crist.

²³Ex teyle junjun tu'n tjaw anq'in tuj tq'ijlalil; ate Crist o jatz anq'in nej; ex te yajxi, aqeju otoq che okslan ti'j Crist che jawitz anq'in ok tul juntl maj.

²⁴Tzultzun tq'ijlalil tu'n tjapun b'aj tkyaqil, ok t-xi tq'o'n Crist ju kawb'il te Dios aju Mamb'aj, tkub'lenxi kyi'j kykyaqil qeju in che kawin, qeju at kyoklen ex qeju at kyipumal.

²⁵Ex il ti'j kukx tu'n tkawin Crist okxi kykub' b'aj kykyaqil qe aj q'oj ti'j tjaq' tkawb'il.

²⁶Aju mankb'il aj q'oj tu'n tkub' xitj, ate kamik.

²⁷Ex tkyaqil ma kub' tq'o'n Dios tjaq' tkawb'il Crist ik tza'n in tma'n tuj Tu'jil. Ex tej tmante qa tkyaqil ma kub' q'o'n tjaq' tkawb'il Crist, clarxix ta' mya ajunte Dios tkub' tjaq' tkawb'il Crist, noq o'kx ate Dios kub' q'onte tkyaqil tjaq' tkawb'il Crist.

²⁸Okxitzun kykub' q'o'n tkyaqil tjaq' tkawb'il Crist, ax ikxtzunte Crist aju Tk'wa'l Dios kb'el tq'on tib' tjaq' tkawb'il Dios, tu'nju ate Dios kub' q'onte tkyaqil tjaq' tkawb'il Crist. Kyja'tzun tu'n tten toklen Dios tib'aj tkyaqil.

²⁹Noqwit mya ik tten, ¿tiqu'ntzun in che b'yan junjun kyxole te kyxel qeju o che kyim? Qa minti' tumel tu'n kyjaw anq'in qe kyimni, ¿tiqu'ntzun in che b'yan junjun te kyxel?

³⁰¿Ex tiqu'n nne'lje' qi'je tkyaqil q'ij?

³¹Ax tok erman, nne'lje' wi'je tkyaqil q'ij tu'n nkyime; kxel nma'ne jlu kyeye tu'nju in chin tzalaje kyi'je noq tu'nju okslal qeye ti'j Qajaw Jesucrist.

³²Qa o chin q'ojine kyuk'il nmaq txkup tuj tnam Efeso ik tza'n in kyb'incha'n xjal, ¿ti tajb'en jlu weye? Qa mlayx che jatz anq'in kyimni, mas b'a'n qo wa'n ex qo k'an, porke nchi'j qo kyim.

³³Mi'n che el tzpete ti'j: Qa ma txi kyuk'in kyib'e kyuk'il xjal mya b'a'n, ok ktzakjel kynab'le.

³⁴Tzulx kynab'le tuj tumelxix, ex mi'n kyb'inchaye il; tu'nju at junjun kyxole minti' ojtzqi'n Dios kyu'n. In xi nma'ne jlu tu'n ttzaj kych'ixwiye.

³⁵Ex atlo junjun ktzajel tma'n: ¿Tza'nlo tten tu'n kyjaw anq'in qe kyimni? ¿Alkye kyximlal ok kyul?

³⁶Minti' tnab'la, baqa minti' b'a'n tu'na, aju iyaj in ku'x tawa'na, mlay tz'itz'j qa mi xkyim nej.

³⁷Aju iyaj kb'elex tawa'na, ok tja'wil itz'j mya ikx tten ik tza'n ok tku'x tawa'na, noq o'kx ju twitz iyaj kb'elex tawa'na, qa twitz triw ex qa twitz junxitl iyaj;

³⁸ex teyle junjun at tqan tu'n Dios ik tza'nx tajb'il, ex teyle junjun iyaj junxitl tqan.

³⁹Mya junx ta' kychib'jal kykyaqil; part kychib'jal xjal, part kychib'jal jil, part kychib'jal kyiẍ, ex part kychib'jal chyu'j.

⁴⁰Part che ke'yin qeju ate' tuj kya'j, ex part che ke'yin qeju ate' twitz tx'otx'; part kyspik'umal qeju ate' tuj kya'j, ex part kyspik'umal qeju ate' twitz tx'otx'.

