Read kumam 1 Corinto 2 Bible Online

1 Corinto 2 - kumam bible

1 Corinto 2

¹Kyja'tzun erman, tej npone kyuk'ile tu'n t-xi nma'ne kyeye aju yol axix tok tzaj tchik'b'a'n Dios, mya nmaq yol xi nma'ne kyeye ex mya nmaq nab'l.

²Ex tej ntene kyxole, kub' nximane tu'n mi'n nyoline ti'j juntl, noq o'kx ti'j Jesucrist aju jaw q'o'n twitz crus.

³Tej ntene kyxole minti' wipune, ex nim in chin xob'e, ex in chin lu'lune.

⁴Aju nyole ex aju pakb'ab'l xi nma'ne kyeye, mya jun yol te xmoxb'il ex mya ik tza'n kynab'l xjal, noq o'kx kub' ti'j kynab'le tu'n tipumal Xewb'aj Xjan,

⁵tu'n mi'n tok ten kyokslab'le ti'j kynab'l xjal, noq o'kx ti'j tipumal Dios.

⁶Ex at jun nab'l in qo yoline ti'j kyxol qeju ma tz'ok kyk'u'j tuj kyokslab'l, ex mya aju nab'l at kyxol xjal te twitz tx'otx' ex mya kynab'l qe nejenel ate' kyxol xjal ch'ix kynaj.

⁷Atzun in qo yoline ti'j tnab'l Dios aju minti' b'i'n kyu'n xjal, aju nab'l ewantoq nej, aju b'ant ti'j tu'n Dios atxix t-xe tnejel na'nxtoq tb'ant twitz tx'otx', tu'n qk'monte jun qoklen ma'xix ex te jumajx.

⁸Mi a'l jun kye nejenel ate' tuj tq'ijlalil ja'lo ma tz'el tnik' ti'j jlu; ex noqwit el kynik' ti'j, miwtlo jaw kyq'o'n Qajaw twitz crus, aju ma'xix toklen.

⁹Ex ik tza'n in tma'n tuj Tu'jil: Aju b'ajx til xjal ex b'ajx tb'i ex b'ajx kanun tuj tanmi, atzunju ma tb'incha Dios kye qeju in che k'ujlan te. Chi tuj Tu'jil.

¹⁰Ma tzaj tyek'un Dios jlu qe tu'n Xewb'aj Xjan; porke ate Xewb'aj Xjan tkyaqil in b'aj tke'yin, ax ikx ju t-ximb'etz Dios, aju mlay tz'el qnik' ti'j.

¹¹Ex mlay tz'el tnik' jun xjal ti'j t-ximb'etz juntl xjal. Axte xjal nne'l tnik' ti'jx t-ximb'etz. Ikxtzun te Dios, mi a'l jun xjal ma tz'el tnik' ti'j t-ximb'etz, noq o'kx aju T-xew Dios nne'l tnik' ti'j.

¹²Atzun qe, minti' ma qk'am qnab'l ik tza'n kynab'l xjal, noq o'kx ma qk'am T-xew Dios, tu'ntzun tel qnik' ti'j t-xtalb'il Dios ma tzaj tq'o'n qe.

¹³In qo yoline ti'j jlu, ex minti' ma qo xnaq'tzanjtze ti'j tu'n kynab'l xjal, noq o'kx ma qo xnaq'tzanjtze ti'j tu'n Xewb'aj Xjan, kyja'tzun in xi qchik'b'a'ne aju in tma'n T-xew Dios kye qeju ma kyk'am T-xew Dios.

¹⁴Aju xjal minti' T-xew Dios tuj tanmi minti' in tk'mo'n aju in tzaj tq'o'n T-xew Dios, porke minti' ttxolil yol nne'la tuj twitz; ex mlay tz'el tnik' ti'j, porke noq o'kx tu'n T-xew Dios jaku tz'el nik'b'aj ti'j.

¹⁵Atzunju xjal at T-xew Dios tuj tanmi nno'k tq'o'n tkyaqil tuj malb'il, tu'n tel tnik' ti'j alkye b'a'n ex alkye mya b'a'n; atzun te mlay tz'ok tuj malb'il tu'n juntl.

¹⁶Porke in tma'n tuj Tu'jil: ¿Atpe jun xjal o tz'el tnik' ti'j tnab'l Qman? ¿Atpe jun xjal o q'onte xnaq'tzb'il te? Chi tuj Tu'jil. Atzun qe ma qk'am tnab'l Crist.