Read kumam 1 Corinto 6 Bible Online

1 Corinto 6 - kumam bible

1 Corinto 6

¹Qa at jun kyxole at tq'oj ti'j juntl, ¿tza'n tten in xi' xtisil kywitz qe aj sanjelal mya okslal ex mya kywitz qe okslal?

²¿Minti'pe b'a'n kyu'ne, qe xjal tuj tkyaqil twitz tx'otx' che okel tuj xjel kyu'n okslal? Qatzun kyu'ne che okel xjal tuj xjel, ¿maj mlaytzun b'ant ti'j kyu'ne aju noq ch'in t-xilen?

³¿Minti'pe b'a'n kyu'ne ok che okel qe anjel tuj xjel qu'n? ¿Yajtzunju in b'aj qxol ja'lo, mlaypelo b'ant ti'j qu'n?

⁴Qatzun in che xtisine ti'j ju in b'aj kyxole ja'lo, ¿maj in che ok kyq'o'ne te jwes qeju noq ch'in kyoklen kyxol okslal?

⁵In xi nma'ne jlu tu'n ttzaj kych'ixwiye. ¿Maj minti' jun kyxole at tnab'l tu'n tok te jwes kyxol terman?

⁶Atzun jlu in kyb'incha'ne: In q'ojin jun erman ti'j juntl erman, in che xtisin kywitz qe aj sanjelal mya okslal.

⁷Ax tok at kypaltile ti'j jlu tu'nju at kyq'oje kyxolxe. ¿Myapelo mas b'a'n tu'n tik'x kyu'ne aju mya b'a'n in b'inchanjtz kyi'je? ¿Myapelo mas b'a'n tu'n t-xi elq'a'n aju at kyeye?

⁸Ax qeye in kyb'incha'ne mya b'a'n ti'j juntl ex in che elq'ane, ex kyi'jx erman in kyb'incha'ne jlu.

⁹¿Minti'pe b'a'n kyu'ne, qe xjal mya tz'aqlxix minti' kyoklen ti'j tkawb'il Dios? Mi'n che tzpete ti'j; qeju in che yaẍin, qe k'ulul kywitz qe tilb'ilal, qe aj pajil, qeju nno'k kyq'on kyib' te xu'j, qe xinaq in pon kyk'u'j ti'j xinaq,

¹⁰qe eleq', qeju in pon kyk'u'j ti'j nimku, qe k'al q'e'n, qeju in che yasun ex qeju in che elq'an tu'n sb'ub'l, kykyaqil jlu minti' kyoklen ti'j tkawb'il Dios.

¹¹Ex iktzun kyten junjun kyeye ojtxi; ex ma che tx'jete ja'lo, ex ma che el pa'ne tu'n Dios tu'n kyajb'ene o'kx te, ex ma che ok q'o'ne te tz'aqlxix tu'n Dios noq tu'n Qajaw Jesús ex tu'n T-xew Qdios.

¹²At jun yol in kyma'n xjal kyja': B'a'n tu'n tb'ant qu'n noq alkye qajb'il, che chi. Ax tok jlu, ex mya tkyaqil jaku tz'el b'a'n te kye. Ax tok jaku b'ant wu'ne noq alkye wajb'ile, ex mlay txi nq'on wib'e tu'n ntene tjaq' tkawb'il.

¹³Aju chib'j in ajb'en te qk'u'j, ex atzun qk'u'j in ajb'en te tkub'ix chib'j; ex tza'nx jun ax ikx juntl che najel kykab'il tu'n Dios. Ex aju qximlal myatzun tajb'en tu'n tb'inchet aj pajil, noq o'kx tu'n tajb'en te Qajaw, atzunte Qajaw tu'n tajb'en te qximlal.

¹⁴Ate Dios jaw anq'in Qajaw tu'n; ax ikx qe qo jawil anq'in tu'n, tu'n tipumal.

¹⁵¿Minti'pe b'a'n kyu'ne qa aju kyximlale te Crist? ¿Maj k'elel wi'ne aju te Crist tu'n t-xi nq'o'ne te jun xu'j aj pajil? Mlayx.

¹⁶¿Minti'pe b'a'n kyu'ne qa at jun ma tz'ok tmojb'an tib' tuk'il jun xu'j aj pajil, junx ma tz'ok t-ximlal tuk'il? Porke in tma'n tuj Tu'jil: Kykab'il che okel te junx.

¹⁷Ex alkye jun ma tz'ok tmojb'an tib' tuk'il Qajaw, junx kyanmi tuk'il.

¹⁸Kyel oqe ti'j ju yaẍb'il. Alkyechaqx juntl il ma tb'incha xjal, mya ti'j t-ximlal in b'inchan il; ex alkyeju in b'inchan aj pajil, in b'inchan il ti'jx t-ximlal.

¹⁹¿Minti'pe b'a'n kyu'ne, aju kyximlale tja Xewb'aj Xjan aju at tuj kyanmiye, aju ma tzaj q'o'n kyeye tu'n Dios, ex mya kykwent-x kyib'e?

²⁰Porke o che laq'ete ex nim loq'b'en kyeye; kyja'tzun kynimsa'nktze Dios tuj kyximlale [ex tuj kyanmiye, porke te Dios qe kykab'il].