Read kumam 1 Corinto 4 Bible Online

1 Corinto 4 - kumam bible

1 Corinto 4

¹Kyja'tzun, che ximanwt xjal qi'je qa ajb'el qo'ye te Crist, ex tuj qkwente ma tzaj q'o'n tu'n t-xi qma'ne tyol Dios aju ewantoq nej.

²Kyja'tzun, aqeju ma tzaj q'o'n aq'untl tuj kykwent, teyle junjun ilxix ti'j tu'n tjapun tajb'eb'l tu'n.

³Qa ma chin oke tuj xjel kyu'ne ex qa kyu'n xjal, mya ma'xix t-xilen jlu tuj nwitze; ex mya wu'nxe in chin oke tuj xjel.

⁴Minti' na'n wu'ne qa at jun mya b'a'n o nb'inchaye, ex myatzun tu'n jlu tu'n t-xi nma'ne qa tz'aqlxix qine, ate Qajaw kq'malte qa at wile ex qa minti'.

⁵Kyja'tzun mi'n txi kyma'n naje jun kyyole ti'j juntl, che ayone ti'j Qajaw ok tul, ate kchik'b'alte aju ewan tuj qlolj, ex k'elel tuj q'ancha'l tu'n, aju in che ximan xjal ti'j tuj kyanmi; kyja'tzun teyle junjun ok tk'ma' nimb'il te tu'n Dios.

⁶Tkyaqil jlu ma txi ntz'ib'ane kyeye erman, in chin yoline wi'jxe ex ti'j Apolos tu'n qoke te jun yek'b'il kyeye, tu'ntzun tel kykano'ne qi'je, tu'ntzun tjapun kyu'ne aju tz'ib'an tuj Tu'jil, tu'ntzun mi'n tjaw kyniman kyib'e ex tu'n mi'n kymanteye qa mas b'a'n jun tmajen Dios twitz juntl.

⁷Ex ¿alkye ma q'mante qa mas b'a'n qeye twitz juntl? ¿Ex atpe jun at kyuk'ile mya tu'n Dios tzaj q'o'n kyeye? Qatzun ma tzaj q'o'n kyeye tu'n Dios, ¿tiqu'ntzun in jaw kyniman kyib'e ik tza'n mya tu'n Dios tzaj q'o'n kyeye?

⁸In kyma'ne qa nojni kyk'u'je wen, ex qa ma che oke te q'inun, ex qa ma che oke te rey, atzun qeye minti' qoklene tuj kywitze. Kuchiwt ax tok ma che oke te rey, tu'ntzun ikx qeye tu'n qoke te rey junx kyuk'ile.

⁹Porke tuj nnab'le, aqo'ye apostol ma qo ok q'o'ne tu'n Dios te kyke'yb'etz xjal, ma qo oke mas tal ch'in kywitz kykyaqil xjal, mer ik tza'n ma kub' qsentense tu'n qkyime; porke ma qo oke te kyke'yb'etz kykyaqil, kywitz anjel ex kywitz xjal.

¹⁰Ma qo ok q'o'ne minti' qnab'le tu'n tlaj Crist, atzun kyeye ma che oke te aj nab'l tuk'il Crist. Qeye minti' qipune, atzun kyeye at kyipune. Aqeye in che nimanjtze, atzun qeye ik'un qo'ye.

¹¹Kukx tik'x we'yaj qu'ne, kukx in txqet ti'j qk'u'je, kukx qtene minti' qxb'alune, kukx in qo ok b'ju'ne, ex minti' qjaye.

¹²Nim in qo sikte in qo aq'nane tu'n qq'ab'e. Ok in qo ok yaso'ne, in qo yoline b'a'n kyi'j xjal. Ok in qo yajlanjtze, nnik'x qu'ne.

¹³Ok in che si'min xjal yol qi'je, in che'x qtzaq'we'ne tuj mansb'ajil. Ma qo ok q'o'ne te minti' qajb'ene, ma qo oke ik tza'n tz'is tuj kywitz kykyaqil xjal.

¹⁴Minti' in xi ntz'ib'ane jlu tu'n ttzaj kych'ixwiye, noq o'kx tu'n t-xi nq'o'ne kynab'le, ik tza'n nk'wa'l qeye k'ujla'n qeye wu'ne.

¹⁵Ex maske at laj mil q'ol xnaq'tzb'il kyeye ti'j Crist, pero mya nim kymane at; porke ma chin oke te kymane tu'nju okslal qeye ti'j Jesucrist tu'nju xi nma'ne tqanil kolb'il kyeye.

¹⁶Kyja'tzun chin kub'sale kywitze tu'n tel kykano'ne wi'je.

¹⁷Tu'ntzun jlu ma txi nsama'ne Timoteo kyuk'ile. A Timoteo nk'wa'le at-xix nk'u'je ti'j ex okslalxix ti'j Qajaw, ktzajel tna'n kyeye tza'n ntene tuj wokslab'le ti'j Crist, ik tza'n xnaq'tzb'il in xi nq'o'ne tuj tkyaqil lugar ex kyxol kykyaqil okslal.

¹⁸Ex at junjun kyeye jawni kywitz, tuj kynab'l qa mlay chin pontle kyuk'ile.

¹⁹Ex chin xel naje kyuk'ile qa tajb'il Qajaw; k'eleltzun nnik'e kyi'j qeju jawni kywitz qa ax tok at kyipumal, mya noq o'kx tu'nju kyyol k'elel nnik'e kyi'j.

²⁰Porke jun xjal ma kanun tuj tkawb'il Dios, mya tu'n tyol k'elel qnik' ti'j, noq o'kx tu'nju tb'inchb'en.

²¹¿Alkye kyajb'ile? ¿Kyajpeye tu'n nxi'ye kyuk'ile tu'n kyb'aj wasyaline, ex qa tu'n tten nk'ujlalile kyi'je ex mans qine?