⁴¹Part t-spik'umal q'ij, ex part t-spik'umal xjaw, ex part kyspik'umal qe che'w, tu'nju at junjun che'w mas in che qoptz'aj, ex at junjuntl minti'xix in che qoptz'aj.

⁴²Ikxtzun ttenju ok kyjatz anq'in qe kyimni. Ok tku'x maqet qximlal at ttzuwal, oktzun tjatz anq'in minti' ttzuwal.

⁴³Oktzun tku'x maqet b'i'x in tzakj tilb'ilal, oktzun tjatz anq'in puro tb'anil; kb'elex maqet minti' tipun, oktzun tjatz anq'in at tipun.

⁴⁴Aju qximlal kb'elex maqet te twitz tx'otx'; oktzun qjatz anq'in, aju qximlal te tuj kya'j. Ik tza'n at qximlal te twitz tx'otx', ax ikx at qximlal te tuj kya'j.

⁴⁵Porke iktzun in tma'n tuj Tu'jil: Aju tnejel xjal Adán ok te xjal itz', chi ju tz'ib'an, ex aju mankb'il Adán itz' ex q'ol chwinqlal.

⁴⁶Aju qximlal b'ant nej te twitz tx'otx', mya te tuj kya'j; te tib'ajxi in tzaj q'o'n aju qximlal te tuj kya'j.

⁴⁷Aju tnejel xjal te twitz tx'otx', ax tx'otx' te; aju tkab'in xjal te tuj kya'j, [atzun Qajawju.]

⁴⁸Aqeju tx'otx' kyximlal ik kyten ik tza'n Adán tx'otx' t-ximlal; ex aqeju che tel tuj kya'j ik che okel ik tza'n Qajaw aju at tuj kya'j.

⁴⁹Ex ik tza'n ax tilb'ilal Adán q'i'n qu'n aju at twitz tx'otx', ax ikxtzun k'elel qi'n tilb'ilal Crist aju at tuj kya'j.

⁵⁰Ex kxel nma'ne jlu kyeye erman, aju qximlal at ja'lo mlay b'ant tu'n tokx tuj kya'j tuj tkawb'il Dios, ex aju qximlal kyja' tb'aj minti' toklen ti'j ju qximlal mlay b'aj.

⁵¹Lu kxel nma'ne kyeye jun yol minti'toq b'i'n kyu'n xjal: Mya qkyaqil qo kymel, pero qkyaqil kch'expetel qximlal.

⁵²Te jurat tu'n qch'expet ik tza'n in mutz'un tb'aq' qwitz; atzun qo ch'expetel ok tq'ajt mankb'il chun. Porke k'okel q'ajtza'n chun, ex che jawil anq'in qe kyimni, mlay che kyimtl, atzun qe kch'expetel qximlal.

⁵³Aju qximlal at ja'lo knajel, ex ilxix ti'j tu'n tok te ak'aj tu'ntzun mi'n tnaj; ex aju qximlal at ja'lo kymel, ex ilxix ti'j tu'n tok te ak'aj tu'ntzun mi'n tkyim.

⁵⁴Aju qximlal at ja'lo kyja' tnaj ex kyja' tkyim; ex ok tok te ak'aj tu'n mi'n tnaj ex tu'n mi'n tkyim, maxitzun kjapunel aju yol in tma'n tuj Tu'jil: B'i'x knajel kamik te jumajx porke ma kub' ti'j.

⁵⁵Aya kamik, ¿jatumtzun ma pon tipumala tu'n qk'ixb'isanjtze tu'na? Aya kamik, ¿jatum ta' tipumala tu'n tkub' qi'je tu'na? Minti'tl tipumala ja'lo, chi tuj Tu'jil.

⁵⁶Porke ate il, atzun in q'onte tipumal kamik tu'n qk'ixb'isanjtz tu'n, ex aju ojtxi ley, atzun in q'onte tipumal il.

⁵⁷Ex qq'onx chjonte te Dios tu'nju ma tzaj tq'o'n qipumal tu'n tkub' ti'j qu'n noq tu'n Qajaw Jesucrist.

⁵⁸Kyja'tzun erman aqeye at nk'u'je kyi'je, che we'xixe, mi'n che yukche, kukx che aq'nane tuj taq'un Qajaw; porke b'a'n kyu'ne, aju aq'untl in kyb'incha'ne te Qajaw mya noqx gan.