Read kumam 1 Corinto 7 Bible Online

1 Corinto 7 - kumam bible

1 Corinto 7

¹Ti'j ju tzaj kytz'ib'ane weye tuj u'j, ax tok b'alo b'a'n tu'n mi'n tknet t-xu'jil xinaq;

²pero tu'n tlaj nimku in kyb'incha'n aj pajil, mas b'a'n teyle junjun xinaq tu'n tten t-xu'jil ex teyle junjun xu'j tu'n tten tchmil.

³Ate xinaq mi'n kub' t-xk'ayin tib' te t-xu'jil; ikxte xu'j mi'n kub' t-xk'ayin tib' te tchmil.

⁴Ate xu'j minti' toklen ti'jx t-ximlal, ate chmilb'aj at toklen ti'j; ax ikx te chmilb'aj minti' toklen ti'jx t-ximlal, ate xu'j at toklen ti'j.

⁵Mi'n kub' kyxk'ayin kyib'e jun te juntl. Jaku b'ant ikju, pero otoq b'ant ti'j kyu'ne ex noq te kab'e q'ij, tu'ntzun kykub' tene tuj na'j Dios, ex tu'n tok kymojb'an kyib'e juntl maj, tu'ntzun mi'n kyoke tuj joyb'il kyi'je tu'n Satanás tu'n tlaj minti' in kyjak'un kyib'e.

⁶Noq jun tumel ma txi nma'ne kyeye, mya jun mandamyent.

⁷Noqwit ik kykyaqil xjal ik tza'n qine, pero teyle junjun at tex toklen tzaj q'o'n tu'n Dios, junxitl toklen jun ex junxitl toklen juntl.

⁸Ex kxel nma'ne kye qeju minti' kymoj ex kye meb'a xu'j, mas b'a'n tu'n kyten kyjunalx ik tza'n weye.

⁹Pero qa minti' tumel tu'n kyjak'unte kyib', kyjyom kymoj, ex mas b'a'n tu'n tknet kymoj ex mya tu'n kyten noq in pon kyk'u'j ti'j jun kymoj.

¹⁰Ex kxel nma'ne kye qeju mejeb'ni, tu'n mi'n tel tpa'n tib' xu'j ti'j tchmil. Mya aqine in chin q'mante jlu, ate Qajaw in q'mante.

¹¹Qatzun ma tz'el tpa'n tib', kukx tu'n tkyaj ten, minti' tu'n tmoje' tuk'il juntl, ex qa tu'n tb'ant tten tuk'il tchmil tu'n tmoje' juntl maj tuk'il. Ikx te chmilb'aj, mi'n kyaj tkolin t-xu'jil.

¹²Ex kye txqantl in xi nma'ne, mya ate Qajaw in q'mante, qa at jun erman mya okslal t-xu'jil ex taj xu'j tu'n tten tuk'il, mi'n kyaj tkolin xjal t-xu'jil.

¹³Ex qa at jun xu'j mya okslal tchmil ex taj xinaq tu'n tten tuk'il, mi'n kyaj tkolin xu'j tchmil.

¹⁴Aju chmilb'aj mya okslal in tk'mo'n t-xtalb'il Dios tu'nju okslal t-xu'jil; ex aju xu'j mya okslal in tk'mo'n t-xtalb'il Dios tu'nju okslal tchmil. Noqwit mya ikju, ikwitlo kyten kyk'wa'le ik tza'n kyk'wa'l mya okslal, ex ja'lo ate' tjaq' t-xtalb'il Dios.

¹⁵Ex qa taj tu'n tel tpa'n tib' aju mya okslal, pa'nmil tib'; qa ma tz'el tpa'n tib', tu'n jlu tzoqpi'ntl erman xinaq ex qa erman xu'j, porke ma qo txkonjtz tu'n Dios tu'n qten minti' q'oj qxol.

¹⁶¿B'i'npe tu'na xu'j qa jaku klet tchmila tu'na? Ex ¿b'i'npe tu'na xinaq qa jaku klet t-xu'jila tu'na?

¹⁷Ex teyle junjun tu'n tten ik tza'nx toklen tzaj tq'o'n Qajaw, ex ik tza'nx ma txkonjtz teyle junjun tu'n Dios. Atzun jlu in xi nma'ne kye kykyaqil okslal tuj junjun tnam.

¹⁸Qa otoq sircunsidarinjtz jun xjal tej ttxkonjtz tu'n Dios, kukx tu'n tten ikju; ex qa na'nxtoq t-sircunsidarinjtz jun xjal tej ttxkonjtz tu'n Dios, kukx tu'n tten ikju.

¹⁹Aju sircunsisyón minti' toklen, ex qa minti' ma b'ant sircunsisyón, ax minti' toklen; aju mas at toklen, tu'n tjapun tmandamyent Dios qu'n.

²⁰Teyle junjun xjal tza'nx tten tej ttxkonjtz tu'n Dios kukx tu'n tten ikju.

²¹Qa jumajx tzyu'na te majen tej ttxkonjtza tu'n Dios, mi'n b'isuna ti'j. Ex qa at tumel tuj twitza tu'n ttzoqpeta, b'a'n, tz'ok tililx tu'na.

