Read kumam 2 Corinto 10 Bible Online

2 Corinto 10 - kumam bible

2 Corinto 10

¹Aqine Pablo, ax qine chin kub'sale kywitze tu'nju mans te Crist ex tb'anilxix. Ik tza'n atine kyuk'ile mans qine, ex ik tza'n mi a'l qine kyuk'ile kyuw in chin yoline kyeye, che chiye.

²Kyja'tzun chin kub'sale kywitze, ok npone kyxole kuchiwt mya il ti'j tu'n nyoline kyuw, porke b'anin ntene tu'n kyok wik'le'ne qeju in che yolin qi'je, in kyma'n qa in qb'incha'ne qexe qajb'ile, ik tza'n in kyb'incha'n txqantl xjal.

³Maske xjal qo'ye ik tza'n qe txqantl xjal, pero aju q'oj nno'k qu'ne mya ik tten ik tza'n kye xjal.

⁴Porke aju qmakb'ile in ajb'en tuj q'oj mya ik tza'n kye xjal, aju qmakb'ile at tipumal tu'n Dios tu'n tkub' kyi'j qeju at kyipumal ex aj q'oj qe ti'j Dios.

⁵Kyja'tzun, qe xjal in che q'ojl ti'j tyol Dios in che kub' nume' qu'ne, ex in kub' xitj qu'ne tkyaqilju maqb'il in kub' kyq'o'n xjal tu'n mi'n tel kynik' txqantl xjal ti'j Dios, ex in kub' ti'j kynab'l xjal qu'ne tu'n t-xi kyniman Crist,

⁶ex b'anin qtene tu'n tkub' qq'o'ne kycastiw qeju mib'an che niman, qa kuyin kyu'ne kykyaqile tu'n t-xi kynimane qyole.

⁷Kyeye o'kx tok kywitze ti'j tza'n ke'yin xjal. Qa at jun q'uql tk'u'j ti'j qa te Crist, ximanx ti'j jlu, ik tza'n te ma txi tq'on tib' te Crist, ikx qeye te Crist qo'ye.

⁸Ex maske nim in chin yoline ti'j qoklene tzaj tq'o'n Qajaw, pero mlay chin ch'ixwiye, porke aju qoklene tzaj tq'o'n Qajaw tu'n tok mastl kynab'le, mya tu'n tkub' xitj kynab'le.

⁹Mi'n waje tu'n kyximane wi'je qa in che ok nsek'pu'ne kyu'n qe u'j ma che'x nsama'ne.

¹⁰Tu'nju at junjun in q'mante: Aju u'j tu'n Pablo puro kyuw tyolb'il, atzun ok in ten quk'il minti'xix tipun ex ju tyol minti' tajb'en, che chi.

¹¹Aju xjal in q'mante jlu, ximanx ti'j jlu, aju ma txi nma'ne tuj u'j mi a'l qine kyuk'ile, axju ok nb'incha'ye ok npone kyuk'ile.

¹²At tchi qi'je tu'n tok qq'on qib'e junx kyuk'il qeju in b'aj kyyolin kyib', ex mlay txi qma'ne qa junx qoklene kyuk'il. Atzun qe jlu kyu'nx nno'k kyq'o'n kyoklen, ex tuj kynab'l qa o'kx aqe b'a'n qe, pero minti' kynab'l.

¹³Atzun qeye minti' in qo ik'e tib'aj tu'n tb'aj qyolin qib'e, o'kx tu'n qkanune jatum ma tzaj techan Dios qeye, tu'n qpon kanune max kyuk'ile.

¹⁴Minti' in qo exe ti'jxi aju ma tzaj techan Dios qeye; noqwit mya nej o pone kyxole, ex jakulo kymaye qa noq qu'nxe ma qo exe ti'jxi, pero aqo'ye o pon neje kyxole xi qpakb'ane tqanil b'a'n kyeye, aju in yolin ti'j Crist.

¹⁵Minti' ma qo okxe tuj taq'unb'en juntl tu'n t-xi qma'ne qa qeye qaq'unb'ene. Atzun qajb'ile, tu'n tch'iy qaq'unb'ene kyxole ex tu'n tex laq'e' tu'nju kyokslab'le in ch'iy. O'kx qaje tu'n qaq'nane jatum ma tzaj techan Dios qeye.

¹⁶Atzun qajb'ile, tu'n t-xi qpakb'a'ne tqanil kolb'il kyuj txqantl tnam ti'jxi jatum ate'ye, ex mya tu'n qokxe tuj taq'unb'en juntl, ex mya tu'n t-xi qma'ne qa qeye qaq'unb'en.

¹⁷Alkye taj tu'n tjaw tniman tib' ti'j taq'unb'en, mas b'a'n tu'n tjaw tnimsa'n tb'i Qajaw tu'nju taq'unb'en.

¹⁸Porke mya aju xjal in b'aj tyolin tib' in k'met tu'n Dios, noq o'kx in k'met tu'n Dios aju xjal b'a'n nne'la taq'unb'en twitz Qajaw.