Read kumam 1 Corinto 5 Bible Online

1 Corinto 5 - kumam bible

1 Corinto 5

¹Ax tok ma tz'el tqanil at jun ma tb'incha aj pajil kyxole, at jun ma txi ti'n t-xu'jil tman tu'n tok te t-xu'jil; minti'lpe in kyb'incha'n xjal mya okslal ikju.

²Atzun kyeye ma jaw kyniman kyib'e. Mas b'a'nwtlo noqwit tzaj kyb'ise ti'j jlu ex b'i'x tu'n tel q'i'n kyxole aju b'inchante jlu.

³Ax tok, maske mya atine kyuk'ile, pero at wanmiye kyuk'ile, mer ik tza'n ax atine kyuk'ile ma kub' t-sentens wu'ne aju ma b'inchante jlu.

⁴Ok tok kychmon kyib'e tuj tb'i Qajaw Jesús, tuk'ix wanmiye ktel kyuk'ile ex tuk'ix tipumal Qajaw Jesús,

⁵b'a'n tu'n t-xi q'ot ju xjal lu tuj tkwent Satanás tu'n tnaj tchib'jal, tu'ntzun tklet tanmi tuj tq'ijlalil ok tul Qajaw Jesús.

⁶Mya b'a'n tu'nju ma jaw kyniman kyib'e. ¿Minti'pe b'a'n kyu'ne, tkyaqil tq'otjil pan in jaw mal tk'u'j tu'n ch'in t-samel?

⁷Kyi'meltzune kyxole aju ojtxi t-samel pan tu'n kyoke ik tza'n tq'otjil pan ak'aj, porke ik kytene ik tza'n pan minti' t-samel tu'n tjaw mal tk'u'j. Porke ma kub' b'yo'n Crist tu'n tchjet qil ik tza'n jun tal ẍne'l tu'n tik'set Xjan Q'ij.

⁸Kyja'tzun, qo ik'san ninq'ij mya tuk'il ojtxi t-samel pan, atzun in tma'n tu'n mi'n qximan ti'j mya b'a'n ex tu'n mi'n qb'inchante mya b'a'n, ex qo ik'san ninq'ij tuk'il ju pan minti' t-samel, atzun in tma'n minti' tz'il tuj qanmi ex ax tok qyol.

⁹O txi ntz'ib'ane kyeye tuj u'j tu'n mi'n tok kysmon kyib'e kyuk'il qe aj pajil.

¹⁰Minti' xi nma'ne tu'n tel kypa'n kyib'e te jumajx kyi'j qe aj pajil ate' kyxol xjal, ex qa kyi'j qeju in pon kyk'u'j ti'j nimku, ex qa kyi'j qe eleq', ex qa kyi'j qe k'ulul kywitz tilb'ilal; noqwit te jumajx tu'n tel kypa'n kyib'e kyi'j, ilxixwitlo ti'j tu'n kyik'e tzalu twitz tx'otx'.

¹¹Atzun jlu xi ntz'ib'ane kyeye, qa at jun tok tb'i erman, ex qa in tb'incha'n aj pajil, ex qa in pon tk'u'j ti'j nimku, ex qa in k'ulun kywitz tilb'ilal, ex qa in yasun, ex qa k'al q'e'n, ex qa eleq', mi'n tz'ok kymojb'an kyib'e tuk'il, ex mi'n che wa'ne junx tuk'il.

¹²Porke ¿ti woklene tu'n kyok tuj xjel wu'ne qeju mya okslal qe? Porke aqe jlu tu'n Dios che okel tuj xjel. Atzun qe okslal ate' kyxole, b'a'n tu'n kyok tuj xjel kyu'ne. Kyja'tzun, aju xjal b'inchal mya b'a'n, kyi'mele kyxole.