Read kumam 1 Corinto 16 Bible Online

1 Corinto 16 - kumam bible

1 Corinto 16

¹Kxel nma'ne kyeye ti'j ju oyaj tu'n t-xi q'ot kye okslal. Ik tza'n xi nma'ne kye okslal ate' tuj junjun tnam tuj tx'otx' Galacia, ikxtzun kyeye kyb'inchame.

²Tkyaqil domink, teyle junjun kyeye b'a'n tu'n tel tpa'n ch'in, nik'pun ok tkamb'a' tuj jun seman, tu'n t-xi tk'u'n, tu'ntzun mya tzajx tu'n tjaw chmet oyaj ok npone kyuk'ile.

³Oktzun npone, alkye qeju b'a'n tuj kywitze, aqetzunju che xel nsama'ne, tuk'ix u'j kxel kyi'n, tu'ntzun t-xi kyi'n aju oyaj kxel kyq'o'ne tu'n tpon kye okslal tuj Jerusalén.

⁴Ax ikx weye qa b'a'n tuj kywitze tu'n nxi'ye, che xeltzun wuk'ine.

⁵Ok chin pole kyuk'ile wik'lenxiye tuj tx'otx' Macedonia, ex il ti'j tu'n wik'e tuj Macedonia.

⁶Ex mya yajku chin kyaj tene kyuk'ile ex qa ax tu'n ntene kyuk'ile tuj jb'alil, tu'ntzun ttzaj kyq'o'ne ch'in onb'il weye tu'n tajb'en tuj nb'eye jatum chin xe'le.

⁷Porke mi'n waje tu'n wik' aje kyuk'ile ja'lo noq te ik'el b'e qine; atzun waje tu'n ntene kyuk'ile nim q'ij, qa ik tajb'il Qajaw.

⁸Ex ax chin tele tzalu tuj tnam Efeso. Okxi tb'aj ninq'ij Pentecostés, maxitzun chin xe'le.

⁹Porke ma tzaj q'o'n amb'il weye tu'n waq'nane nimxix tuj taq'un Qajaw, maske nimku in che q'ojin wi'je.

¹⁰Ex qa ma pon Timoteo, kykwentime tu'n tten kyuk'ile tuj txub'txaj, porke in tb'incha'n taq'un Qajaw ikx tza'n weye.

¹¹Kyja'tzun, mi'n tz'ok kyq'o'ne qa minti' toklen, noq o'kx tu'n ttzaj kyq'o'ne ch'in onb'il te tu'ntzun tb'et tuj txub'txaj, tu'ntzun tul wuk'ile; porke in chin ayone ti'j tzalu, kyuk'ix erman.

¹²Atzunju erman Apolos nimxix o chin kub'sane twitz tu'n t-xi kyuk'ile kyuk'ix qe erman, ex minti' in tajb'e'n tu'n t-xi' ja'lo; maxitzun kxe'l ok tamet ti'j.

¹³Che xq'uqine ex che we'xixe tuj okslab'l; che okxe xinaq ex kyq'o'nk kyipune.

¹⁴Tkyaqilju ok kyb'incha'ye, b'ant-xwit kyu'ne tu'n kyk'ujlalile.

¹⁵Erman b'i'n kyu'ne, kykyaqil qeju ate' tuj tja Estéfanas, tnejel okslal qe tuj tx'otx' Acaya, ex ma kyaq' kyib' tu'n kyajb'en kye okslal.

¹⁶Chin kub'sale kywitze tu'n tkub' kyb'i'ne kykawb'il qeju in che ajb'en ik tza'n jlu, ex tu'n tkub' kyb'i'ne kykyaqil qeju in che onin ex in che aq'nan tuj taq'un Qajaw.

¹⁷In chin tzalaje tu'nju ma che ul Estéfanas tuk'ix Fortunato ex tuk'ix Acaico, porke ma che ul wuk'ile te kyxele.

¹⁸Porke ma qe' nk'u'je kyu'n, ax ikx kyeye ma qe' kyk'u'je kyu'n; tz'elxtzun kynik'e kyi'j qa at kyoklen jlu.

¹⁹In che'x q'olb'e'ne kyu'n qe okslal ate' tuj junjun tnam tuj tx'otx' Asia. Ax ikx Aquila tuk'ix Priscila, kyuk'ix qe okslal nno'k kychmon kyib' tuj kyja, nimxix in che'x q'olb'e'ne kyu'n tuj tb'i Qajaw.

²⁰In che'x q'olb'e'ne kyu'n kykyaqil erman. Kyq'olb'em kyib'e kyxolxe, ex kytz'ub'an el kywitze tuk'il tkyaqil kyk'ujlalile.

²¹Aqine Pablo in xi ntz'ib'ane jun q'olb'eb'l lu, ma kub' ntz'ib'ane tu'nx nq'ab'e.

²²Qa at jun minti' tk'ujlalil ti'j Qajaw Jesucrist, b'a'n tu'n tkub' t-sentens tu'n t-xi' tuj najen. Ate Qajaw tzul.

²³Aju t-xtalb'il Qajaw Jesucrist tenwt kyuk'ile.

²⁴At nk'ujlalile kyi'je kykyaqile, tu'nju okslal qeye ti'j Jesucrist. Ikxwitju.