Read kumam 1 Corinto 8 Bible Online

1 Corinto 8 - kumam bible

1 Corinto 8

¹Atzun ja'lo tu'n qyolin ti'j chib'j in xi q'o'n te oyaj kye tilb'ilal. B'a'n qu'n ex ojtzqi'n jlu qu'n qkyaqil, aju ojtzqib'l in jaw qniman qib' tu'n, atzunju k'ujlalil in qo ch'iy tu'n.

²Qa at jun xjal in tma'n qa b'a'n tkyaqil tu'n, minti' ch'in b'a'n tu'n, atx taj tu'n tb'ant tu'n.

³Ex qa at jun xjal k'ujla'n Dios tu'n, atzunju ojtzqi'n tu'n Dios.

⁴Ex atzunju chib'j in xi qchyo'n ex otoq kub' q'o'n te jun oyaj kywitz tilb'ilal, b'a'n qu'n, qe tilb'ilal minti' kyajb'en twitz tx'otx', o'kx jun Dios at, minti' juntl,

⁵maske at junjun tok kyb'i dios qa tuj kya'j ex qa twitz tx'otx', tu'nju at nimku kydios xjal ex nimku kypatrón.

⁶Atzun qe, noq junx Qdios at, aju Mamb'aj, atzunju b'inchalte tkyaqil, ex atzun tu'n qajb'en te. Ex junx Qajaw at, aju Jesucrist, noq tu'n o b'ant tkyaqil, ex tu'n in qo anq'in.

⁷Ex mya kykyaqil nne'l kynik' ti'j jlu, tu'nju at junjun naq'l qe kyi'j qe tilb'ilal ojtxi, ok t-xi kychyo'n chib'j kukx in che ximan ti'j qa otoq kub' q'o'n te oyaj kywitz tilb'ilal; tu'n jlu in tz'ilix tuj kyanmi, porke in jawje' kyk'u'j ti'j, ex na'nx tkyuwix kynab'l.

⁸Porke mya tu'n chib'j tu'n qk'met tu'n Dios; ex qa ma txi qchyo'n, mya tu'nju qo okel mas b'a'n, ex qa minti' ma txi qchyo'n, mya tu'nju qo okel minti' qajb'en.

⁹Pero ten kykwente ti'j tu'n mi'n kykub' tz'aq tuj il qeju ch'in kyokslab'l tu'nju tzoqpi'n qeye ti'j tu'n t-xi kychyo'ne.

¹⁰Ex qa at jun erman ch'in tokslab'l ma ke'yinte teya, aya at tnab'la, q'uqla ti'j mes tuj kyja tilb'ilal in chyo'na chib'j, ¿mlaypelo pon tk'u'j ti'j tu'n t-xi tchyo'n aju chib'j in kub' q'o'n te oyaj kywitz tilb'ilal?

¹¹Ex tu'nju at tnab'la ti'j jlu, k'elel tzpet termaniya ch'in tokslab'l, aju o kyim Crist tu'n tlaj.

¹²Kyja'tzun, qa ma tz'ajtz jetpaj kynab'l erman ch'in kyokslab'l tu'n tlaj kychi'ye, ti'j Crist in kyb'incha'ne il.

¹³Kyja'tzun, qa tu'n tlaj nchi'ye kb'el tz'aq wermaniye tuj il, mlayx txi nchyo'ne chib'j, tu'ntzun mi'n tkub' tz'aq wermaniye tuj il.