²²Porke aju majentoq tej ttxkonjtz tu'n Qajaw, tzoqpi'ntl ja'lo ex ma tz'ok tuj tkwent Qajaw; ex aju tzoqpi'ntoq tej ttxkonjtz tu'n Qajaw, majen te Crist ja'lo.

²³Porke ma che laq'ete ex nimxix loq'b'en kyeye; kyja'tzun mi'n txi kyk'ayin kyib'e kye xjal.

²⁴Erman, teyle junjun tu'n tkyaj ten twitz Dios ik tza'nx tten tej ttxkonjtz.

²⁵Atzun kyi'j qeju na'nx kymoje', minti' jun yol tzaj tma'n Qajaw weye kyi'j; ex kxel nma'ne kyeye aju ma kub' nximane, porke ma tzaj q'aq'an tk'u'j Qajaw wi'je b'a'n tu'n tqe' kyk'u'je wi'je.

²⁶B'a'n te jlu tuj nnab'le, tu'n tkyaj ten xjal ik tza'nx tten, tu'n tlaj nim yajb'il qe at ja'lo.

²⁷Qa at t-xu'jila, mi'n ximana ti'j tu'n tel tpa'n tib'a ti'j. Ex qa minti' t-xu'jila, mi'n ximana ti'j tu'n tmoje'ya.

²⁸Ex qa ma moje'ya, minti' in tb'incha'na il; ax ikx te q'apoj qa ma moje', minti' in b'inchan il; ex aqeju in che moje', tzul yajb'il kye tuj kychwinqlal tzalu twitz tx'otx', ex atzun waje tu'n mi'n kyk'ulb'a'ye jlu.

²⁹Atzun jlu in xi nma'ne erman: Noq nik'xi q'ij taj tu'n tul Qajaw. Ja'lotzun, qeju at kyxu'jil, tu'n kyten ik tza'n minti' kyxu'jil;

³⁰ex qeju in che oq', tu'n kyten ik tza'n minti' in che oq'; ex qeju in che tzalaj, tu'n kyten ik tza'n minti' in che tzalaj; ex qeju in che loq'on, tu'n kyten ik tza'n minti' at kye;

³¹ex qeju in ajb'en kyu'n aju at twitz tx'otx', tu'n kyten ik tza'n minti' in ajb'enxix kyu'n; ex tkyaqilju in b'aj twitz tx'otx' kyja' tnaj.

³²Atzun wajb'ile tu'n mi'n tb'aj kyk'u'je; aju xjal minti' t-xu'jil, tok tk'u'j ti'j tu'n tajb'en te Qajaw tu'ntzun ttzalaj Qajaw ti'j;

³³ex aju xjal at t-xu'jil, tok tk'u'j ti'j ju te twitz tx'otx', tu'ntzun ttzalaj t-xu'jil ti'j.

³⁴Ax ikx mya junx ta' jun xu'j at tchmil ex jun xu'j minti' tchmil. Aju xu'j minti' tchmil, tok tk'u'j ti'j tu'n tajb'en te Qajaw, in xi tq'o'n t-ximlal te Dios tuk'ix tanmi tu'n tajb'en o'kx te; atzunju xu'j at tchmil, tok tk'u'j ti'j ju te twitz tx'otx' tu'ntzun ttzalaj tchmil ti'j.

³⁵Ma txi nma'ne jlu kyeye tu'n tajb'en kyeye, ex mya tu'n kykub' ntzyu'ne, noq o'kx waje tu'n kytene tuj tumelxix ex tu'n kyajb'ene te Qajaw minti' jun maqol kyeye.

³⁶Ex qa at jun ma kub' t-ximan qa mya b'a'n tu'n tkub' ttzyu'n tme'jel ex otoq pon tab'q'iyil, ex qa il ti'j tu'n tmoje', b'incham alkyeju tajb'il; b'a'n tu'n tmoje', mya il jlu.

³⁷Atzunju xjal junx t-ximb'etz, ex mya il ti'j tuj twitz tu'n tmoje' tme'jel, axte xjal tajwil tnab'l, qa ma kub' t-ximan tuj tanmi tu'n mi'n t-xi tq'o'n tme'jel, b'a'n in tb'incha'n.

³⁸Kyja'tzun, alkye jun xjal in xi tq'o'n tme'jel tu'n tmoje', b'a'n in tb'incha'n; ex alkye jun xjal minti' in xi tq'o'n tme'jel tu'n tmoje', mas b'a'n in tb'incha'n.

³⁹Aju xu'j at tchmil, tok tuj tkwent tchmil tu'n ley itz'xku tchmil; qatzun ma kyim tchmil, tzoqpi'ntl te xu'j tu'n tmoje' tuk'il juntl noq al uk'il tajb'il, pero tuk'il jun okslal ti'j Qajaw.

⁴⁰Ex weye tuj nnab'l, mas at tzalajb'il te xu'j qa kukx ma kyaj ten; ax ikx ma kub' nximane qa ax T-xew Dios at wuk'ile.